NASA-ში გაგზავნილმა 9 წლის ბიჭის წერილმა სოციალური ქსელი დაიპყრო - მშობლები

"მართალია, ჯერ მხოლოდ 9 წლის ვარ, მაგრამ ვთვლი, რომ სავსებით კარგად გავართმევ თავს დაკისრებულ მოვალეობას..." აშშ-ის ნაციონალურმა აეროკოსმოსურმა სააგენტომ (ნასა-მ) ვაკანსია გამოაცხადა. 9 წლის ჯეკ დევისმა გადაწყვიტა, რომ მისი კანდიდატურა სწორედ ზედგამოჭრილი იყო ამ პოზიციისთვის.

ჯეკის უბრალო, ფანქრით დაწერილი წერილი მისი მშობლების მეგობარმა გამოაქვეყნა ფეისბუქზე. იგი დაბეჯითებით უმტკიცებს ხელმძღვანელობას, თუ რატომ უნდა აიყვანონ სწორედ ის „პლანეტის მცველის“ კანდიდატურაზე:

«ძვირფასო NASA. მე მქვია ჯეკ დევისი და მინდა, რომ დამნიშნოთ პლანეტის მცველ ოფიცრად. მართალია, ჯერ მხოლოდ 9 წლის ვარ, მაგრამ ვთვლი, რომ სავსებით კარგად გავართმევ თავს დაკისრებულ მოვალეობას. ერთ-ერთი მიზეზი არის ჩემი დის ნათქვამი - შენ სხვა პლანეტიდან ხარ! თითქმის ყველა ფილმს ვუყურე კოსმოსსა და უცხოპლანეტელებზე. ასევე ვუყურე სერიალ „Marvel“-ს. ახლა გეგმაში მაქვს ვნახო ფილმი - „ადამიანები შავებში“. პირველობას არ ვუთმობ არავის ვიდეოთამაშებში. ვარ ახალგაზრდა და შემიძლია უცხოპლანეტელივით აზროვნება“.

წერილის ბოლოს მოაწერა ხელი: “გალაქტიკის მცველი“.

პოსტმა დიდი გამოხმაურება გამოიწვია, უამრავი დადებითი კომენტარი. „ვაკანსიის მაძიებელმა ძალიან ლაკონურად და გასაგებად გადმოსცა თავისი სათქმელი. სიამოვნებით მოვიწვევდი ინტერვიუზე“, - დაწერა ერთ-ერთმა კომენტატორმა.

"პლანეტის მცველის" ვაკანსიის დედლაინი 16 აგვისტოა. ვისაც შეარჩევენ, უნდა იყოს ა.შ.შ-ის მოქალაქე. მისი ხელფასი იქნება 124 000-დან 187 000 დოლარამდე წელიწადში. მის მოვალეობაში შევა დედამიწის დაცვა უცხოპლანეტელებისგან. ხოლო რაკი ეს ჯერ არ მომხდარა, მანამდე მან თვალყური უნდა ადევნოს იმას, რომ არ მოხდეს დედამიწიდან სხვა პლანეტების დაბინძურება და დაზიანება.

ბიჭს NASA-ს პლანეტების დეპარტამენტის დირექტორმა უპასუხა და გამოთქვა იმედი, რომ ჯეკი კარგად ისწავლის და როცა გაიზრდება, ისინი ერთმანეთს NASA-ში შეხვდებიან.