გვანცა კარგი მოსწავლე იყო, ძიუდოს ჩემპიონი, უკონფლიქტო... მოზარდებში ბოლო დროს საკმაოდ იმრავლა სუიციდების შემთხვევებმა და ტრაგედიაა, რომ საუკეთესო ახალგაზრდებს ვკარგავთ სრულიად გაუგებარი მიზეზებით. მიზეზები სხვადასხვაა - სექტები, კომპიუტერული თამაშები, ბულინგი, კონფლიქტი მშობლებთან, უპასუხო სიყვარული... თუმცა ფაქტი ერთია - მოზარდები სულ უფრო ხშირად იღებენ ამ საზარელ გადაწყვეტილებას და სიცოცხლეს თვითმკვლელობით ასრულებენ. ალბათ დროა, მართლაც განგაშის ზარები შემოიკრას და ყველამ - მშობლებმა, მასწავლებლებმა, ფსიქოლოგებმა გაასმაგებული ყურადღება გამოიჩინონ მოზარდების, მათი პრობლემების, განცდების, ინტერესების მიმართ...
ამჯერად სუციდის შემთხვევა ყვარელში მოხდა. გვანცა სირაძე ყვარლის რაიონში, სოფელ ახალსოფელში ცხოვრობდა და მეათე კლასის მოსწავლე იყო. ადგილობრივების განცხადებით, იგი ბაბუამ დღეს დილით საკუთარ ეზოში, კაკლის ხეზე, ზეწრით ჩამომხრჩვალი იპოვა...
თანასოფლელებს არ აქვთ ვერსიები და ძალიან უჭირთ თვითმკვლელობის დეტალებზე საუბარი. მათი ინფორმაციით, გოგონა ზრდილობიანი, უკონფლიქტო, მხიარული, ლაღი იყო. კარგად სწავლობდა, დაკავებული იყო სპორტით - ძიუდოში ჩემპიონობაც ჰქონდა მოპოვებული თავის წონით კატეგორიაში. დადებითად ახასიათებენ გვანცას ოჯახის წევრებსაც და ამბობენ, რომ განსაკუთრებული დამოკიდებულება ჰქონდათ ერთმანეთთან.
გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.
ასევე იხილეთ: თამაში, რომელიც თვითმკვლელობით მთავრდება - არიან თუ არა საქართველოში მისი მსხვერპლნი