"მე შვილებზე ვზრუნავდი, მათთვის ასე ჯობდა..." - რას ამბობს ბრიტნი სპირსის ყოფილი ქმარი, რომელმაც მას შვილები წაართვა და როგორ გაანადგურეს საყვარელმა მამაკაცებმა 2000-იანი წლების კაშკაშა ვარსკვლავი - მშობლები

კევინ ფედერლაინმა, ბრიტნი სპირსის ყოფილმა ქმარმა, დააანონსა, რომ მემუარებს გამოსცემს, სადაც ბრიტნისთან თანაცხოვრების შესახებ იქნება საკმაოდ ბევრი თავი. როგორც ცნობილია, მან შვილები წაართვა ბრიტნის, მოიპოვა მეურვეობა და მრავალი წლის განმავლობაში მომღერლისგან ალიმენტებს იღებდა შვილების შესანახად, რომლებსაც იშვიათად ჰქონდათ დედასთან შეხვედრის საშუალება. კევინი ამბობს, რომ მზადაა, მოვლენების საკუთარი ვერსია გააზიაროს.

წიგნის აღწერილობიდან გამომდინარე, შეიძლება დავასკვნათ, რომ ბრიტნის ყოფილი ქმარი მკითხველის ყურადღებას შვილების ცხოვრებაში მის შეუცვლელ როლზე გაამახვილებს.მისი თქმით, ის არა მხოლოდ ზრუნავდა მათ კეთილდღეობაზე და ცდილობდა მათთვის სტაბილური მომავლის უზრუნველყოფას, არამედ დანგრეული ქორწინების გადარჩენასაც ცდილობდა.

ფედერლაინი ხაზს უსვამს, რომ მისი მთავარი ამოცანა იყო ბავშვებისთვის ფსიქოლოგიური სტაბილურობის უზრუნველყოფა და მათთვის ღირსეული ცხოვრების პირობების შექმნა.

თაყვანისმცემლების თქმით, ბრიტნი კვლავ ნეგატიურ ჭრილში იქნება წარმოდგენილი, ხოლო თავად ფედერლაინი შეეცდება საკუთარი თავის გარემოებების მსხვერპლად წარმოჩენას.

2000-იანების ვარსკვლავი, რომელიც საყვარელმა მამაკაცებმა "ჩააქრეს"

ბრიტნი სპირსი 2000-იან წლებში განსაკუთრებით პოპულარული მომღერალი იყო. ვარსკვლავს, ფაქტობრივად, ყველაფერი ჰქონდა - დიდება, ფული, აღიარება, მაგრამ წარმატებას მეორე მხარეც მოჰყვა, რამაც მომღერლის ცხოვრება მნიშვნელოვნად დააზიანა...

ნერვული აშლილობა, მავნე ნივთიერებებზე დამოკიდებულება, მამის მეურვეობა, ხმაურიანი სასამართლო პროცესი და ნანატრი თავისუფლება - ბრიტნი სპირსმა საკმაოდ რთული გზა გაიარა. წლების განმავლობაში, მომღერლის კარიერას თუ პირად ცხოვრებას მამა აკონტროლებდა და მას დამოუკიდებლად გადაწყვეტილების მიღების უფლება არ ჰქონდა. მამა გეგმავდა ყველაფერს მის ნაცვლად და ის განკარგავდა მის ფულსაც, რომელსაც დაუღალავი შრომით მოიპოვებდა ახალგაზრდა ვარსკვლავი.

მერე იყო მცირეხნიანი თავისუფლება და ჯასტინ ტიმბერლეიკთან გამიჯნურება. მათ სიყვარულზე ყველა წერდა, ბრიტნი ყურებამდე იყო შეყვარებული. მოგვიანებით მემუარებში დაწერა, რამდენი ტკივილი მიაყენა ამ ურთიერთობამ და როგორ გააკეთებინა აბორტი ჯასტინმა.

მასთან დაშორებას მოჰყვა ხანგრძლივი დეპრესია და შემდეგ, მოულოდნელად, სამთვიანი ურთიერთობის შემდეგ გაჰყვა ცოლად მოცეკვავესა და რეპერს კევინ ფედერლაინს. 2004 წელს იქორწინეს. ბრიტნიმ ორი შვილი გააჩინა და 2006 წელს გამოაცხადა, რომ ქმარს შორდებოდა.

შვილებზე მეურვეობას ორივე ცალ-ცალკე ითხოვდა, თუმცა ერთ წელიწადში საქმე თავისთავად ბრიტნის საწინააღმდეგოდ განვითარდა. მორიგ სავალდებულო ტესტირებაზე ბრიტნის ნარკოტიკის კვალი აღმოუჩინეს. შემდეგ ავტომანქანის მართვის წესები დაარღვია და საბოლოოდ მის წინააღმდეგ შექმნილი ამ მდგომარეობით კევინმა ისარგებლა, რომელიც შვილების მეურვედ დანიშნეს, ბრიტნის კი ალიმენტის გადახდა დააკისრეს.

ბრიტნის ცხოვრებაში დაიწყო სარეაბილიტაციო კლინიკების, არაადეკვატური ქცევების და... კვლავ მამის მეურვეობის პერიოდი. ბრიტნი წლები ვერ ნახულობდა შვილებს. ვაჟებთან ურთიერთობის აღდგენა მხოლოდ ბოლო პერიოდში მოახერხა.

მამის მეურვეობისგან გათავისუფლება ბრიტნიმ 2021 წელს მოახერხა მხოლოდ და მალევე მის ცხოვრებაში ახალი მამაკაცი გამოჩნდა. ბრიტნი სპირსი ფიტნეს ტრენერ სემ ასგარზე დაქორწინდა და ძალიან ბედნიერიც ჩანდა.

თუმცა ეს ქორწინება ერთი წელი გაგრძელდა.

მორიგი განქორწინების შემდეგ, ბრიტნი სოციალურ მედიაში გააქტიურდა. გულშემატკივრების შეშფოთებაც სწორედ ამ პერიოდიდან დაიწყო. მომღერალი კამერის წინ ხშირად ნახევრად შიშველი, გაუჩერებლად ცეკვავს. უცნაურად იქცევა და გამოიყურება.

თუმცა, ეს ყველაფერი არ არის. პაპარაცებმა დააფიქსირეს, რომ ბრიტნი სპირსი მექსიკაში, თვითმფრინავით ჩაფრინდა. მომღერალმა თან წაიყვანა თოჯინა, რომელსაც ბავშვივით ექცეოდა... თოჯინა, ბავშვის მსგავსად, პლედში იყო გახვეული. სათამაშო ბრიტნი სპირსის დაცვის წევრს ეჭირა ხელში და მომღერალიც გვერდით მიჰყვებოდა. ბრიტნი სპირსმა თოჯინა 2021 წელსაც გამოაჩინა და თქვა, რომ შვილი შეეძინა.

"შვილი შემეძინა. შვებულების გატარებას მასთან ერთად, სახლში ვაპირებ. მისი საბავშვო ოთახი ულამაზესია. მას ბრენანი ჰქვია. ჩვენ ვგავართ კიდევაც ერთმანეთს. ეს ჩემი პირველი თოჯინა." - თქვა მაშინ ბრიტნი სპირსმა.

ახლა მომღერლის გულშემატკივრები განსაკუთრებით ღელავენ და ახლობლებს მოუწოდებენ, რომ მის მენტალურ ჯანმრთელობაზე იზრუნონ.

"ქალი ჩემში"

სულ ცოტა ხნის წინ ბრიტნის მემუარები გამოქვეყნდა.წიგნში სახელწოდებით "ქალი ჩემში" მომღერლის წარმატებების, ტკივილის, ტანჯვისა და უამრავი განსაცდელის შესახებაა მოთხრობილი. განსაკუთრებული ყურადღება კი ბრიტნი სპირსის ჯასტინ ტიმბერლეიკთან ურთიერთობას ეთმობა.

მომღერლის წიგნიდან რამდენიმე ფრაგმენტს გაგიზიარებთ:

"მე და ჯასტინი ორლანდოში ერთად ვცხოვრობდით. მშვენიერი, დიდი, ორსართულიანი სახლი გვქონდა, კრამიტის სახურავითა და უკანა ეზოში აუზით. მიუხედავად იმისა, რომ ორივე ბევრს ვმუშაობდით, მაინც ვცდილობდით, რაც შეიძლება ხშირად გაგვეტარებინა დრო ერთად.

რამდენიმე თვეში ერთხელ მოვდიოდი რამდენიმე კვირით, ხანდახან რამდენიმე თვით, ჯასტინთან რომ ვყოფილიყავი. ერთ დღეს, როდესაც ჯეიმი ლინი (შენიშვნა - ბრიტნის უმცროსი და) პატარა იყო, ჩემი ოჯახი ჩვენთან მოვიდა. წავედით სავაჭრო ცენტრში, სადაც სათამაშოების მაღაზია სრულად დაგვიხურეს. ჩემმა დამ მინიატურული კაბრიოლეტი აირჩია. ძალიან საყვარელი იყო, მინიატურული წითელი მანქანით დადიოდა. ჩემი და შიგნით იჯდა. ეს ყველაზე საყვარელი რამ იყო, რაც კი ოდესმე მინახავს. ღმერთს ვფიცავ, წარმოუდგენელი სანახაობა იყო.

მშვენიერი დრო იყო. ჯასტინზე სიგიჟემდე შეყვარებული ვიყავი. არ ვიცი, შეიძლება, ახალგაზრდობაში სიყვარული განსხვავებულია, მაგრამ ჩვენი ურთიერთობა განსაკუთრებული იყო. არაფრის გაკეთება არ სჭირდებოდა. ისედაც ვგრძნობდი, რომ მასთან ძალიან ახლოს ვიყავი და მიყვარდა...

ჩვენი ურთიერთობის დროს რამდენჯერმე გაირკვა, რომ ჯასტინმა მიღალატა. ძალიან შეყვარებული ვიყავი და არ მინდოდა, დამეჯერებინა. მიუხედავად იმისა, რომ ტაბლოიდები ასეთ ამბებს სულ მახსენებდნენ და ცხვირს უაზროდ ჰყოფდნენ იმაში, რაც მათი საქმე არ იყო. 2000 წელს ბოიბენდი "NSYNC" ლონდონში წავიდა. ფოტოგრაფებმა ჯასტინი მანქანაში ვიღაც გოგონასთან ერთად გადაიღეს. არაფერი მითქვამს. ერთი წელი ერთად ვიყავით. სხვა შემთხვევაც იყო - ვეგასში ჩემი გუნდის მოცეკვავემ მითხრა, რომ ჯასტინი ერთ-ერთ გოგონას ხვდებოდა და მასთან ურთიერთობა ჰქონდა. არ მინდა, დავასახელო, ვისზე თქვა. ის ძალიან პოპულარული ქალია. ასევე, დაოჯახებულია და შვილებიც ჰყავს. ამიტომ, ამ ინფორმაციის გამჟღავნებით, არ მსურს, უხერხულ მდგომარეობაში ჩავაგდო...

ბევრი ჭორი იყო მის ურთიერთობაზე მოცეკვავეებთან და თაყვანისმცემლებთან. ყველა ჭორს ვაიგნორებდი, მაგრამ აშკარად სხვასთან ეძინა. ეს ის შემთხვევაა, როცა ყველაფერს მშვენივრად ხვდები, მაგრამ ჩუმად ხარ, არ გინდა, გაიგო... მეც სულ ვბრუნდებოდი. მხოლოდ ერთხელ, უეიდ რობსონთან ვიყავი. ერთ დღეს ერთად ვსეირნობდით და ესპანურ ბარში შევედით. ვცეკვავდით, დავლიეთ და იმავე ღამეს მასთან დავიძინე. მრავალი წლის განმავლობაში ჯასტინის ერთგული ვიყავი. მხოლოდ ერთხელ ვუღალატე და ისიც ვაღიარე. მაგრამ, ჩვენ ეს ღალატი დავძლიეთ და ურთიერთობა შევინარჩუნეთ. მეგონა მთელი ცხოვრება ერთად ვიქნებოდით. სწორედ ამის იმედი მქონდა. სანამ ჯერ კიდევ ერთად ვიყავით, ჯასტინისგან დავორსულდი. მოულოდნელი იყო, მაგრამ ტრაგედიად არ აღმიქვამს. მე ის ძალიან მიყვარდა. ყოველთვის ვფიქრობდი, რომ ნამდვილი ოჯახის შექმნას შევძლებდი. მაგრამ ჯასტინს ორსულობის ამბავი სულაც არ გაუხარდა. მან თქვა, რომ ბავშვის გაჩენისთვის მზად არ ვიყავით. ჯასტინი ამბობდა, რომ ძალიან პატარები ვიყავით.... ამის გაგება არ შემეძლო. ჩვენი ურთიერთობა ჩვენთვის ძალიან ძვირფასი იყო. ჯასტინს კი არ სურდა, მამა გამხდარიყო. ამიტომ, დავთანხმდი, ბავშვი მომეშორებინა. ვერასოდეს წარმოვიდგენდი, რომ ერთ დღეს აბორტის გაკეთებას გადავწყვეტდი. მაგრამ გარემოებებიდან გამომდინარე, სხვა გზა არ იყო.

არ ვიცი სწორად მოვიქეცი თუ არა. არჩევანი მხოლოდ ჩემი რომ ყოფილიყო, ამას არასდროს გავაკეთებდი. მაგრამ ჯასტინი აგრძელებდა და მუდმივად ამბობდა, რომ არ სურდა, მამა გამხდარიყო. კიდევ ერთი გადაწყვეტილება მივიღე, რომელსაც ვნანობ. ჯასტინის თქმით, არავის უნდა გაეგო, რომ ორსულად ვიყავი და აბორტს ვიკეთებდი. ამიტომ, ეს ყველაფერი სახლში მოხდა... ჩემი ოჯახისთვისაც კი არ მითქვამს. სახლში მხოლოდ ჯასტინი და ჩემი თანაშემწე, ფელიცია იყვნენ. ფელიცია, სულ ჩემთან იყო. დანიშნულ დღეს, როცა სახლში მხოლოდ ჩვენ სამნი ვიყავით, პატარა აბები დავლიე. მალევე მტანჯველი კრუნჩხვები დამეწყო. სააბაზანოში შევედი და რამდენიმე საათი იქ დავრჩი, იატაკზე ვიწექი, ვტიროდი და ტკივილისგან ვყვიროდი. ტკივილგამაყუჩებელი მჭირდებოდა. ექიმთან წასვლა მინდოდა და ძალიან მეშინოდა. უბრალოდ ვიწექი და ვფიქრობდი, მოვკვდებოდი თუ არა. შეუძლებელია, სიტყვებით გადმოვცე ის ტკივილი, რომელსაც იმ დღეს განვიცდიდი. ჯოჯოხეთი იყო. კარგა ხანს ვერ ვმოძრაობდი. დღემდე, ეს არის ერთ-ერთი ყველაზე მტკივნეული გამოცდილება, რაც კი ოდესმე მიმიღია. საავადმყოფოში არ წამიყვანეს. ჯასტინი აბაზანაში შემოვიდა და ჩემს გვერდით იატაკზე დაწვა. რაღაც მომენტში იფიქრა, რომ მუსიკა ყურადღებას გადამატანინებდა. ამიტომ გიტარა აიღო და დაკვრა დაიწყო...

ტირილი გავაგრძელე. რამდენიმე საათი ვტიროდი. არ ვიცი, როდის და როგორ დასრულდა ეს ყველაფერი. მაგრამ, ის ტკივილი და შიში ოცი წლის შემდეგაც კარგად მახსოვს. ამის შემდეგ განადგურებული ვიყავი, განსაკუთრებით იმიტომ, რომ ჯასტინი ჯერ კიდევ ძალიან მიყვარდა. სიგიჟემდე მიყვარდა... მაგრამ სასწაული არ მოხდა. უნდა მივმხვდარიყავი, რომ ასეთი დასასრული გარდაუვალი იქნებოდა, მაგრამ დავბრმავდი..."