შობა-ახალი წლის პირობებში ნოყიერი სუფრები და გადაჭარბებული კვება გარდაუვალია. ეს მხოლოდ სუსტი ნებისყოფის საკითხი არ არის — ამას ხელს უწყობს თავად ტრადიცია: რამდენიმე დღის განმავლობაში სტუმრები, გაშლილი სუფრები, წინასწარ მომზადებული საკვები, რომელიც უხვად და მუდმივად ხელმისაწვდომია. სადღესასწაულო კერძებს გარკვეული „საკრალური“ დატვირთვაც აქვს — ისინი განსაკუთრებულად ფასობს და უარის თქმა რთულია.
ამასთან ერთად, ამაღლებული განწყობა და ალკოჰოლი თვითკონტროლს ამცირებს, არომატები მუდმივად გვაცდუნებს, ასევე ტრადიცია და "ხათრი" ყველაფრის დაგემოვნებისკენ გვიბიძგებს. მადას აძლიერებს წინასაახალწლო სტრესიც — გადაღლა, მოსასწრები რამ სახლში თუ სამსახურში, უძილობა — ასევე წინასწარი კვებითი შეზღუდვები, როცა ბევრი ცდილობს ახალ წლამდე გახდომას.
დღესასწაულების შემდეგ ორგანიზმს, განსაკუთრებით კი საჭმლის მომნელებელ სისტემას, მშვიდი და ფრთხილი მხარდაჭერა სჭირდება. სწორედ ამ დროს ჩნდება კითხვები: საჭიროა თუ არა მომნელებელი ფერმენტების მიშველება? შეიძლება თუ არა მთელი დღე საერთოდ არ ვჭამოთ და მხოლოდ წვეულებაზე მივირთვათ? როგორ მოვიშოროთ შებერილობა და ა.შ.
ფერმენტული პრეპარატები ფერმენტები მართლაც ამსუბუქებს მდგომარეობას მძიმე ან ცხიმიანი საკვების შემდეგ და დროებით ხსნის სიმძიმის შეგრძნებას. თუმცა მნიშვნელოვანია გავიგოთ მათი რეალური როლი: ისინი არ აგვარებენ პრობლემის მიზეზს, არ აუმჯობესებენ ნაღვლის გამოყოფას და არ ცვლიან კუჭის მჟავიანობას. ფერმენტები მხოლოდ ერთ კონკრეტულ კვებას ეხმარება მონელებაში. ამიტომ მათი გამოყენება დასაშვებია ერთჯერადად, მაგრამ ყოველდღიურ ჩვევად ქცევა რეკომენდებული არ არის. მსუბუქი შებერილობის შემთხვევაში უმჯობესია ჯერ ბუნებრივ, მარტივ მეთოდებს მივმართოთ — მაგალითად, თბილ წყალსა და სანელებლების ნაყენს (კოჭას, დარიჩინის, კამის თესლის), რომლებიც ორგანიზმის საკუთარ რეგულაციურ მექანიზმებს ააქტიურებს.
ექსტრემალური შიმშილობა უხვი სუფრის შემდეგ ბევრს ლოგიკურად ეჩვენება საკვებზე სრულად უარის თქმა. სინამდვილეში ასეთ დროს შიმშილობა ხშირად სტრესს კიდევ უფრო აძლიერებს. მარილის, შაქრის, ალკოჰოლის სიჭარბე და გვიანი ჭამა კორტიზოლის დონეს ზრდის. თუ ამას კვებითი შეზღუდვაც დაემატა, შეიძლება სითხის შეკავება, გაღიზიანება, ტკბილეულისადმი ლტოლვა, მეტაბოლური პრობლემები და სპაზმები განვითარდეს. საჭმლის მონელება უნდა აღვიქვათ როგორც სისტემა, რომელსაც სჭირდება თანდათანობითი სტაბილიზაცია და არა მკვეთრი ჩარევა.
დეტოქს-პროგრამები წვენებითა და სალათებით მიუხედავად პოპულარობისა, ასეთი „დეტოქსები“ ხშირად იწვევს შაქრის მკვეთრ მერყეობას, კუჭისა და ნაღვლის ბუშტის გაღიზიანებას და ენერგიის დეფიციტს. მთავარი წესი ასეთ დროს არის ცივი და უმი საკვების გამორიცხვა, რადგან ისინი აფერხებს საჭმლის მომნელებელი სისტემის მუშაობას.
პირველი და ყველაზე მნიშვნელოვანი პრინციპი — არ ვიშიმშილოთ, მაგრამ შევცვალოთ კვების ხარისხი. როდესაც კუჭი ცარიელია და მონელება დასუსტებული, ლორწოვანი გარსი უფრო მგრძნობიარე ხდება, იცვლება მჟავიანობა და ნაღველი ჩერდება, რაც შებერილობას აძლიერებს. ამიტომ მეორე დღეს უმჯობესია თბილი და მარტივად მოსანელებელი საკვები: სუპ-პიურეები, ჩაშუშული ბოსტნეული, მცირე რაოდენობით წიწიბურა ან ქინოა, კვერცხი ან სხვა მსუბუქი ცილა, რომლებიც ღვიძლისა და კუჭ-ნაწლავის მუშაობას უწყობს ხელს.
სასარგებლოა რბილი განტვირთვაც — არა როგორც შიმშილობა, არამედ როგორც დღე, როცა კვება ინარჩუნებს სტრუქტურას, მაგრამ მარტივდება. ასეთი დღე აძლევს სხეულს საშუალებას, დაალაგოს საკუთარი რიტმები ზედმეტი სტრესის გარეშე.
დიდ დახმარებას გვაძლევს აღმდგენი სასმელები სანელებლებით. ძირას, ქინძის თესლისა და კამის თესლი კომბინაცია ამცირებს შებერილობას, ხსნის სპაზმებს, აუმჯობესებს ნაღვლის გამოყოფას და ამცირებს ანთებით პროცესებს ნაწლავებში. ასეთი ჩაი ხშირად „სასწრაფო დახმარებაა“ გადატვირთული კუჭისთვის.
არანაკლებ მნიშვნელოვანია კორტიზოლის დონის შემცირება. მეტაბოლიზმი უმჯობესდება მაშინ, როცა სტრესი იკლებს. საკუთარი თავის დადანაშაულება რამდენიმე დღეში მომატებული კილოგრამების გამო მხოლოდ ამძიმებს მდგომარეობას. სრულფასოვანი ძილი, დღის რეჟიმის დალაგება, სტაბილური კვება და სუფთა ჰაერზე გასეირნება ორგანიზმს ბუნებრივ რიტმს უბრუნებს.
დაბოლოს, მსუბუქი ფიზიკური აქტივობა — დილის 10–20 წუთიანი ვარჯიში, სეირნობა, მსუბუქი გაჭიმვები, იოგა ან ზომიერი კარდიო — ხელს უწყობს ტონუსის აღდგენას. მნიშვნელოვანია ყველაფერი ეტაპობრივად და საკუთარი სხეულის მოსმენით გაკეთდეს.
ორგანიზმს თავად აქვს აღდგენის უნარი. მას არ სჭირდება მკაცრი შიმშილობა, აგრესიული დეტოქსები ან მკვეთრი შეზღუდვები. მშვიდი რეჟიმი, მსუბუქი მოძრაობა და ზომიერი, სწორი კვება საკმარისია იმისთვის, რომ 24–48 საათში სადღესასწაულო გადატვირთვის სიმპტომები ბუნებრივად გაქრეს.