რას ჰყვება ბოშა, რომელიც 10 წლისა დააქორწინეს - "14 წლისა მამა გავხდი, 29 წლის - ბაბუა... ეს ჩვენი ტრადიციაა..." - მშობლები

ნაადრევი ქორწინების მტკივნეული თემა, სამწუხაროდ, 21-ე საუკუნეშიც აქტუალურია. ზოგიერთი ხალხისთვის, თემისთვის, ეს ჩვეულებრივი ამბავი და ურღვევი ტრადიციაა, რომელსაც კვლავ მიჰყვებიან და ამიტომ არის, რომ მოულოდნელად გავრცელებულ ვიდეოებს თუ ფოტოებს ქორწილიდან, სადაც არასრულწლოვნები ქორწინდებიან, დიდი გამოხმაურება მოჰყვება ხოლმე.

ასეთი ტრადიცია აქვთ ბოშებს. ამ თემის წარმომადგენლები სხვადასხვა ქვეყანაში ცხოვრობენ, თუმცა ყველგან იცავენ თავიანთ წესებს. საინტერესოა, რას ამბობენ თავად ამ ყველაფერზე? საჯაროდ ამაზე, როგორც წესი, არ საუბრობენ. თუმცა მედიაში გავრცელდა ბოშა ბიზნესმენის, მაქსიმ დიცას ამბავი, მისი ინტერვიუთი, რომელიც თავად დააქორწინეს ადრიანად და ამ ყველაფერზე საკუთარი თემის გადმოსახედიდან საუბრობს:

მაქსიმ დიცა ბოშაა, რომელიც რუსეთში საქმიანობს და ამბობს, რომ ბოშებზე სტერეოტიპებს ანგრევს. კარგა ხანს მოდელად მუშაობდა, მერე კი რესტორატორი გახდა, ასევე წარმატებული ბლოგერია და სოციალურ ქსელში ბევრი გამომწერი ჰყავს. ეკატერინბურგში ორი ბარის თანამფლობელია. მაქსიმმა გადაწყვიტა, რომ თავისი ამბავი ყველას უამბოს და გულახდილად ისაუბროს ბოშებზე, მათ შესახებ გავრცელებულ ამბებზე და ნაადრევი ქორწინების ტრადიციაზე, რომელიც, სამწუხაროდ, ბოშათა თემში კვლავ აქტუალურია.

„მე ვარ ბოშა, რომელიც სტერეოტიპებს არღვევს. მე ცხენებს არ ვიპარავ“, - იცინის მაქსიმი, რომლის ეთნიკურ კუთვნილებას მხოლოდ მისი გვარი ავლენს - არც ოქროს კბილები, არც ბეჭდები თითებზე, არც გრძელი თმა, გავრცელებული სტერეოტიპის საწინააღმდეგოდ.

ის დაიბადა და გაიზარდა ეკატერინბურგში, ბოშების დასახლებაში. პირველად 10 წლის ასაკში დაქორწინდა, მეორედ - 14 წლის ასაკში, მალევე მამა გახდა, 29 წლის ასაკში კი უკვე ბაბუა იყო.

„მე ბლოგერი ვარ და ბევრს აინტერესებს სხვა ხალხების ტრადიციები. ბოშებთან დაკავშირებით დღემდე ბევრი სტერეოტიპია დაკავშირებული, ხშირად არასასიამოვნო“, - ამტკიცებს მაქსიმი. შემდეგ ის დასძენს: „მაგრამ ჩემი პირადი ცხოვრებაა ის, რაც ნამდვილად მე მეხება. ადრე კრიტიკა არ იყო, მაგრამ როგორც კი ვთქვი, რომ 29 წლის ასაკში ბაბუა გავხდი, გაკიცხვა დაიწყეს. ხალხი ყველაფერზე წერს, მაგრამ სამართლიანობისთვის უნდა ითქვას, რომ ისინი წუხან, რომ ჯერ ადრეა. ბავშვობა მომპარეს“.

„პირველად 10 წლის ასაკში დავქორწინდი. ჩვენთან ადრეული ქორწინება დაშვებულია, რათა ადრევე შეეგუონ ოჯახურ ცხოვრებას; უბრალოდ, ასეა. ბოშათა სტანდარტებით ქალი, რომელიც 18 ან 19 წლის ასაკში არაა გათხოვილი, უკვე ხანდაზმულად მიიჩნევა შვილის გასაჩენად... ბუნდოვნად მახსოვს ჩემი პირველი ქორწილი; ჯერ კიდევ პატარა ვიყავი. პატარძალიც არ ამირჩევია; მამები აწყობენ ყველაფერს. შეთანხმებული ქორწინება უფრო ძლიერიაო, ვიდრე სიყვარულზე დაფუძნებული“, - მსჯელობს ის.

პატარძალი 14 წლის იყო. მათ მდიდრული ქორწილი ჰქონდათ და შემდეგ ახალდაქორწინებულები მშობლების სახლში გადავიდნენ.

„რა თქმა უნდა, არავინ გაგზავნის ასე ადრე ცალკე სახლში; ეს ტრადიცია არ არის. მთელ ოჯახს ჩემი მშობლები მართავდნენ. როცა წამოვიზარდე, მეორე ცოლთან ერთად საკუთარ სახლში გადავედით საცხოვრებლად და მუშაობა დავიწყეთ.... პირველ ცოლთან დიდხანს არ გვიცხოვრია, შემდეგ დავშორდით. რატომ? არანაირი მიზიდულობა არ გვქონდა, ასაკობრივი სხვაობაც იყო და შვილებიც არ გვყოლია“, - ამბობს მამაკაცი.

განქორწინება მათ ტრადიციებში აკრძალული არ არის, მაგრამ არც ადვილია. ქორწილებიც და განქორწინებებიც ოჯახურ წრეში იმართება; არავინ მიდის რეესტრში ან სასამართლოში კავშირის დასაშლელად.

„ჩვენ არ ვქორწინდებით ოფიციალურად; ყველაფერი ნათესავებს შორის ხდება. განქორწინება იგივეა. ოჯახები იკრიბებიან და იწყებენ განხილვას, უსმენენ რატომ, რა მიზეზების გამო, რა არის არასწორი. მაშინვე არ წყვეტენ; დროს აძლევენ. ეს შეიძლება ორჯერ ან სამჯერ მოხდეს თათბირი და როდესაც ცხადი ხდება, რომ თანაცხოვრება არ გამოვა, მაშინ განქორწინდებიან“, - ამბობს მაქსიმი.

განშორების შემდეგ, მისმა მშობლებმა ახალი საცოლის ძებნა დაიწყეს. ამჯერად, 13 წლის საქმროც ჩაერია; მან მომავალი ცოლი პირველად ფოტოზე ნახა და დათანხმდა უფროსების არჩევანს.

„მშობლები სხვადასხვა ქალაქში მოგზაურობდნენ და ეძებდნენ. ზოგადად, ჩვენთვის ჩვეულებრივი ამბავია ბანაკში წასვლა, დათვალიერება და გარკვევა. როზა სანქტ-პეტერბურგიდან იყო. დედაჩემს მაშინვე მოეწონა და აირჩია. მოვიდა და ფოტო მაჩვენა“, - ამბობს ის.

ამჯერად, ახალდაქორწინებულები ერთი ასაკის იყვნენ. ისინი 2010 წელს დაქორწინდნენ და მათი პირველი ქალიშვილი იმავე წელს დაიბადა. ახალბედა მამა 14 წლის იყო.

„ჩემი ორი შვილი მშობლებმა გაზარდეს, მაგრამ მესამე თავად გავზარდეთ. ბავშვები ღამეს ბებია-ბაბუასთან ატარებდნენ; ძირითადად ისინი კვებავდნენ და უვლიდნენ მათ“.

მისი მეორე ქალიშვილი მაშინ გაჩნდა, როცა მაქსიმი და მისი ცოლი 18 წლისანი იყვნენ, ხოლო მესამეზე - 20 წლისანი. მცირე პაუზის შემდეგ, მაქსიმი საიდუმლოს ამხელს: ის კვლავ მამად გახდომაზე ოცნებობს.

„ბოშას აუცილებლად უნდა ჰყავდეს ვაჟი, ეს აუცილებელია. მემკვიდრე... ამიტომაც ვფიქრობთ. ამჟამად მე და ჩემი მეუღლე ხელოვნურ განაყოფიერებაზე ვმუშაობთ, ბიჭისთვის ვემზადებით და დროის დაკარგვა არ გვინდა“, ამბობს მრავალშვილიანი მამა.

მაქსიმს უკვე შვილიშვილიც ჰყავს, თუმცა მასზე საუბარი არ სურს და აღიარებს, რომ გაუკვირდა, როდესაც მისი სიხარული ხალხმა არ გაიზიარა და კრიტიკაც მიიღო. თუმცა ამბობს, რომ არ არის გაბრაზებული; ხალხს უბრალოდ არ ესმის დროის ფასი.

ტრადიციისამებრ, მაქსიმის უფროსი ქალიშვილიც ადრევე გახდა ცოლი და დედა. „მე ვეძებდი ქმარს ჩემი ქალიშვილისთვის, ისევე როგორც ჩემთვის ეძებდნენ ჩემი მშობლები. რა თქმა უნდა, ვეძებდი კარგ ოჯახს, კომფორტულ ცხოვრებას და ყველაფერი გამოვიდა“, - ამბობს ის.

„29 წლის ასაკში ბაბუობა საოცარია! ხალხი მეუბნება, რომ ბავშვებს ახალგაზრდობა წაართვეს შვილის გაჩენით. მაგრამ უმჯობესია 14 წლის ასაკში გახდე მშობელი, ვიდრე სკოლაში ავტოფარეხების უკან მოწიო. მე ასე ვფიქრობ... თავიდანვე გვასწავლიან ოჯახურ ღირებულებებსა და ტრადიციებს.“

ახლა მისი ჯერია, დაეხმაროს შვილების აღზრდაში და მაქსიმი არ გაურბის პასუხისმგებლობას. შესაძლოა, ერთ-ერთი სფერო, სადაც ის არ მიჰყვება იმ ტრადიციებს, რომლითაც გაიზარდა, განათლებაა. მაქსიმმა მხოლოდ მეხუთე კლასი დაამთავრა და ამის შემდეგ სკოლაში აღარ უვლია.

„ჩემი შვილები სკოლაში დადიან და მინდა, რომ ისწავლონ. რა თქმა უნდა, როცა წამოვიზარდე, მივხვდი, რომ ცოდნა მაკლია. წერისას შეცდომებს ვუშვებ და საქმეებთან დაკავშირებით პრობლემები მაქვს. ამიტომ მინდა, რომ ჩემმა ქალიშვილებმა სკოლა დაამთავრონ, ჩემმა ვაჟმა კი უმაღლესი განათლება მიიღოს“, - ამბობს ის.

ამჟამად მაქსიმ დიცა ბიზნესით არის დაკავებული, მისი ცოლი კი დიასახლისია. მას არ სურს, ცოლი სამსახურში გაუშვას და ამის საჭიროება არც არისო, ამბობს. ის იმავე სფეროში განვითარებას გეგმავს და შესაძლოა საკუთარი რესტორნის გახსნასაც. მაგრამ ყველაზე მნიშვნელოვანი, ხაზს უსვამს მაქსიმი, არის სახლში სიმშვიდის შენარჩუნება და ცოლთან შეთანხმების მიღწევა. მისი აზრით, ეს ბედნიერი ოჯახის საიდუმლოა - კომპრომისზე წასვლის უნარი.„მაგრამ სახლში ყოველთვის კაცია უფროსი და საბოლოო სიტყვა მე მეკუთვნის“, - ასკვნის ის.

ოჯახის შექმნა მოზარდებისთვის დროებითი თავშესაფარია... ვნება, ინტერესი მალევე გაივლის და მერე გოგონაც და ბიჭიც ძალიან მწარე რეალობის წინაშე დგებიან - რა საფრთხეს უქმნის მოზარდის ფიზიკურ და მენტალურ ჯანმრთელობას ნაადრევი ქორწინება და სქესობრივი ცხოვრება

ოქროებში ჩასმული პატარძალი და მცირეწლოვანი სასიძო - ბოშების ქორწილის ფოტოებს და ვიდეოს აჟიოტაჟი მოჰყვა