"მამაკაცი "ტიკტოკზე" 11 წლის ბავშვს თანატოლად გაეცნო და ინტიმური შინაარსის ფოტოებს სთხოვდა" - როგორ გაიგო დედამ ამის შეახებ - მშობლები
"მამაკაცი "ტიკტოკზე" 11 წლის ბავშვს თანატოლად გაეცნო და ინტიმური შინაარსის ფოტოებს სთხოვდა" - როგორ გაიგო დედამ ამის შეახებ
30 წლამდე მამაკაცი, რომელსაც მეუღლე და ორი მცირეწლოვანი შვილი ჰყავს, 11 წლის ბავშვს სექსუალური შინაარსის წერილებს სწერდა და მისგან ეროტიკული ფოტოების გაგზავნას მოითხოვდა. მამაკაცი 15 იანვარს სასამართლომ გარყვნილ ქმედებაში დამნაშავედ ცნო და 9 წლით თავისუფლების აღკვეთა მიუსაჯა. საქმეზე არასამთავრობო ორგანიზაცია“საფარის” იურისტი მარიამ ვარამაშვილი მუშაობდა, რომელიც AMBEBI.GE-სთან მომხდარის შესახებ ჰყვება.
"ეს დაახლოებით ერთი წლის წინ მოხდა. 11 წლის გოგონას ტიკ-ტოკის მეშვეობით დაუკავშირდა პირი, რომელიც მას გაეცნო, როგორც თანატოლი. ბავშვს თავიდან ეგონა, რომ ყალბი “ექაუნთით” მისი მეგობარი სწერდა და მიმოწერა ცნობისმოყვარეობის გამო გააგრძელა. თუმცა კაცმა ის საუბარში შეიტყუა და რამდენიმე დღეში დაარწმუნა, რომ უყვარდა. მამაკაცმა იცოდა, რომ მისი შეტყობინებების ადრესატი ბავშვი იყო. მიუხედავად ამისა, ის ბავშვს სთხოვდა გეკეთებინა კონკრეტული სექსუალური ხასიათის ქმედება, ეს აღებეჭდა ფოტოს ან ვიდეოს სახით და მისთვის გაეგზავნა. გოგონა, მისი ასაკიდან გამომდინარე, ვერც კი იგებდა რას მოითხოვდა მისგან მამაკაცი. ძალიან მნიშვნელოვანი დეტალი - როდესაც ასეთი ფაქტი ხდება, აქვთ განცდა, რომ ბავშვი იყო ეკრანზე დამოკიდებული, ან დედა ვერ აქცევდა სათანადო ყურადღებას და ბრალეულობა ისევ მსხვერპლის მხარეს გადმოდის, რაც არასწორია. ამ კონკრეტულ შემთხვევაში ბავშვი ზომიერ დროს ატარებდა ეკრანთან და ეს მიმოწერაც დიდხანს არ გაგრძელებულა, სულ რაღაც რამდენიმე დღეში, დედამ გაარკვია რა ხდებოდა და მყისიერად მოახდინა სწორი რეაგირება.” - აცხადებს ადვოკატი.
როგორ გაიგო დედამ მომხდარის შესახებ
ბავშვი დედამ და საქმეში ჩართულმა იურისტმა მოძალადეს საუბარი მსხვერპლის სახელით გაუბეს და მას მობილურის ნომერი “გამოიტყუეს”, რის შემდეგაც მისი იდენტიფიცირება და დაკავება სამართალდამცავებს აღარ გასჭირვებიათ.
"მიუხედავად იმისა, რომ პირის ბრალეულობა უტყუარად დადასტურდა, პირადი ჩხრეკისას ამოღებული იქნა მობილური, რომელშიც არ იყო წაშლილი არცერთი მიმოწერა და აშკარად ჩანდა, რომ კაცს ბავშვთა პორნოგრაფიისა და პედოფილიის მიმართ ინტერესი ჰქონდა, ოჯახი მას მხარს ბოლომდე უჭერდა. მამაკაცს დანაშაული არცერთ ეტაპზე არ უღიარებია.
