გოგონას ახლობლები ექიმებს ადანაშაულებენ გაგუას კლინიკაში ახალნამშობიარები გოგონას, ნინო მათიაშვილის გარდაცვალებას დიდი გამოხმაურება მოჰყვა. მისი ახლობლები ექიმებს ადანაშაულებენ (იხილეთ სტატია).
როგორც მისი მეგობრების მიერ ფეისბუქზე გავრცელებული პოსტით ვგებულობთ, ნინომ მოასწრო გარდაცვალებამდე შვილის ნახვა და მისთვის უკანასკნელი სიტყვების თქმა:
"შენ არ იცი, როგორ გელოდებოდი" - ეს სიტყვები უთხრა ნინიკომ თავის პატარა გოგოს, რომელიც სულ რამდენიმე წამი დააწვინეს გულზე. ნინიკო მათიაშვილი 29 წლის იყო, აბსოლუტურად ჯანმრთელი. იგი ორსულობის მთელი 9 თვე ზედმიწევნით ასრულებდა გინეკოლოგის (გაგუას კლინიკის) ყველა მითითებას. მშობიარობამდე რამდენიმე კვირით ადრე მიმართა თავად დავით გაგუას, რომელსაც იგი უნდა ემშობიარებინა. 30 აპრილს იმშობიარა. მშობიარობას დაესწრო მისი მეუღლეც...
ბატონმა დავით გაგუამ ახლობლებს გამოუცხადა, რომ მშობიარობამ კარგად ჩაიარა და ნინო თავს კარგად გრძნობდა. ნახევარი საათის შემდეგ კი ბლოკში არავინ შეუშვეს. ნინიკოს სისხლდენა დაეწყო, რომლის შეჩერებასაც დავით გაგუამ 3 საათზე მეტი მოანდომა.
ჩვენ, ოჯახის წევრები, ეჭვქვეშ ვაყენებთ დავით გაგუას პროფესიონალიზმს, რადგან მან (აყვანილმა ექიმმა) არ იცოდა თავისი პაციენტის შესახებ ელემენტარული მონაცემები, სათანადოდ ვერ შეაფასა მდგომარეობა, ვერ მიიღო ადეკვატური გადაწყვეტილებები მყისიერად და ამაყობდა იმით, რომ საშვილოსნო შეუნარჩუნა ახალგაზრდა ქალს, რომელსაც სიცოცხლე და დედობა წაართვა".