რომელ ოჯახებს დაუფინანსებს სახელმწიფო იპოთეკური სესხების პროცენტებს და რა კრიტერიუმების დაკმაყოფილება მოგიწევთ შეღავათის მისაღებად - მშობლები
რომელ ოჯახებს დაუფინანსებს სახელმწიფო იპოთეკური სესხების პროცენტებს და რა კრიტერიუმების დაკმაყოფილება მოგიწევთ შეღავათის მისაღებად
სუბსიდირებული იპოთეკური სესხის პროგრამა გრძელდება. პროგრამის მიზანი მრავალშვილიანი ან/და იმ ოჯახებისათვის, რომელთაც ჰყავთ ახალშეძენილი შვილი/შვილები, საცხოვრებელი პირობების გაუმჯობესების ხელშეწყობაა იპოთეკური კრედიტების სუბსიდირების გზით. ამის შესახებ ინფორმაცია "აწარმოე საქართველოში" ვებგვერდზეა გამოქვეყნებული.
სუბსიდირებით სარგებლობისთვის აუცილებელი პირობაა, რომ ოჯახს 1 წლამდე ასაკის შვილი ჰყავდეს.
სააგენტო უზრუნველყოფს ბენეფიციარის მიერ პროგრამის ფარგლებში აღებული იპოთეკური სესხის პროცენტის სუბსიდირებას 60 თვის განმავლობაში, შემდეგი ოდენობით:
- რეფინანსირების განაკვეთს გამოკლებული 3,5%, მაგრამ არაუმეტეს 6%ის ოდენობით - თუ მსესხებელს ჰყავს 1 ან 2 შვილი;
- რეფინანსირების განაკვეთს გამოკლებული 1,5%, მაგრამ არაუმეტეს 8%-ის ოდენობით - თუ მსესხებელს ჰყავს 3 ან მეტი შვილი.
პროგრამის ფარგლებში ბენეფიციარის მიერ ასათვისებელი სესხ(ებ)ის ჯამური მაქსიმალური მოცულობა 200 000 ლარია. ამასთან, სესხით შესაძენი ბინის/სახლის ღირებულება შესაძლოა აჭარბებდეს 200 000 ლარს.
პროგრამის მიზნებისათვის შვილად მიიჩნევა მხოლოდ არასრულწლოვანი შვილი/შვილად აყვანილი/გერი.
პროგრამის სამიზნე ჯგუფი და გეოგრაფიული არეალი:
პროგრამა ხორციელდება საქართველოს ყველა რეგიონსა და თბილისში.
პროგრამით სარგებლობის უფლება აქვთ:
- A) ოჯახი/მარტოხელა მშობელი/ქვრივი თუ სესხის აღების მომენტში ჰყავს 2021 წლის 1 სექტემბრის შემდეგ დაბადებული 1 წლამდე ასაკის შვილი;
- B)ოჯახს/მარტოხელა მშობელს/ქვრივს, თუ სესხის აღების მომენტში ყავს 3 ან მეტი შვილი და ამ პროგრამის ფარგლებში სესხს აიღებს 2022 წლის 1 სექტემბრის ჩათვლით;
- C) ოჯახი/მარტოხელა მშობელი/ქვრივი, რომელსაც სესხის აღების მომენტში ჰყავს არასრულწლოვანი შვილი, რომლის აყვანა განხორციელდა 2021 წლის 1 სექტემბრის შემდეგ.
- A და C ტიპის მსესხებელს მხოლოდ ერთხელ აქვს შესაძლებლობა ისარგებლოს პროგრამით, მიუხედავად მათ მიერ ამ პროგრამის ფარგლებში აღებული სესხის ოდენობისა;
- B ტიპის ბენეფიციარი უფლებამოსილია პროგრამით ისარგებლოს მეორეჯერაც, თუ პროგრამაში ჩართვის შემდეგ შეეძინება ან/და შვილად აიყვანს მე-4 ან მეტ შვილ(ებ)ს. ასეთ შემთხვევაში მსესხებელი უფლებამოსილია აიღოს ჯამში 200 000 ლარი სესხი;
ეს კი იმას ნიშნავს, რომ თუ მრავალშვილიანმა ოჯახმა 2022 წლის 1 სექტემბრის ჩათვლით იპოთეკური სესხის სუბსიდირებით უკვე უკვე ისარგებლა, ახლა კი მე-4 ან მეტი შვილი ჰყავთ და მათი ასაკი 1 წლამდე ასაკისაა, განმეორებით, კვლავ შეუძლიათ, იპოთეკური სესხის სუბსიდირებით ისარგებლონ.
სხვა შემთხვევაში, იპოთეკური სესხით სარგებლობის უფლება ოჯახებს მხოლოდ ერთხელ აქვთ.
იპოთეკური სესხის ასაღებად დაინტერესებულმა პირმა პირდაპირ უნდა მიმართოს რომელიმე კომერციულ ბანკს და ბანკში წარადგინოს მოთხოვნილი დოკუმენტაცია.
სუბსიდირებულ იპოთეკურ სესხთან დაკავშირებით შეგიძლიათ, ინფორმაციას ვრცლად გაეცნოთ "აწარმოე საქართველოში" ვებგვერდზე. ან დაუკავშირდეთ ცხელ ხაზზე: 15 25
