რატომ გახდა სიამის ტყუპისცალის ქმარი საყოველთაო განხილვის საგანი და რას ფიქრობს კარმენის და ამ ურთიერთობაზე - ქორწინებიდან ერთი წელი გავიდა - მშობლები
რატომ გახდა სიამის ტყუპისცალის ქმარი საყოველთაო განხილვის საგანი და რას ფიქრობს კარმენის და ამ ურთიერთობაზე - ქორწინებიდან ერთი წელი გავიდა
კარმენ და ლუპიტა ანდრადეების ისტორია გვაჩვენებს, თუ როგორ შეიძლება, უჩვეულო გარემოებებშიც კი სრულფასოვანი ცხოვრება მოაწყო. სიამის ტყუპი და მექსიკაში დაიბადა, თუმცა ისინი აშშ-ში, კონექტიკუტის შტატში გაიზარდნენ. სიამის ტყუპს ერთი სხეული აქვს. უფრო ზუსტად, მათ საერთო ტანი, მენჯი, სისხლის მიმოქცევის სისტემა და მთელი რიგი შინაგანი ორგანოები აქვთ.
ამავდროულად, თითოეულ მათგანს ინდივიდუალური გული, ფილტვები, ხასიათი და სამყაროსადმი საკუთარი ხედვა გააჩნია. ადრეული ასაკიდანვე კარმენი და ლუპიტა იმ აზრს შეეგუვნენ, რომ მათი არსებობა მუდმივ კომპრომისს მოითხოვს. ისინი ერთმანეთის სურვილების გათვალისწინებით ცხოვრებას ნაბიჯ-ნაბიჯ სწავლობდნენ. ერთი მარჯვენა ფეხს მართავს, მეორე კი - მარცხენას, ამიტომ ნებისმიერი ქმედება მაქსიმალურ შეთანხმებულობას საჭიროებს.
თუმცა, მათ ისტორიაში ყველაზე გამაოგნებელი არა სამედიცინო თავისებურებები, არამედ მათი პირადი ცხოვრების რადიკალურად განსხვავებული განვითარება აღმოჩნდა. 2024 წელს კარმენი თავის რჩეულზე, დენიელ მაკკორმაკზე დაქორწინდა, რომელიც გაცნობის აპლიკაციის საშუალებით აღმოაჩინა. გოგონას თქმით, ურთიერთობის დასაწყისში გადამწყვეტი როლი სწორედ მამაკაცის უშუალობამ და უხერხული კითხვების არარსებობამ ითამაშა. დენიელმა იგი, უპირველეს ყოვლისა, პიროვნებად აღიქვა და არა სამედიცინო ფენომენად.
ლუპიტასთვის ეს კავშირი ცხოვრების ახალ ეტაპად იქცა, თუმცა არა რომანტიკული თვალსაზრისით. იგი ღიად აცხადებს, რომ რომანტიკულ ლტოლვას საერთოდ არ განიცდის და საკუთარ თავს, როგორც ასექსუალად და არარომანტიკულად აღწერს.
მიუხედავად ამისა, ეს მას დის ქმართან კარგი ურთიერთობის ჩამოყალიბებაში ხელს არ უშლის - სწორედ აქედან ამ ისტორიის ყველაზე საინტერესო ნაწილი იწყება. სანამ კარმენი ოჯახურ ცხოვრებას აწყობს, ლუპიტა საკუთარი რიტმით ცხოვრობს. მას შეუძლია, აუდიოწიგნებს მოუსმინოს, შემოქმედებითი საქმიანობით დაკავდეს ან უბრალოდ დაისვენოს.
თუმცა, ხშირად სწორედ ისაა ადამიანი, ვისაც დენიელი გულახდილად ესაუბრება. თანდათანობით მათმა კომუნიკაციამ ყოველგვარი დაძაბულობისგან დაცლილ, თბილ მეგობრობაში გადაინაცვლა.
"ზოგჯერ ჩემი სათქმელის მასთან გაზიარება უფრო მიადვილდება, ვიდრე სხვასთან. ის მხოლოდ ჩემი დის ქმარი კი არა, ჩემთვისაც უახლოესი მეგობარი გახდა", - აღნიშნა ლუპიტამ ერთ-ერთ ინტერვიუში.
ურთიერთობის ასეთი ფორმა საზოგადოებისთვის მეტად უჩვეულოა და ხშირად ინტერნეტსივრცეში განხილვების დიდ ტალღას იწვევს. სოციალური ქსელის მომხმარებლები ამ ოჯახის პირადი ცხოვრების მოწყობის პრინციპით ინტერესდებიან და ხშირად ზედმეტად ინტიმურ კითხვებსაც სვამენ. თუმცა, წყვილი და ლუპიტა საკუთარი საზღვრების დაცვას მაქსიმალურად ცდილობენ.
დენიელი მომატებული ყურადღების გამო გაღიზიანებას არ მალავს. მან არაერთხელ გაუსვა ხაზი იმას, რომ გარკვეული თემები საჯარო განხილვის საგანი არავითარ შემთხვევაში არ უნდა გახდეს. მის პოზიციას კარმენიც სრულად იზიარებს. მამაკაცს ხშირად აკრიტიკებენ. ზოგიერთი მას "ავადმყოფს" უწოდებს, ზოგი კი თაღლითად მოიხსენიებს, რომელიც განსხვავებული გარეგნობის მქონე ქალთან ერთობა. საზოგადოების მხრიდან ზეწოლის მიუხედავად, მათ ოჯახში ურთიერთპატივისცემა მთავარია. თუ ლუპიტა თავს ფიზიკურად ან ემოციურად არაკომფორტულად იგრძნობს, კარმენი და დენიელი ამას ყოველთვის ითვალისწინებენ. ემპათიის ასეთი მაღალი დონე მათი თანაცხოვრების მთავარი საყრდენი გახდა.
კარმენისა და დენიელის ურთიერთობა დრომ გამოსცადა. ქორწილამდე ისინი ხუთი წლის განმავლობაში ხვდებოდნენ ერთმანეთს, ცოტა ხნის წინ კი ქორწინების პირველი წლისთავი აღნიშნეს. გოგონა გრძნობებს არ მალავს და მეუღლის შესახებ დიდი სითბოთი საუბრობს. ლუპიტა დის არჩევანს სრულად უჭერს მხარს და შესაძლო კონფლიქტების შესახებ გავრცელებულ ჭორებს კატეგორიულად უარყოფს.
მისი თქმით, დენიელთან ურთიერთობა დაძაბული რომ ყოფილიყო, ის მათი ცხოვრების ნაწილი უბრალოდ ვერ გახდებოდა. პირადი ცხოვრების პარალელურად, დები სოციალურ ქსელებშიც აქტიურები არიან. მათ YouTube-არხს უკვე ასობით ათასი გამომწერი ჰყავს. გოგონები ყოველდღიურობას აზიარებენ, ვიდეოებს იღებენ და ბლოგერული კარიერის გაგრძელებას გეგმავენ.
ამ საქმეში წამყვან როლს ლუპიტა ასრულებს - გასართობი სკეტჩებისთვის სცენარებს სწორედ ის წერს. ჯანმრთელობის სირთულეების, მათ შორის ქრონიკული დაავადებების მიუხედავად, დები აქტიურ ცხოვრებას აგრძელებენ და სამომავლო გეგმებზე უარს არ ამბობენ. ქირურგიული გზით განცალკევების საკითხი მათ არაერთხელ განიხილეს, თუმცა კრიტიკულად მაღალი რისკების გამო ამაზე საბოლოოდ უარი განაცხადეს.
