2015 წლის მოდური და პოპულარული ტრენდები მსოფლიო დიზაინერებისგან დღეს გარშემო ყველაფერი ძალიან სწრაფად იცვლება და რაც გუშინ მოდური ტენდენცია იყო, ხვალ შეიძლება უკვე მოძველებული იყოს. თუმცა არის ნივთები, რომლებიც შედარებით დიდხანს ინარჩუნებენ პირველობას. განსაკუთრებით ეს რჩეული, რომელსაც ახლა წარმოგიდგენთ – 2015 წლის ყველაზე პოპულარული და მოდური ინტერიერის ნივთები:
გამჭვირვალე ავეჯი
ამ მოდას 15 წლის წინ დაუდო სათავე ფილიპ სტარკმა, რომელმაც გამჭვირვალე სკამი შექმნა. დღეს გამჭვირვალე შეიძლება იყოს მაგიდაც, თაროებიც, კარადაც და სხვა ავეჯიც და რაც მთავარია, ეს საკმაოდ მოდურ მიმართულებად მიიჩნევა. მით უმეტეს, რომ არც ისე დიდ სივრცეებში ის პრაქტიკულ ნივთადაც არის მიჩნეული, რადგან ვიზუალურად ადიდებს და ანათებს სივრცეს.
შიშველი ნათურები ან მინიმალისტური გაფორმებით
ჭაღის გარეშე ან ძალიან მინიმალისტური და გამჭვირვალე ჭაღის მქონე ღია ნათურები ასევე ტრენდია – მინიმალისტური გაფორმება, ლამაზად შეღებილი ან ლამაზი ფორმის მქონე უბრალო ნათურა ამ წლის ერთ-ერთი ყველაზე მოდური ნივთია. თუ არ მოგწონთ ცარიელი ნათურა, შეგიძლიათ, არაორდინარული და არასტანდარტული გარსით გააფორმოთ, რომელიც თქვენს ინდივიდუალურობას გაუსვამს ხაზს.
ფარდაგი
ძველებური და ხელით ნაქსოვი ფარდაგები თუ ვინმეს აქვს კიოდევ შემორჩენილი, რაც შეიძლება თვალსაჩინოდ უნდა გამოფინოს – ახლა ის მსოფლიო დიზაინერების და დეკორატორების მიერ არის აღიარებული ყველაზე მოდურ ნივთად ინტერიერში. რასაკვირველია, ის ინტერიერს უნდა შეუხამოთ და ამოვარდნილი არ უნდა იყოს საერთო სივრციდან.
შენიღბული შპალიერები
ერთ დროს ფოტოშპალიერები ძალიან ძველმოდურად მიიჩნეოდა, თუმცა ახლა პოპულარულია – ერთი ან სულაც რამდენიმე კედელი, რომელიც ფოტოშპალიერით (მაგალითად, ზედ მიხატული წიგნების თაროებით ან ბუხრით), აგურის კედლის მსგავსად ან სხვა სახით გაფორმებული, ე.წ. შენიღბული შპალიერით, მოდური ტრენდია. ნებისმიერი რამის დატანა შეიძლება დღეს ფოტოშპალიერზე და ნებისმიერი ბუნებრივი ხის, ქვის თუ პეიზაჟის იმიტაციის შექმნა.
მზის ფორმის სარკე
ეს ახალი ტრენდი აღარაა, მაგრამ კვლავ მოდურია. ამგვარი სარკე სირვცეს ნათელს და ცოცხალს ხდის, ელეგანტურობასაც მატებს. თანაც, პრაქტიკულად ნებისმიერ სტილში ჯდება.
ბალიშები გრაფიკული პრინტით
ისინი ყოველდღე სულ უფრო პოპულარული ხდება და დიზაინერებსაც ძალიან უყვართ. მოდური, დინამიკური, ფერებით გაჯერებული და მკვეთრი ბალიშები, პრინტებით, ინტერიერს ძალიან უხდება და ელეგანტურობას სძენს.
ოთახის მცენარეები და ყვავილები
ბოლო დროს ესეც აუცილებელი გახდა – პოპულარული და მოდურია სახლში დეკორატიული, დიდი ზომის მცენარეების არსებობა. რასაკვირველია, მცენარეები გემოვნების გარდა, გონივრულადაც უნდა შეირჩეს, რომ სახლის მობინადრეთა ჯანმრთელობასა და განწყობას წაადგეს.
"ძვირფასი" ფერების ფილები
ბოლო დროს ძალიან მოდურია აბაზანისთვის გაჯერებული და მდიდრული ფერების, ასევე გაფორმებული ფილები. განსაკუთრებით პოპულარულია ოქროსფერი, ლალისფერი, ლურჯი ფერები. თითქოს მცირე სივრცეში უფრო ღია ტონები უნდა იყოს გამოყენებული, თუმცა ახლანდელი მოდა ასე გვკარნახობს.