ხშირია მსგავსი შემთხვევები და იცოდეთ უსაფრთხოების წესები მეტროსადგურ "მარჯანიშვილის" ესკალატორში 6 წლის ბავშვს ფეხი მოყვა მეტროსადგურ "მარჯანიშვილის" ესკალატორში 6 წლის ბავშვს ფეხი მოყვა, რის შედეგადაც მან დაზიანებები მიიღო, - ამის შესახებ "ინტერპრესნიუსს" თბილისის მეტროპოლიტენის პრესსამსახურში განუცხადეს.
მათივე ინფორმაციით, შემთხვევა იმ დროს მოხდა, როდესაც მოზარდი მშობელს და ბებიას ექსკალატორზე აჰყავდა.
ბავშვი ამ დროისთვის ინგოროყვას სახელობის კლინიკაშია გადაყვანილი. მისი ჯანმრთელობის მდგომარეობა დამაკმაყოფილებელია.
მსგავსი შემთხვევები საკმაოდ ხშირია მეტროსა და დიდი მაღაზიების ესკალატორებზე, ამიტომ მშობლებმა აუცილებლად უნდა გაითვალისწინონ წესები: ესკალატორის თავსა და ბოლოში ბავშვს გადასვლაში დაეხმარონ და თუ პატარაა, ხელშიც აიყვანონ, რომ ფეხი არ წამოედოს ან არ ჩაყვეს. ასევე, აუცილებელია, ესკალატორზე ბავშვი ისე იდგეს, რომ სახელურზე ეკიდოს ხელი ან მშობლისთვის, თუმცა გაითვალისწინეთ, რომ ესკალატორის კიბის გვერდითა კედლებთან ძალიან ახლოს არ უნდა ედგას ფეხი, ეცადეთ, კიბის საფეხურსა და ესკალატორის კედელს შორის მანძილი რამდენიმე სანტიმეტრი იყოს დარჩენილი.