როგორ და რა დოზებით უნდა ჩავანაცვლოთ ასპირინი ლიმონმჟავით - სპეციალისტის რჩევები - მშობლები

სურსათის უვნებლობის ექსპერტი,ირაკლი არაბული, სოციალურ ქსელში კვლავ ეხება კონსერვებში ასპირინის გამოყენების და მისი ლიმონმჟავით ჩანაცვლების თემას. სურსათის უვნებლობის სპეციალისტი ამჯერად საუბრობს, თუ რა დოზებით უნდა გამოვიყენოთ ლიმონმჟავა უსაფრთხო კონსერვაციისთვის.

„კონსერვების უვნებლობისთვის მჟავიანობა უნდა იყოს მაღალი, რათა ბაქტერიებმა ვერ შეძლონ გამრავლება. ph უნდა იყოს 4,5-ზე დაბალი. სწორედ ეს გარემო ქმნის ისეთ პირობებს, სადაც ბაქტერიები ვერ მრავლდებიან.

კონსერვებში ასპირინის შემცვლელი არსებობს. ვინაიდან ასპირინი მედიკამენტია, მისი გამოყენება კონსერვებში ბევრ ქვეყანაშია აკრძალული. ჯობია, ის ჩაანაცვლოთ ლიმონმჟავით, რომელიც კონსერვანტია. ლიმონმჟავა პროდუქტში ქმნის მჟავე გარემოს და ბაქტერიები ვერ მრავლდებიან. ყველა საერთაშორისო ორგანიზაცია, მათ შორის, ამერიკული და ევროპული, რეკომენდაციას სწორედ ლიმონჟავას და ძმარმჟავას უწევს კონსერვის უვნებლობისთვის.

რაც შეეხება დოზებს: ლიმონმმჟავა უნდა გამოვიყენოთ ლიტრზე დაახლოებით, ნახევარი ჩაის კოვზი. ან შეგვიძლია ვიქონიოთ ph-ის საზომი ტესტერები და ამით დავარეგულიროთ პროდუქტში მჟავიანობა. ph უნდა იყოს 4,5-ზე დაბალი. ლიმონმჟავა არის უსაფრთხო კონსერვანტი და ნებისმიერი მწარმოებელი, რომელიც კონსერვებს აწარმოებს, მჟავიანობის რეგულირებისთვის სწორედ ლიმონმჟავას და ძმარმჟავას იყენებენ.“ - აცხადებს ირაკლი არაბული.

რად გარდაიქმნება კონსერვებში მოხვედრილი ასპირინი და ვისთვისაა საშიში ასეთი კონსერვი - ფარმაცევტ ნანა ხურციძის პასუხი

იცავს თუ არა კონსერვს ასპირინი ბოტულიზმისგან