აღელვებული მშობლის წერილი რედაქციას ამ ქალბატონმა, რომელიც ჩვენი მკითხველია, აღელვებულმა მოგვწერა. როგორც ჩანს, ეიფორია არ ჩაცხრა და ბავშვების გარკვეული ნაწილი სარგებლობს "ლურჯი ვეშაპის" გარშემო ატეხილი აჟიოტაჟით ან მართლაც ჩართულია ამ სახიფათო თამაშში. ჩვენი მკითხველის წერილს უცვლელად გთავაზობთ:
"გამარჯობა.
მინდა ერთი ფაქტის შესახებ გიამბოთ, რომელსაც დღეს შევესწარი.
ეზოში ბავშვები ჩავიყვანე (7-6 წლისები). იქვე 8-10 წლის ბავშვები თამაშობდნენ, ერთი განსაკუთრებით აქტიური იყო და ცოტა გაუგონარიც. ბავშვებს საქანელაზე ისე აქანავებდა, სანამ ძალიან ხმამაღლა და მკაცრი ტონით არ ვუთხარი, "დაანებე თავი, ნუღარ აქანავებ-თქო", არ გაჩერდა... ძალიან არ მომეწონა, თან უმეტესად მარტო უშვებენ ეზოში ბავშვებს.
ცოტა ხანში ჩემს შვილებს ჰკითხა, ძალიან ამაყი ტონით: "ლურჯ ვეშაპს" თამაშობთ?"
ჩემები ვერც მიხვდნენ და გაიკვირვეს.
მე ვთამაშობო, და უცებ დავაკვირდი: ხელზე, მაჯაზე ნაკაწრები დავინახე და ვუთხარი, ხელზე ნაკაწრებიც გქონია-მეთქი,დიახ, მადლობაო...
ბავშვები სწრაფად გამოვიყვანე. ალბათ არც იციან მშობლებმა ამის შესახებ და შეიძლება ეუბნება, ეზოში გავიკაწრეო...
მშობლებო! დროა შვილებს ვუკონტროლოთ კომპიუტერთან გატარებული დრო და ვიცოდეთ, რითი იქცევენ თავს ისინი..."
ასევე იხილეთ: შსს თამაშ "ლურჯი ვეშაპის" შესახებ განცხადებას ავრცელებს