თბილისის მკვიდრი, ელისო ლურსმანაშვილი საჯარო "ფესბუქ-ჯგუფში", სახელწოდებით "სასოწარკვეთილი მომხმარებლების ჯგუფი" დაშავებული ქალიშვილის ფოტოებს აქვეყნებს და თავს გადახდენილ ამბავს აღწერს. როგორც ელისო ლურსმანაშვილი ყვება, მისი 8 წლის ქალიშვილი სიკვდილს შემთხვევით გადაურჩა, მიზეზი კი ლუქახდილი საკანალიზაციო ჭა შეიძლებოდა გამხდარიყო. დაშავებული ბავშვის დედა სოციალური ქსელის მეშვეობით თბილისის მერიას და ყველა შესაბამის ორგანოს მიმართავს, ვისაც აღნიშნული საკითხის მოგვარება ევალება.
"სასოწრაკვეთილი კი არა, არ ვიცი, რა დავარქვა ჩემს მდგომარეობას. ღმერთმა დამიფარა, თორემ წარმოდგენაც არ მინდა, ახლა როგორ ვიქნებოდი. მტერსაც არ ვუსურვებ, რაც გადავიტანე, შიშისაგან ახლაც ვკანკალებ.
მე და ჩემმა შვილმა ჩვენი პაწაწუნა ცუგები ჩავიყვანეთ სასეირნოდ, მეკავა თოკით ცუგები და მინდვრისკენ გაიქცნენ და შევბრუნდი, სადღაც 4-5 მეტრით წინ წავიდა ჩემი 8 წლის გოგონა და წამიერი ყვირილი გავიგონე და არ ჩანდა ბავშვი. წამებში გავუშვი ცუგების თოკს ხელი, მივვარდი ჭას, ახდილი ქონდა თავი და იქვე გავქვავდი, მოვკვდი, ათასმა ფიქრმა გამიარა თავში.
როგორ ჩაეკიდა სიღრმეში ბავშვი და რას, ახლაც ვერ ვხვდები ძლივს ამოვიყვანე. ახლაც თვალებში მაქვს 7-8 მეტრის სიღრმეზე სიბნელე და წყლის ჩხრიალი თუ როგორი დინებით მიდიოდა. ღმერთს მადლობა, რომ ბავშვი მოეკიდა რაღაცას. არ ვიცი, ახლაც ვერ ვიხსენებ, თუ რა და როგორ მოხდა წამებში, მხოლოდ ჩუმი ყვირილი და ის ბნელი სიღრმე და წყლის ხმა ჩამესმის.