"არ ვიცი, როგორ უნდა მივიდეთ სამძიმარზე"... - ტრაგედია ბოლქვაძეებისა და ქობულაძეების ოჯახებში - მშობლები

ერთდროულად ორი ოჯახი გაუბედურდა... 5 გარდაცვლილს შორის არიან და-ძმა და ცოლ-ქმარი შვილით გურიაში, სოფელ ჩიბათთან, გამთენიისას მომხდარმა კიდევ ერთმა ავარიამ შეძრა საზოგადოება. თბილისიდან ბათუმის მიმართულებით მოძრავ ტრაილერს მისაბმელი მოძვრა და საპირისპირო მიმართულებით - ბათუმიდან თბილისისკენ მიმავალ მსუბუქ ავტომობილს დაეჯახა. მანქანაში მსხდომი ადამიანებიდან 5 გარდაიცვალა, ერთი - ხანდაზმული მამაკაცი მძიმედ არის.

როგორც ოჯახის ახლობლები mshoblebi.ge-სთან საუბრისას ამბობენ, გია ბოლქვაძის ოჯახი ბათუმიდან თბილისში სამკურნალოდ მიდიოდა. ახალგაზრდა ცოლ-ქმარს 6 წლის ბავშვი ექიმთან უნდა მიეყვანა. გარდა ამისა, როგორც ახლობლები ამბობენ, ასმათი ორსულად იყო და ექიმთან მასაც უნდოდა მისვლა - მეოთხე შვილს ელოდა...

გია და ასმათ ბოლქვაძეებს ბავშვის გარდა თან ახლდათ ასმათის ძმა - იმედა, და გიას დედა. ხუთივე ადგილზე გარდაიცვალა...

გიასა და ასმათს ორი მცირეწლოვანი შვილი დარჩათ, იმედას ჯერ ცოლ-შვილი არ ჰყავდა - შემოდგომაზე აპირებდა ოჯახის შექმნას...

ოჯახის ახლობლებს უჭირთ ამ ტრაგედიაზე საუბარი. ამბობენ, რომ არც კი იციან, როგორ უნდა მივიდნენ სამძიმარზე. ორი ოჯახი გაუბედურდა და კიდევ და კიდევ, საქართველოს გზებზე არსებული განუკითხაობის გამო - გაუმართავ ავტომანქანებს და სიჩქარის გადაჭარბებას კიდევ რამდენი ადამიანი უნდა ემსხვერპლოს და როდის უნდა მოეღოს ბოლო ამ ტრაგედიებს - ამაზე პასუხი არავის აქვს...

ასევე იხილეთ: ყოველთვის, როცა სიჩქარეს მოუმატებთ, შვილები გაიხსენეთ