მუსიკოსი, ხმის რეჟისორი, 4 შვილის მამა ნუკრი რუხაძე მოულოდნელად გარდაიცვალა მოულოდნელად გარდაიცვალა მუსიკოსი, ხმის რეჟისორი, 4 შვილის მამა ნუკრი რუხაძე, რომელსაც ბევრი ქართველი მომღერლის სიმღერის შექმნასა და ჩაწერაში აქვს წვლილი შეტანილი, თავადაც შესანიშნავად მღეროდა. ოჯახის წევრები, ახლობლები, კოლეგები მწუხარებას გამოთქვამენ ამ ფაქტის გამო. რამდენიმე მომღერლის კომენტარს გთავაზობთ:
გია სურამელაშვილი: ნათელში გამყოფოს ღმერთმა, ჩემო მეგობარო... საშინლად მებრალები, ჩემო ნუკრი!
ბორის შხიანი: უნიჭიერესი კაცი, მეგობარი...
ჯაბა მესტვირიშვილი: არ ვიცი, ნუკრის ამბავმა თავზარი დამცა... ყველასათვის საყვარელი ადამიანი, მაგარი კაცი, მაგარი მუსიკოსი, კარგი ოჯახიშვილი, დიდთან - დიდი, პატარასთან - პატარა... არ არსებობს ადამიანი, ვინც მას იცნობდა, რომ პატივისცემით არ ყოფილიყო მის მიმართ გამსჭვალული... ძალიან გული დამწყდა, ჩემო ნუკრი, არა მარტო მე, ყველას დაგვაკლდი. ყველა ისე განვიცდით ამ ტკივილს და ყველა დამწუხრებულია შენი ამბით... ღმერთმა საუკუნე სასუფეველი არ მოაკლოს შენს სულს, ჩემი ძმაო.
აჩი ფურცელაძე: ჩემი, ჩემი ოჯახის, ჩემი მეგობრების, ჩემი კოლეგების სიხარული, სიყვარული და საამაყო ადამიანი... იყო?! აი ამ "იყო”-ს - ამ ფაქტორის არსებობის აღქმა არ მინდა, ვერ... შეუძლებელია ჯერ... და კიდევ დიდი ხანი ასე იქნება. თუმცა... გასაგებია ის, რომ სანამ არის, არსებობს მისი სიმღერები, მისი არანჟირებებები და მისი ბექვოკალები, ის სულ ცოცხალი იქნება, დარჩება. და მაინც... მაგრამ ფაქტია, რომ ფიზიკურად ეს ძალიან მაგარი, ჯიგარი, უნიჭიერესი კაცი აღარ არის. აღარ ჰყავს თავის ოჯახს, ჩვენ - აღარ... ნუკრი, გაანათლოს შენი სული უფალმა... ძალიან მატკინე გული, ძმაო, ძალიან...