სად შეიძლება წაიყვანოთ დღეს ბავშვი - 1 ივნისის აფიშა - მშობლები

ბავშვთა დაცვის დღეს ქალაქის რამდენიმე ადგილას იგეგმება ღონისძიებები, მათ შორის - უფასო პროგრამებითაც ბავშვთა დაცვის დღეს ქალაქის რამდენიმე ადგილას იგეგმება ღონისძიებები, მათ შორის - უფასო პროგრამებითაც. სად შეიძლება წაიყვანოთ ბავშვი ამ დღეს? ქალაქის რაიონების მიხედვით მცირე თუ დიდი ღონისძიებები თითქმის ყველგან ეწყობა, ასევე ცენტრალურ სკვერებსა და საბავშვო დაწესებულებებში იგეგმება სხვადასხვა აქტივობა:

"მზიურში" ტრადიციულად ამ დღეს, მზის ფესტივალია, რომელზეც ბავშვები სხვადასხვა აქტივობაში მიიღებენ მონაწილეობას, მათ შორის, თეატრალიზებულ წარმოდგენაში - 13:00–18:00 საათი.

მთაწმინდის პარკში, რასაკვირველია, ბავშვთა დაცვის დღეს ასევე ტრადიციულად აღნიშნავენ. ღონისძიებები 11 საათიდან 21 საათამდე გრძელდება (იხილეთ დაწვრილებით).

ვაკის პარკში შუმბალენდის გასართობი ღონისძიებებია, ბავშვთა კონცერტით, ანიმატორებით და სხვა აქტივობებით - დილიდან მთელი დღის განმავლობაში.

"ბასტი ბუბუ" საიუბილეო კონცერტს სთავაზობს პატარებს - "ბასტი ბუბუ და ვარსკვლავები". კონცერტი ფილარმონიაში 19:00 საათზე იწყება (იხილეთ უფრო დაწვრილებით ამ კონცერტის შესახებ).

თბილისის ზოოპარკშიც დაგეგმილია საინტერესო აქტივობა - ინდიელობანა, რომელიც 13:00 საათზე იწყება და 19:00 საათამდე გასტანს.

"ისთ ფოინთის" გასართობი ცენტრი 17:00 საათიდან მასპინძლობს ბავშვებს სხვადასხვა მრავალფეროვანი პროგრამით, მათ შორის, ატრაქციონებით და შოუებით (იხილეთ უფრო დაწვრილებით).

ნ. დუმბაძის სახელობის მოზარდ მაყურებელთა თეატრში ასევე იგეგმება საბავშვო წარმოდგენები. ბავშვებისთვის წარმოადგენენ სპექტაკლებს "მაუგლი", "ნაცარქექია" და "შვლის ნუკრის ნაამბობი".

"თბილისი მოლში" ასევე დილიდან იწყება გასართობი პროგრამა, კონტაქტური ზოოპარკით, თოჯინების თეატრის წარმოდგენით და კონცერტით.

კინოთეატრებში ასევე წარმოდგენილი იქნება საბავშვო ფილმები და მულტფილმები, ხოლო ბავშვების საყვარელ "ვენდისსა" და "მაკდონალდსში" ასევე გეგმავენ სხვადასხვა აქტივობას პატარებისთვის.

განსაკუთრებული პროგრამა აქვს "ბიბლუსი ქიდსს". ბიბლუსი kids-ი 2 წლის ხდება და 1 ივნისს, 12:00-დან 18:00 საათამდე ნებისმიერ მონაკვეთში, ყველა მშობელს და ყველა პატარას ეპატიჟება დაბადების დღეზე! მთელი დღის განმავლობაში სტუმრობა უფასო იქნება.

ასევე იგეგმება ღონისძიებები სხვადასხვა ქალაქში:

ქუთაისის მერია ბავშვთა დაცვის დღისადმი მიძღვნილი ღონისძიებების პროგრამას აქვეყნებს.

- დღის განმავლობაში გაბაშვილის პარკში საბავშვო ატრაქციონები უფასო იქნება

- 11:00 სთ- დღის განმავლობაში - საბავშვო ატრაქციონები - ოპერის თეატრის გვერდით და საათთან

- 12:00 „მხიარული სტარტები“ საბავშვო ბაღის აღსაზრდელებისათვის - სპორტის სასახლე

- 16:00 „მოსწავლეთა შემოქმედებითი ოლიმპიადა-2017“ დასკვნითი ტური -- დასწრება თავისუფალია - ლ.მესხიშვილის სახელობის პროფესიული სახელმწიფო დრამატული თეატრი.

- 16:00 კომპოზიტორ ნუკრი კარკაძის და ააიპ კულტურულ სახელოვნებო დაწესებულებათა გაერთიანების საბავშვო სიმღერების კონცერტი. - კულტურის ცენტრში

- 17:00 სთ - 5 კმ გარბენი საჯარო სკოლის მოსწავლეებისათვის - „სიცოცხლე-მოძრაობაა!!!“ - ავტოქარხნის ხიდიდან ცენტრალურ მოედნამდე.

- 14:00 სთ ნიკო ნიკოლაძის სახელობის სკოლა ლიცეუმის მოსწავლეთა ნამუშევრების გამოფენა - დ. კაკაბაძის სახელობის სახვითი ხელოვნების გალერეაში.

- 12:00 - სპექტაკლი „გულადი ფისო“- თოჯინების თეატრში

- 19:00- სთ ბავშვთა საერთაშორისო დღისადმი მიძღვნილი ფიგურული ციგურაობის საჩვენებელი წარმოდგენა - ყინულის მოედანზე.

ბათუმში:

ბათუმში ძირითადი ლოკაცია 6 მაისის პარკი და ბულვარში კოლონადების მიმდებარე ტერიტორია იქნება.

დილიდან პატარების განწყობაზე ზღაპრის გმირები, ანიმატორები, ჟონგლიორები და საბავშვო სტუდიების აღსაზრდელები იზრუნებენ. პატარებს ნაყინები და ბუშტები უფასოდ დაურიგდებათ.

ასევე ბათუმის ბულვარის ადმინისტრაცია ბავშვებს სიურპრიზს ჰპირდება. გასართობი პროგრამები ბულვარში სამის ნახევრიდან, ხოლო 6 მაისის პარკში 12 საათიდან დაიწყება და საღამოს რვა საათამდე გაგრძელდება.

ასევე დაგეგმილია ღონისძიებები გორში, თელავში და რამდენიმე სხვა ქალაქში.

ამ ლამაზი დღის კარგად და ხალისიანად გატარებას გისურვებთ ყველას!