ბორჯომის ხეობაში მეორე დღეა ებრძვიან ხანძარს ხანძრის კერამ, რომელიც სოფელ დაბას მხარეს ფერდობზე იყო გაჩენილი, სოფლისკენ ჩამოიწია. როგორც სამცხე-ჯავახეთის გუბერნატორი, აკაკი მაჭუტაძე აცხადებს, ცეცხლის სოფელზე გავრცელების ალბათობა არ არსებობს.
ამჟამად ვერტმფრენი სწორედ აღნიშნულ ფერდობზე ახორციელებს ცეცხლის სალიკვიდაციო სამუშაოებს.
დღის პირველ ნახევარში, აღნიშნულ ფერდობზე მხოლოდ დაკვამლიანება შეინიშნებოდა, თუმცა ძლიერი ქარის გამო კვამლთან ერთად ფერდობზე უკვე ცეცხლის კერებიც არის.
სინოპტიკოსების პროგნოზით, ბორჯომში ქარი ხვალ დილამდე შენარჩუნდება. როგორც "ინტერპრესნიუსს" გარემოს ეროვნულ სააგენტოში განუცხადეს, ამჟამად ბორჯომში ქარის სიჩქარე 5 მ/წ-ს შეადგენს.
"ახლა ქარის სიჩქარე არის 5 მ/წ, რაც ღამითაც შენარჩუნდება და ხვალ დილისთვის ვვარაუდობთ, რომ დაიკლებს. ხვალ, 10:00 საათიდან ქარის სიჩქარე ნაკლები იქნება. მომატებით ნამდვილად არ მოიმატებს", - განაცხადა გარემოს ეროვნული სააგენტოს წარმომადგენელმა თამარ გულედანმა.
ბორჯომის ტყეში გაჩენილი ხანძარი ლოკალიზებული იყო, თუმცა ქარის ამოვარდნის გამო, დაბის მხარეს ხანძრის კერები ხელახლა წარმოიშვა.
ინტერპრესნიუსი