როგორ შევაყვაროთ ბავშვს სათამაშოებით, და არა ტელეფონით, თამაში - გამოცდილი ხერხები მშობლებს - მშობლები

თანამედროვე ბავშვობა ორი განსხვავებული სამყაროს საზღვარზე მიმდინარეობს: ერთია სწრაფი, ვირტუალური სივრცე, რომელიც სავსეა მზა გამოსახულებებითა და სწრაფი შედეგებით; მეორე კი — ნელი, ტაქტილური სამყარო, სადაც შედეგი აზროვნებისა და ძალისხმევის შედეგად იბადება.

მნიშვნელოვანია, ეს ხიდი არ დაინგრეს. პირიქით — ბავშვმა უნდა შეძლოს ორივე მხარეს ორიენტირება და თითოეული გამოცდილებიდან სარგებლის მიღება.

მაგრამ რა უნდა ქნან მშობლებმა, თუ ბავშვი მხოლოდ პლანშეტს ან სმარტფონით თამაშს ირჩევს?

ეკრანების თაობა და ტაქტილური სამყაროს დაკარგვა

დღევანდელი გამოწვევა ის არის, რომ ბავშვები თითქმის ჩვილობიდანვე ეკრანებთან იზრდებიან. შედეგად, ხშირად სუსტდება მათი კავშირი ტაქტილურ, რეალურ სამყაროსთან - იმ სამყაროსთან, სადაც აღმოჩენა ხელით შეხებით, მოძრაობით და საკუთარი ძალისხმევით ხდება.

პლანშეტი მტერი არ არის, ის თანამედროვე რეალობის ნაწილია. პრობლემა ჩნდება მაშინ, როდესაც ის თამაშის ერთადერთ წყაროდ იქცევა. ასეთ დროს ბავშვი რაღაც ფუნდამენტურს კარგავს.

საუბარი არ არის გაჯეტის სრულად წართმევაზე. ამოცანაა, შევთავაზოთ ისეთივე საინტერესო, მაგრამ განვითარების თვალსაზრისით გაცილებით მდიდარი ალტერნატივა.

გამოსავალი არსებობს - ბავშვის გარშემო შევქმნათ რეალური, მრავალფეროვანი და ხელმისაწვდომი სათამაშო გარემო, რომელიც ბუნებრივად მიიზიდავს მას.

რატომ არის ფიზიკური თამაში აუცილებელი — ნეირომეცნიერების ხედვა

ნეიროფსიქოლოგიური კვლევები აჩვენებს, რომ ტვინში რთული ნეირონული კავშირების ფორმირებისთვის აუცილებელია მულტისენსორული გამოცდილება.

როდესაც ბავშვი ხელში იღებს კუბს, ის ერთდროულად იღებს:

• სიგნალებს კანის რეცეპტორებიდან (ფაქტურა, ტემპერატურა);

• პროპრიორეცეპტორულ შეგრძნებებს (წონა, ბალანსი);

• ვიზუალურ ინფორმაციას (ფერი, ფორმა).

ის მოქმედებს და მაშინვე ხედავს ხელშესახებ შედეგს. სწორედ ასე ყალიბდება მყარი კოგნიტიური სქემები.

ფიზიკური ობიექტებით თამაში, პასიური კონტენტის მოხმარებისგან განსხვავებით, ავითარებს:

• ყურადღების კონცენტრაციას;

• წვრილ და მსხვილ მოტორიკას (რომლებიც პირდაპირ კავშირშია მეტყველების ცენტრებთან);

• სივრცით და ლოგიკურ აზროვნებას;

• ემოციურ ინტელექტს — როლური თამაშებისა და სხვებთან ურთიერთობის გზით.

წარმატების გასაღები — აკრძალვა კი არა, ინტერესის გაღვივება

პრაქტიკა აჩვენებს, რომ საუკეთესო შედეგი იქ მიიღწევა, სადაც არ არის მკაცრი დაპირისპირება პლანშეტსა და სათამაშოებს შორის, არამედ იქმნება მიმზიდველი ალტერნატივა.

5 გზა, რომ ბავშვი რეალური თამაშით დააინტერესოთ

1. შექმენით „ტაქტილური მიზიდულობის“ ზონა

ოთახში მოაწყვეთ ღია თარო ან კალათა 3–4 ვიზუალურად მიმზიდველი სათამაშოთი. ყოველ კვირას შეცვალეთ ისინი — სიახლის ეფექტი ინტერესს ზრდის.

2. ითამაშეთ ერთად — გულწრფელად

პირველი 10–15 წუთი სრულად ჩაერთეთ. უბრალოდ გვერდით ჯდომა არ კმარა — თავადაც ჩაეფლეთ თამაშში. თქვენი ნამდვილი ინტერესი ბავშვისთვის ყველაზე ძლიერი მოტივატორია.

3. დააკავშირეთ ციფრული და რეალური

უყვარს ცხოველები? შესთავაზეთ ტაქტილურ-ხმოვანი დაფა ცხოველების ხმებით. უყურეთ მანქანებზე მულტფილმს? შემდეგ შექმენით „ავტოპარკი“ სათამაშო მოდელებით და ერთად შეისწავლეთ ისინი.

4. აჩუქეთ ემოცია და გამოცდილება, არა მხოლოდ ნივთი

პლანშეტის ერთ-ერთი უპირატესობა მუდმივად განახლებადი კონტენტია. თუ ფიზიკური სათამაშო ერთფეროვანია, ბავშვი სწრაფად დაკარგავს ინტერესს. აირჩიეთ ისეთი ინტერაქტიული სათამაშოები, რომლებიც ფანტაზიისთვის სივრცეს ტოვებს.

5. დააფასეთ პროცესი და არა შედეგი

თამაშის ნამდვილი ღირებულება შედეგში კი არა, თავად პროცესშია.გაცილებით მნიშვნელოვანია დავინახოთ და შევაფასოთ ძალისხმევა, კონცენტრაცია, მოთმინება და წარმოსახვა. ასეთი მიდგომა აძლიერებს შიდა მოტივაციას და თავდაჯერებას.

ბალანსის ძიება

სათამაშოები პლანშეტის ალტერნატივა არ არის — ისინი სამყაროსთან ურთიერთობის სხვა, აუცილებელი ენაა. ეს არის შეგრძნებების, ძალისხმევის და საკუთარი ხელით შექმნილი შედეგის სიხარულით.

ეკრანი გვაძლევს მზა პასუხებს და მყისიერ შედეგს. რეალური თამაში პროცესში გვაძლევს სარგებელს - ააქტიურებს ერთდროულად რამდენიმე უნარს დასწორედ ეს გამოცდილებები აყალიბებს შემდგომ ხასიათს, დამოუკიდებლობას და სირთულეების გადალახვის უნარს.

იდეალური ბალანსი იქ არის, სადაც:

• პლანშეტი გამოიყენება კონკრეტული ამოცანებისთვის,

• ხოლო სათამაშოები რჩება უსაზღვრო სივრცედ პიროვნული ზრდისთვის.

სათამაშოს ყიდვისას დაფიქრდით, ის ბავშვს განავითარებს თუ პასიურ მომხმარებლად აქცევს, გამოადგება თუ ორ დღეში მიაგდებს? - ნიშნები, რომლებითაც სათამაშოს ჭკვიანურად შეარჩევთ

საჩუქარი პატარებისთვის მხოლოდ 15,95 ლარად: პაზლის ბოქსი, ჟურნალი სტიკერებით და მაგნიტური სათამაშო