დევიდ ბოუის და იმანის ქალიშვილის სკანდალური აღიარება - "დამიჭირეს, ხელბორკილები დამადეს... ვკიოდი, ვყვიროდი, მაგრამ არავინ დამეხმარა..." - მშობლები

დევიდ ბოუისა და იმანის ქალიშვილი შოკისმომგვრელ ამბავს ამხელს ორწლიან ტანჯვაზე რეაბილიტაციის ბანაკში.მომღერალმა ლექსი ჯონსმა, რომელიც მსოფლიო შოუბიზნესის ძალიან ცნობილი და გამორჩეული წყვილის - მომღერალ დევიდ ბოუისა და სუპერმოდელ იმანის ქალიშვილია, მოულოდნელი აღიარება გააკეთა. მან გაუმხილა მსოფლიოს, რომ ფაქტობრივად ბავშვი (14 წლის), სარეაბილიტაციო ცენტრში გაგზავნეს, სადაც სასტიკად ექცეოდნენ. მშობლების პოპულარობამ და გადამეტებულმა მოლოდინებმა გოგონა კრახამდე მიიყვანა.

25 წლის ალექსანდრია ზაჰრა ჯონსი (ეს მისი ნამდვილი სახელია) სოციალურ ქსელში აზიარებს, რომ პატარა ასაკიდანვე ქვეცნობიერად გრძნობდა საზოგადოების ინტენსიურ ყურადღებას; ხალხი არასდროს ეპყრობოდა მას როგორც ჩვეულებრივ ბავშვს. ყოველთვის იყო განსაკუთრებული ინტერესი, რომელიც დევიდ ბოუის ფიგურას უკავშირდებოდა.

„ერთ დროს მეგონა, რომ ვარსებობდი არა როგორც ადამიანი სახელად ლექსი, არამედ როგორც ლექსი-ქალიშვილი“, - ამბობს ის.

10 წლის ასაკში ლექსის პირველად ჰქონდა პანიკური შეტევა. 11 წლისა თვითდაზიანებებს აყენებდა. 12 წლის ასაკში ბულიმიამ უკვე მოიცვა. მისმა ემოციურმა არასტაბილურობამ პიკს 2014 წლის შუა პერიოდში მიაღწია, როდესაც დევიდ ბოუის კიბოს დიაგნოზი დაუსვეს. ამ დროს მისი ქალიშვილის ცხოვრებაში ნარკოტიკები და ალკოჰოლი შემოვიდა.

„დეპრესია დამეწყო. სწავლაშიც სირთულეები მქონდა. სწავლის უნარი დაქვეითებული მქონდა და ჩემი გარეგნობა მძულდა. 12 წლის ასაკში ბულიმია განმივითარდა. 11 წლის ასაკში თვითდაზიანება დავიწყე. თავს სულელად, არაკომპეტენტურად, უღირსად, უსარგებლოდ, უსიყვარულოდ ვგრძნობდი და ის ფაქტი, რომ წარმატებული მშობლები მყავდა, მხოლოდ ამძიმებდა სიტუაციას. ვგრძნობდი, რომ მათი შესაფერისი ვერასდროს გავხდებოდი... ვერ ვხვდებოდი, როგორ დავიბადე ოჯახში, სადაც ყველა წარმატებული იყო ყველა სფეროში, მე კი - ყველაფერში წარუმატებელი“, - ამბობს გოგონა.

მას შემდეგ, რაც მიხვდნენ, რომ მათი ქალიშვილი უფსკრულისკენ მიემართებოდა, მშობლებმა გადაწყვიტეს, ის სარეაბილიტაციო ცენტრში გაეგზავნათ. დევიდ ბოუიმ იმ მომენტში თქვა: „ვწუხვარ, რომ ეს უნდა გავაკეთოთ“. შემდეგ ოთახში ორი მაღალი კაცი შემოვიდა და ერთი ფრაზა წარმოთქვეს: „შეგიძლია ნებით წამოხვიდე ან რთულ გზას გაგივლით“. ლექსიმ ეს უკანასკნელი აირჩია: მან მაგიდის ფეხს ხელი მოჰკიდა, ყვირილი დაიწყო და წინააღმდეგობა გაუწია.

„მათ დამიჭირეს, ხელბორკილები დამადეს, მომგლიჯეს ყველაფერს, რაც ძვირფასი იყო ჩემთვის. მთელი გულით ვკიოდი. ვყვიროდი, დახმარება ვითხოვდი, მაგრამ არავინ დამეხმარა...“ - იხსენებს ის ამ ემოციებს.

მათ შავ ჯიპში ჩასვეს და მშობლებთან დამშვიდობების უფლებაც კი არ მისცეს. შემდეგ ტყეში დატოვეს. 91 დღე გაატარა "ველური ბუნების თერაპიის" პროგრამაში. გარეთ ცხოვრობდა, განმარტოების საშუალების გარეშე და კვირაში ერთხელ იღებდა შხაპს.

„ცეცხლს ჩვენ თვითონ ვანთებდით. ამ ცეცხლზე საჭმელს ვამზადებდით და ბრეზენტის გასაჭიმად კვანძების შეკვრას და მის ქვეშ იოგას ხალიჩასა და საძილე ტომარაში ძილში ვსწავლობდით“, - ყვება ის იქაური პირობების შესახებ.

ტუალეტში შესასვლელად ხმამაღლა უნდა დაეთვალა, რათა პერსონალს გაეგო, ამ მომენტებში თავს არ დაიზიანებდა.

ის რეაბილიტაციაში გატარებულ დროს აღწერს, როგორც „საკუთარი ცხოვრების კონტროლის უფლების წართმევას“. მკურნალობა ეფექტური იყო, თუმცა ძალიან რთული. სამთვიანი თერაპიის შემდეგ, ის იუტაში, რეაბილიტაციის ცენტრში გაგზავნეს, სადაც კიდევ 13 თვე გაატარა: კიდევ უფრო მეტი შიშველი ჩხრეკა, დამცირება და მუდმივი მეთვალყურეობის ქვეშ ცხოვრება.

სწორედ იქ შეიტყო ლექსიმ, რომ მამამისი 2016 წლის იანვარში გარდაიცვალა, მისი ბოლო ალბომის, Blackstar-ის, გამოსვლიდან სულ რაღაც ორი დღის შემდეგ.

„მე მქონდა ფუფუნება, რომ მასთან ორი დღით ადრე, მის დაბადების დღეზე მესაუბრა“, - იხსენებს ის, - „მე ვუთხარი, რომ მიყვარდა და მასაც ვუყვარდი და ორივემ ვიცოდით, რომ ეს სიმართლე იყო. შემდეგ კი ვნახე პოსტი, სადაც ეწერა დაახლოებით ასე: „დევიდ ბოუი ოჯახის გარემოცვაში გარდაიცვალა“.

საკუთარი ამბის გამჟღავნების შემდეგ, გოგონას ბრალი დასდეს ცნობილი მშობლების დადანაშაულებაში, მაგრამ მან მაშინვე ნათლად განაცხადა, რომ მისი პოსტი სხვა რამეს ეხებოდა - არა ოჯახის წინააღმდეგ ჩივილს ან „ყურადღების თავისკენ მიპყრობის“ მცდელობას, არამედ სურვილს, დახმარებოდა მისნაირ ადამიანებს, რომლებიც ცდილობენ საკუთარი ადგილის პოვნას სამყაროში. ის ასევე ხაზს უსვამდა სარეაბილიტაციო ცენტრების სამყაროს სისასტიკეს.

„ჩემი ისტორია არასდროს ყოფილა ჩემი მშობლების დადანაშაულების მცდელობა. მე ძალიან მიყვარს ჩემი მშობლები და მათ მიმართ არანაირი ბრაზი არ მაქვს. ისინი ცდილობდნენ დახმარებოდნენ ბავშვს, რომელიც იმ დროს სირთულეებს ებრძოდა და ჩვენგან არცერთს არ ესმოდა ეს სირთულეები. მე არასდროს გამიზიარებია ეს ოჯახური კონფლიქტის სურათის შესაქმნელად“, - ამბობს ლექსი.

დღეს ის მიიჩნევს, რომ ბავშვობაში ფსიქოლოგიური პრობლემებისგან გამოჯანმრთელდა, მაგრამ ჯერ კიდევ უჭირს ჩვეულებრივი წესებით ცხოვრება და ეს ძალიან რთულია.

ცნობილი მუსიკოსი დევიდ ბოუი და ასევე ცნობილი მოდელი იმანი 1990 წელს შეხვდნენ ერთმანეთს და 24 წელი გაატარეს ერთად, ბოუის გარდაცვალებამდე.