შუა ხნის ასაკის კრიზისის ნიშნები მამაკაცებში, რომლებიც ქალს არ უნდა გამოგრჩეს - მშობლები

ტერმინი „შუა ხნის ასაკის კრიზისი“ 1965 წელს ფსიქოლოგმა ელიოტ ჟაკმა შემოიღო. ეს არის ცხოვრების ის ეტაპი, როდესაც ადამიანი საკუთარი თავის, გარემოსა და მთელი განვლილი ცხოვრების გადაფასებას იწყებს. შუა ხნის ასაკის კრიზისი ყველას სხვადასხვა დროს ეწვევა — საშუალოდ 35-დან 65 წლამდე პერიოდში — და თითოეული მას განსხვავებულად განიცდის.

ფსიქოლოგების დაკვირვებით, მამაკაცები ამ კრიზისს ხშირად უფრო მძიმედ განიცდიან, ვიდრე ქალები, და დამოუკიდებლად გამკლავებაც მათთვის რთულია. როგორ უნდა მიხვდეთ, რომ თქვენს მეუღლეს შესაძლოა შუა ხნის ასაკის კრიზისი ეწყება?

1. თავგადასავლებისა და ცვლილებების ძლიერი მოთხოვნილება

შუა ხნის ასაკის კრიზისის პერიოდში მამაკაცები ხშირად ეძებენ ახალ ემოციებსა და თავგადასავლებს — როგორც დადებით, ისე პრობლემურ ფორმებში. შესაძლოა, გაუჩნდეთ სამსახურიდან წამოსვლის, პროფესიიის შეცვლის ან სრულიად სხვა ქალაქში ან ქვეყანაში გადასვლის სურვილი.

ფსიქოლოგების თქმით, ასეთ დროს ყველაზე სწორი დახმარება არის ცვლილებების ერთად, ეტაპობრივად და გააზრებულად განხორციელება, რათა ისინი გრძელვადიან პერსპექტივაში შედეგიანი იყოს და არა სპონტანური ნაბიჯების შედეგი.

2. დეპრესიის ნიშნები

ზოგიერთ შემთხვევაში შუა ხნის ასაკის კრიზისი ნამდვილ დეპრესიაში გადადის. ყურადღება მიაქციეთ შემდეგ სიმპტომებს:

• სევდა, უიმედობა, უსუსურობის განცდა, პესიმიზმი

• ინტერესის დაკარგვა იმ საქმიანობების მიმართ, რაც ადრე სიამოვნებას ანიჭებდა

• ენერგიის ნაკლებობა

• კონცენტრაციისა და გადაწყვეტილებების მიღების სირთულე

• ძილის რეჟიმის დარღვევა

• მადასთან დაკავშირებული ცვლილებები — წონის მკვეთრი კლება ან მომატება

ამ დროს მნიშვნელოვანია, მამაკაცმა იგრძნოს, რომ თქვენ მის გვერდით ხართ და მზად ხართ მხარი დაუჭიროთ, თუმცა პარალელურად ფრთხილად უნდა უბიძგოთ, რათა სპეციალისტთან წავიდეს.

3. შეხედულებებისა და მიზნების მკვეთრი ცვლილება

შუა ხნის ასაკის კრიზისმა შეიძლება ადამიანი სრულიად ახალი ცხოვრების გზისკენ შეატრიალოს. ახალი იდეები და ფიქრები თავისთავად ცუდი არ არის, თუმცა 180-გრადუსიანი რადიკალური ცვლილებები ხშირად პრობლემებს იწვევს.

ექსპერიმენტები მიზანმიმართული უნდა იყოს და არ უნდა არღვევდეს ყოველდღიურ ცხოვრებას. ასეთ სიტუაციაში ფსიქოლოგის დახმარება განსაკუთრებით ეფექტურია. კრიტიკა კი, პირიქით, მდგომარეობას ამძიმებს — მამაკაცისთვის აუცილებელია ქალის მხარდაჭერის შეგრძნება.

4. სიბრაზე და დანაშაულის განცდა

შუა ხნის ასაკის კრიზისში მყოფმა ადამიანმა შესაძლოა ყველა პრობლემა პარტნიორს დააბრალოს. შინაგანი კრიზისი ხშირად იწვევს ბრაზს და პასუხისმგებლობის სხვაზე გადატანას — ყველაზე ხშირად სწორედ ახლობელ ადამიანებზე.

მეორე უკიდურესობაა მუდმივი დანაშაულის განცდა — როცა ადამიანს ჰგონია, რომ საკუთარ ცხოვრებას და გარშემომყოფებს ცხოვრება უნგრევს. ორივე შემთხვევაში მთავარი რჩევა ერთია: არ გაამწვავოთ კონფლიქტი და ნელა, მშვიდად დაეხმაროთ ამ მდგომარეობიდან გამოსვლაში, საჭიროების შემთხვევაში სპეციალისტის დახმარებით.

5. გრძნობების გაცივება

შუა ხნის ასაკის კრიზისის ერთ-ერთი ხშირი გამოვლინებაა ღალატი ან ქორწინებიდან ემოციური და ფიზიკური „გასვლა“. თუ მეუღლე დისტანცირდება, მნიშვნელოვანია ნაჩქარევი დასკვნებისგან თავის შეკავება.

პირველ რიგში, ეს ყოველთვის არ ნიშნავს ღალატს. ნდობის აღდგენა ქორწინებაში შესაძლებელია, მათ შორის წყვილთა თერაპიის დახმარებით.

„კლიმაქსი“ მამაკაცებში - თუ თქვენს ქმარს ეს ნიშნები აქვს, დროულად მიიღეთ ზომები!