ბავშვობაში შეშას ჩეხავდა და ძროხებს წველიდა, თინეიჯერობისას - ოფიციანტად და დამლაგებლად მუშაობდა... - მარგო რობის გზა სუპერვარსკვლავობამდე - მშობლები

მარგო რობი დღეს ნამდვილი სუპერვარსკვლავია. ყველაზე გახმაურებული, "თვითმკვლელთა რაზმისა" და "უოლ სტრიტის მგლის" შემდეგ, იყო „ტონია", "ბაბილონი", "ბარბი" და "ქარიშხლიანი უღელტეხილი".

32 წლის მსახიობი ავსტრალიაშია დაბადებული. 1990 წლის 2 ივლისს კვინსლენდში დაიბადა მრავალშვილიან ოჯახში. მამა ფერმერი იყო, დედა კი ფიზიოთერაპევტი. ბავშვობა ბებია-პაპის ფერმაში გაატარა, ორ ძმასა და უფროს დასთან ერთად. ძალიან პატარა იყო, როცა მშობლები გაშორდნენ ერთმანეთს. დედა, სარა კესლერი მარტო დარჩა ოთხი ბავშვით, თუმცა უკან არ დაუხევია. როგორც მარგო ამბობს, დედა მისთვის ეტალონი იყო - როგორც ფიზიოთერაპევტი ხანდაზმულებთან და შეზღუდული შესაძლებლობების მქონე ბავშვებთან მუშაობდა მთელი დღე, საღამოობით კი შვილების გვერდით იყო. პატარებს არაფერს აკლებდა. ბავშვობაში მარგო სხვადასხვა წრეზე დადიოდა, ნიჩბოსნობითა და სერფინგითაც იყო დაკავებული, თეატრალურ დადგმებშიც მონაწილეობდა. არდადეგებზე ბებია-პაპასთან მიემგზავრებოდა და 10 წლის ასაკიდან ეხმარებოდა მათ ფერმაში, შეშის დაჩეხვა იქნებოდა თუ ძროხების მოწველა, ყველაფერში. თუმცა იმ ასაკიდანვე ყველაზე მეტად ოცნებობდა მსახიობობაზე.

სკოლის დამთავრების შემდეგ სომერსეტის კოლეჯში ჩააბარა. დედას რომ დახმარებოდა, უკვე 16 წლიდან სამ სამსახურში მუშაობდა - ოფიციანტად, დამლაგებლად და გამყიდველად. ცოტა ფული მოაგროვა, რითაც მელბურნში გაემგზავრა და პირველი სამსახიობო კურსები თავადვე დაიფინანსა. იქაც დღისით სწავლობდ,ა მერე ქასთინგებზე და გასაუბრებებზე დადიოდა, საღამოს კი ბუტერბროდებს ყიდდა.

სამსახიობო კარიერა 2007 წელს დაიწყო და რამდენიმე ფილმსა და სერიალში გამოჩნდა, ჯერ ავსტრალიაში, მერე - ჰოლივუდში. მერე რამდენიმე გახმაურებული ფილმი იყო ჰოლივუდის სუპერვარსკვლავებთან პარტნიორობით და ცნობილი, ჰარლი ქუინის როლით.

მარგო ცნობილია სრული თავდადებით როლისთვის. ცნობილი ფიგურისტის ტონია ჰარდინგის როლის შესასრულებლად თვეები სწავლობდა ციგურებზე სრიალს, რომ ყველა ილეთი თავად გაეკეთებინა.

უკვე 2017 წელს ჟურნალმა "თაიმმა" ყველაზე გავლენიანი ადამიანების სიაში შეიყვანა. რამდენჯერმე იყო წარდგენილი "ოქროს გლობუსსა" და "ოსკარზე". გახდა "კელვინ კლაინის" სახე და გამოჩნდა "ნისანის" რეკლამაში, გახდა "შანელის" ბრენდის ელჩი და ა.შ.

რაც შეეხება მის პირად ცხოვრებას, რამდენიმე მცირეხნიანი რომანის შემდეგ, რეჟისორის ასისტენტ ტომ აკერლის შეხვდა და 2016 წელს მათ იქორწინეს. 2024 წელს ეყოლა წყვილს ვაჟი, რომელსაც არ ასაჯაროებენ.

ჰოლივუდის ახალი კაშკაშა ვარსკვლავი და ცნობილი გოგონების გულთამპყრობელი - ამბები ჯეიკობ ელორდზე