დატოვა უზარმაზარი სიყვარული და მოტივაცია სხვა ახალგაზრდებისთვის, რომ თუ მოინდომებ, ცხოვრებაში ყველაფერი მიღწევადია... ეს საკმაოდ წარმატებული ახალგაზრდა ბიჭი რამდენიმე თვის წინ გარდაიცვალა და მეგობრებს დიდი ტკივილი დაუტოვა. ერთ-ერთმა მეგობარმა მიუძღვნა ეს პოსტი:
"გიორგი მარგიანი იყო ბიჭი, რომელიც პირველ რიგში, საკუთარი ადამიანობითა და ღირებულებებით გამოირჩეოდა ყველასგან. სამართლიანი, სწორედ ეს სიტყვა შეეფერება გიორგის ხასიათს - ბავშვობიდან ძალადობის წინააღმდეგ იბრძოდა.
ჭკვიანი, ნიჭიერი და ენთუზიაზმით სავსე რომ იყო, იმ წარმატებებით დაამტკიცა, რასაც მხოლოდ საკუთარი მიზანდასახულობით, დამოუკიდებლად მიაღწია...
2006 წელს ერთიანი ეროვნული გამოცდებით თბილისის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტზე ჩააბარა, საიდანაც 1 წელში სწავლა ამავე უნივერსიტეტის იურიდიულ ფაკულტეტზე განაგრძო და წარჩინებით დაამთავრა კიდეც.
მოგვიანებით ივანე ჯავახიშვილის სახელობის თბილისის სახელმწიფო უნივერსიტეტისა და გერმანიის ქ. შპაიერის ადმინისტრაციული უნივერსიტეტის ერთობლივი პროგრამის "საჯარო მმართველობა" მაგისტრი გახდა.
2015 წელს ნორვეგიის მთავრობის სტიპენდია მოიპოვა და ოსლოს უნივერსიტეტში საერთაშორისო საჯარო სამართლის სამაგისტრო პროგრამაზე ჩაირიცხა.
გარდა იმისა, რომ აქტიური სტუდენტი, მონაწილეობდა სხვადასხვა საერთაშორისო და ეროვნულ პროცესში, კონფერენციებსა თუ დებატებში.
იუსტიციის სამინისტროში კარიერა 2013 წლის მაისში დაიწყო, აქტიურად იყო ჩართული ნარკომანიასთან ბრძოლისა და ნარკოპოლიტიკის განვითარების მიმართულებაში.
...2015 წლის ოქტომბერში, როდესაც გიორგი ნორვეგიაში სასწავლებლად იმყოფებოდა, მელანომა დაუდგინდა. მიუხედავად დაავადების სიმძიმისა, ნათესავებს, ოჯახის წევრებს, მეგობრებს გვეუბნებოდა, რომ ღირსეულად გადაგვეტანა ეს ყველაფერი. იბრძოდა ბოლო წუთამდე, მაგრამ მცდელობა უშედეგო აღმოჩნდა...
ალბათ, გავა წლები, ბევრი რამ შეიცვლება და დავიწყებას მიეცემა, მაგრამ გიორგი ყველას ემახსოვრება, როგორც ბიჭი, რომელმაც საკუთარი მოკლე ცხოვრების განმავლობაში, არც ერთი წუთი არ დაკარგა ფუჭად. დატოვა უზარმაზარი სიყვარული და მოტივაცია სხვა ახალგაზრდებისთვის, რომ თუ მოინდომებ, ცხოვრებაში ყველაფერი მიღწევადია".
თეონა გურგულიანი