ცნობილმა ჟურნალისტმა საზოგადოებას იმ ახალგაზრდის ნაამბობი გააცნო, რომელიც მშენებლობაზე მშენებლის დაღუპვას შეესწრო
ცნობილმა ჟურნალისტმა თინათინ მოსიაშვილმა საზოგადოებას ერთი ახალგაზრდის ნაამბობი გააცნო, რომელიც სწავლის საფასურის დასაფარად მშენებლობაზე მუშაობს და ცოტა ხნის წინ ცნობილი ინციდენტს, მშენებლის დაღუპვას შეესწრო. გთავაზობთ ამ პოსტს:
"ორი დღის წინ გიგას ამბავი გავაზიარე, სამსახურს ეძებდა, უნივერსიტეტში თავისი სწავლის საფასური რომ დაფაროს.
მშენებლობაზე დაიწყო მუშაობა, წეღან მომწერა და მისი ნებართვით ვაზიარებ ამ წერილს, შესწრებია, როგორ დაიღუპა მშენებლობაზე მშენებელი.
„გამარჯობა თინათინ.
ეს ორი დღეა დაკარგული ვარ. აქ შემოსვლას ვეღარ ვახერხებდი, მშენებლობაზე გავედი გუშინ სამუშაოდ და გვიან მივდივარ სახლში. დღეს ცუდი ამბავი მოხდა :ერთი კაცი დაიყოლა კედელმა. ტელევიზორშიც იქნებოდა, საწყალი რომ ამოჰყავდათ, ხალხს ვეუბნებოდი, ფრთხილად, არ გაანძრიოთ, რამე არ მოატეხოთ ან სისხლჩაქცევა არ ჰქონოდეს - მეთქი, მაგრამ უკვე დაღუპული იყო. დანარჩენები გადარჩნენ. მთელი დღეა სწავლის საფასურზე კი არა, ამ კაცზე ვფიქრობ, თვალები აღარ ჰქონდა, მოკლეთ ამ საკითხს აღარ გავაგრძელებ ძნელი მოსასმენია....
საღამოს გადავაგზავნი CV - ის, სადაც მომნიშნე"
გარდაცვლილზე ვკითხე და...
„ჩვენი ობიექტიდან ორ ნაბიჯში მოხდა. ქალებმა დაგვიძახეს, კედელმა ხალხი მოიყოლაო. ეგრევე გავარდით და ამოვიყვანეთ. ძალიან შემეცოდა, მე ჯერ კიდევ ცოცხალი მეგონა. საერთოდ საქართველოში დიდი პრობლემაა მშენებლობაზე წესების დაცვის მხრივ: ჯერ ამ სიცხეშიც კი არ შეიძლება მუშაობა 2 სთ ზე მეტხანს, ბევრ კალორიას კარგავს ზოგადად მუშა და პანტაპუნტით იღუპებიან. ევროპას გაიძახიან და ჰუმანურობა არ აქვთ. რა ევროკავშირზეა საუბარი სადაც ელემენტარული შრომის ბაზარი გაპარტახებულია"
მოკრძალებულად ვიკითხე, ამ მძიმე პირობების ფონზე, როგორია მუშების ანაზრაურება და
„დილის 9 საათზე იწყება მუშაობა და საღამოს 7 სთზე სრულდება შესვენება მხოლოდ ერთი საათია, მაგრამ დანარჩენი დრო სულ უნდა იმუშაო ფიზიკურად, მხოლოდ მზეზე რომ იდგე ამდენი ხანი მარტო ამით გაითიშები დღეში დაახლოებით 7 ლიტრამდე წყალს ვსვავ ანაზღაურებას კიდევ რაც შეეხება 30 ლარია დღიურად, მაგრამ თანხა მაშინ ირიცხება, როცა სართულის მთლიან სამუშაოებს შეასრულებ და სანამ მეორე სართულზე გადახვალ ეს ამას კი დაახლოებით 17-20 დღე უნდა ძალიან ბევრ კალორიას წვავენ ვინც ასეთ სამუშაოზე მუშაობენ და ამიტომ არის ყველაზე სახიფათო სამუშაო"...
***
გიგას მდგომარეობაში დღეს ბევრი სტუდენტია, რომელიც მატერიალური პრობლემების გამო მძიმე სამუშაოსგან უკან არ იხევს. ისეთი რთული საქმე, როგორიც თუნდაც მშენებლობაა, დაგვეტანხმებით, მეტ გამოცდილებას და სიფრთხილეს მოითხოვს. გამოუცდელი ახალგაზრდისთვის კი ასეთი საქმე უფრო სარისკო ხდება... არადა სტუდენტს, რომლის მთავარი საფიქრალი ცოდნის შეძენა უნდა იყოს, სულ სხვანაირი ხელშეწყობა სჭირდება, დამსაქმებლებისგან მეტი თანადგომა და სახელმწიფოსგან მეტი მხარდაჭერა. პროფესიონალიზმი, რასაც ასე დაჟინებით ვითხოვთ ყველა სფეროში, სწორედ სტუდენტობიდან იწყება. ..