სკანდალური ვიდეო, როგორ ცემს ცნობილი რეპერი თავის შეყვარებულს - პი დიდის წინააღმდეგ უამრავი ადამიანი გაერთიანდა - მშობლები

ტელეარხმა CNN-მა სკანდალური ვიდეო გამოაქვეყნა - ვიდეომეთვალყურეობის კამერების ჩანაწერი ლოს-ანჯელესის სასტუმროდან, რომელზეც ჩანს, როგორ ცემს რეპერი შონ კომბსი, იგივე პი დიდი, ყოფილ შეყვარებულს - მომღერალ კესი ვენტურას.

ინციდენტი, რომელიც 2016 წლის 5 მარტს მოხდა, სასამართლო სარჩელშია აღწერილი. სარჩელი კესიმ აღძრა შარშან და მოყვა, როგორ დაესხა თავს მთვრალი რეპერი. მან გოგონას დაარტყა და როცა მოგვიანებით კესი წასვლას ცდილობდა, გამოეკიდა და მასზე ფიზიკურად იძალადა. საბოლოოდ კესიმ მაინც მოახერხა ტაქსის გამოძახება და იქიდან წასვლა. მოგვიანებით ის დაბრუნებულა სასტუმროში იმის შიშით, რომ მისი წასვლით გაბრაზებულ რეპერს უარესი არ ექნა, თუმცა სასტუმროს უსაფრთხოების თანამშრომლებმა დაარწმუნეს, სახლში დაბრუნებულიყო და მიანიშნეს, რომ უკვე ნანახი ჰქონდათ კამერების ჩანაწერები.

კესი სარჩელში ირწმუნებოდა, რომ კომბსმა 50 ათასი დოლარი გადაიხადა ჩანაწერის ამოღებისთვის, თუმცა როგორც ჩანს, ჩანაწერმა მაინც გაჟონა სოციალურ ქსელში.

კესიმ სასამართლოზე აღნიშნა, რომ რეპერი გამუდმებით ძალადობდა მასზე, ნარკოტიკებსაც მიაჩვია და სხვა მამაკაცებთან სქესობრივ კავშირსაც აიძულებდა, თან ამას კამერით იღებდა... საბოლოოდ დავა სამშვიდობო შეთანხმებით დასრულდა. მუსიკოსი ყველა ბრალდებას უარყოფდა, თუმცა ახლახან მის სახლებში ჩხრეკა დაიწყო, ის დაადანაშაულეს ძალადობაში, სუტენიორობაში, ცეცხლსასროლი იარაღისა და უკანონო ნივთიერებების გავრცელებაში. სხვათა შორის, ცოტა ხნის წინ მისი შვილი კრისტიანიც გაუპატიურებაში ამხილეს...

კესისა და კომბს შორის რომანი 2007 წელს დაიწყო, როცა გოგონა 19 წლის იყო, ხოლო რეპერი - 37-ის.