რა შემთხვევაში ვერ შეძლებთ დაქორწინებას საქართველოში - წესები და დოკუმენტები - მშობლები

ქორწინების რეგისტრაციისათვის აუცილებელია, რომ დაქორწინების მსურველი პირები კანონით განსაზღვრული საქორწინო ასაკის იყვნენ და განცხადება წარადგინონ.

საქართველოში ქორწინების რეგისტრაცია 18 წლის ასაკიდანაა დასაშვები.

ქორწინების რეგისტრაცია უნდა განხორციელდეს ორი სრულწლოვანი, ქმედუნარიანი მოწმის თანდასწრებით. ამის შესახებ ინფორმაციას სახელმწიფო სერვისების განვითარების სააგენტოს ვებგვერდზე ვკითხულობთ:

ქორწინების რეგისტრაცია არ დაიშვება:

• იმ პირებს შორის, რომელთაგან თუნდაც ერთი დაქორწინებულია სხვაზე;
• პირდაპირი აღმავალი (დედა. მამა, ბებია,ბაბუა,დიდი ბებია/ბაბუა და ა.შ.))ან დამავალი შტოს (შვილი,შვილიშვილი,შვილთაშვილი და ა.შ.) ნათესავებს შორის;
• ბიოლოგიურ და არაბიოლოგიურ და-ძმას შორის;
• მშვილებელსა და ნაშვილებს შორის;
• იმ პირებს შორის, რომელთაგან თუნდაც ერთი მხარდაჭერის მიმღებია და რომლებსაც არ დაუდიათ საქართველოს სამოქალაქო კოდექსის 1172-ე მუხლის მე-2 ნაწილით გათვალისწინებული საქორწინო ხელშეკრულება.

ქორწინების რეგისტრაციისათვის აუცილებელი საბუთები, რომელთა გარეშეც ასევე ვერ დაქორწინებით:

• დასაქორწინებელ პირთა ერთობლივი წერილობითი განცხადება;
• დასაქორწინებელ პირთა/მოწმეების პირადობის დამადასტურებელი დოკუმენტები;
• თუ დაქორწინების მსურველი პირი ადრე იმყოფებოდა ქორწინებაში, წინა ქორწინების შეწყვეტის დამადასტურებელი საბუთი;
• თუ განცხადებას წარადგენს დაქორწინების მსურველი პირის წარმომადგენელი – წარმომადგენლობითი უფლებამოსილების და წარმომადგენლის პირადობის დამადასტურებელი დოკუმენტი.

თუ ქორწინების რეგისტრაციის მსურველი პირი/მოწმე უცხო ქვეყნის მოქალაქეა, სააგენტო უფლებამოსილია, მიიღოს უცხო ქვეყნის მოქალაქის პასპორტი ქართულენოვანი თარგმანის გარეშე, თუ იგი შეიცავს უცხოელის პერსონალურ მონაცემებს ლათინური ტრანსლიტერაციით.

სხვა სახელმწიფოში გაცემული (დამოწმებული) დოკუმენტი (გარდა საიდენტიფიკაციო დოკუმენტისა) უნდა წარდგენილ იქნეს სათანადო წესით ლეგალიზაციის ან აპოსტილით დამოწმების შემდეგ, სანოტარო წესით დამოწმებული ქართული თარგმანით.

უცხო ქვეყნის მოქალაქემ საქართველოში ქორწინების რეგისტრაციისთვის უნდა წარმოადგინოს საქართველოში კანონიერი საფუძვლით ყოფნის დამადასტურებელი საბუთი.

ქორწინების რეგისტრაცია სახელმწიფო სერვისების განვითარების სააგენტოს ტერიტორიულ სამსახურებში და იუსტიციის სახლის ფილიალში,სპეციალური სარიტუალო მომსახურების გარეშე, არის უფასო.

ვრცლად ინფორმაციას შეგიძლიათ, სახელმწიფო სერვისების განვითარების სააგენტოს ვებგვერდზე ნახოთ.

რა ღირს პირადობის მოწმობის, პასპორტის აღება და ასევე, დაბადების, გარდაცვალებისა და ქორწინების რეგისტრაცია