"ბავშვს რომ ვერ მოუვლის, მით უმეტეს გაჭირვების დროს... რაში გჭირდება ასეთი ქმარი, მარტო დედა რომ გაგინოს?" სერიალ "ჩემი ცოლის დაქალების" სხვადასხვა ეპიზოდი საკმაოდ აქტუალური და განსჯის საგანი ხდება მაყურებლებს შორის. განსაკუთრებით, როდესაც ოჯახურ თემებს ეხება. ამჯერად დიდი გამოხმაურება მოჰყვა კვირის სერიას, რომელშიც გიორგი ბოჭორიშვილის მიერ განსახიერებული პერსონაჟის - ზაზას, ოჯახის წევრები ავარიაში მოყვნენ და მას უწევს პატარა შვილზე ზრუნვა... ზაზას გმირს ისედაც არ სწყალობდა მაყურებელი, ოჯახისადმი მეტისმეტი ინერტულობის, ცოლისა და ზოგადად ქალების მიმართ გამოვლენილი უხეშობისა და ზედმეტად "აზიატური" შეხედულებების გამო, თუმცა ამ სერიაში მისმა თვისებებმა მაინც გადააჭარბა მოლოდინს - ავარიაში მოყვა მთელი ოჯახი და ის მხოლოდ იმაზე დარდობს, თავად რა ეშველება ამ დღეებში, როცა სახლში არავინ იქნება და არც მას მიხედავენ და არც მის შვილს... არ იცის, როგორ იძინებს მისი საკუთარი შვილი, რა აცვია ღამით, ჭამს თუ არა ძილის წინ... და ბოლოს, შუა ღამისას ფეხბურთის საყურებლად სვამს, რომ ზღაპარი არ მოუყვეს...
ამ ქცევამ შესაბამისი კომენტარებიც დაიმსახურა მაყურებლების მხრიდან. ბევრმა აღიარა, რომ სამწუხაროდ ამგვარი მამები ბლომად არიან მათ გვერდით:
"ღმერთო, ყველას აშორე ასეთი მამა!"
"ფეხებზე მკიდია კაცი, როგორც ასეთი..."
"ყველაზე ცუდი როლი აქვს ამ მსახიობს და ვისაც ასეთი კაცი ჰყავს გვერდით, რა საცოდავია..."
"ამ სიტუაციაშიც თავის თავზე ფიქრობს..."
"ჭამა და ბანაობა დავიკიდოთო - ეს რანაირი მამაა! ნათელი წერტილი - "ფუტბოლი"...
"დედების ბრალია, ასეთი კაცები რომ იზრდებიან! მამები შვილებს არ ზრდიან. გაზარდეთ ბიჭები ადამიანებად და აღარ გექნებათ სანერვიულო, გოგოს როგორი ქმარი შეხვდება. თუ არადა, ხომ უძლებთ ძალადობას და თქვენი გოგოც ამას გამოსცდის".
"ფუუუუ, უსუსური, უნიათო, ამჩემფეხება, სუსტიმ ვითომ მამა, ვითომ ქმარი, მშიშარა, მხდალი... ბავშვს რომ ვერ მოუვლის, მით უმეტეს, გაჭირვების დროს... რაში გჭირდება ასეთი ქმარი, მარტო დედა რომ გაგინოს?"