ბავშვებში კანის პრობლემები საკმაოდ ხშირია. ქავილი, ჭინჭრის ციება, გამონაყარი ან ეგზემა ხშირად ალერგიასთან ასოცირდება, თუმცა ყოველთვის ასე არ არის. ზოგჯერ მსგავსი სიმპტომები ბავშვის ფსიქიკური მდგომარეობის რეაქციაც შეიძლება იყოს.
სპეციალისტები აღნიშნავენ, რომ ბავშვის ორგანიზმი ძალიან მგრძნობიარეა ემოციური გარემოს მიმართ. სტრესი, ოჯახში დაძაბულობა, ზედმეტი კონტროლი ან გადაჭარბებული ზრუნვა ხშირად სხეულის საშუალებით ვლინდება. ასეთ შემთხვევაში კანი ერთგვარ „ენად“ იქცევა, რომლის მეშვეობითაც ბავშვი საკუთარ შინაგან დაძაბულობას გამოხატავს.
ზოგჯერ ქავილი, ჭინჭრის ციება ან ეგზემა სწორედ ფსიქოსომატური რეაქციის შედეგია — ანუ მაშინ ჩნდება, როცა ორგანიზმში აშკარა ფიზიკური მიზეზი ვერ მოიძებნება. ასეთ შემთხვევებში კანის პრობლემები შეიძლება ბავშვის სამყაროსთან ურთიერთობის თავისებურ გზადაც იქცეს.
გარდა ამისა, ალერგიული რეაქციები გავლენას ახდენს ბავშვის ქცევაზეც. ისინი ხშირად უფრო მოუსვენრები ხდებიან, ადვილად ღიზიანდებიან, უჭირთ კონტაქტი და კონცენტრაცია. ეს კი მშობლებს ზოგჯერ სხვა პრობლემად ეჩვენებათ, თუმცა რეალურად ორგანიზმის რეაქციის ნაწილი შეიძლება იყოს.
თუ კანის პრობლემა ხშირად მეორდება და აშკარა ფიზიკური მიზეზი არ ჩანს, მნიშვნელოვანია მხოლოდ ფიზიკურ მკურნალობაზე არ შეჩერდეს ყურადღება. ასეთ დროს სასარგებლოა ოჯახური გარემოსა და ბავშვის ემოციური მდგომარეობის შეფასებაც.
პატარა ბავშვებთან მუშაობა ხშირად თამაშის ფორმით მიმდინარეობს. თამაშები და სუნთქვითი ვარჯიშები ბავშვს დაძაბულობის შემცირებაში და ემოციების გამოხატვაში ეხმარება. ამ პროცესში მშობლებისთვისაც მნიშვნელოვანია — მათ შესაძლებლობა ეძლევათ ის თემები გააცნობიერონ და განიხილონ, რომლებიც ოჯახში დიდი ხნის განმავლობაში უთქმელად რჩებოდა.
ბავშვის ჯანმრთელობა ხშირად მხოლოდ ფიზიკურ მდგომარეობას არ უკავშირდება. როცა ოჯახში მშვიდი გარემოა, ემოციები თავისუფლად გამოიხატება და ბავშვს უსაფრთხოების შეგრძნება აქვს, ბევრ შემთხვევაში კანის პრობლემებიც ნელ-ნელა მცირდება.
