"იცოდნენ, რომ არ მინდოდა დედამთილის სახელის დარქმევა. ჩემმა ქმარმა იცოდა და მაინც დედამისის სახელი ჩააწერინა" - შეიძლება თუ არა ჩვილს დედის თანხმობის გარეშე დაარქვან სახელი და როგორ ხდება სამშობიაროში ახალშობილისთვის სახელის გაფორმება - მშობლები

ბავშვისთვის სახელის შერჩევა დიდი პასუხისმგებლობაა. როგორც წესი, მშობლები შვილს სახელს ერთად ურჩევენ. თუმცა, არის შემთხვევები, როდესაც ბავშვის სახელს მხოლოდ ერთი მშობელი არჩევს და გადაწყვეტილებას ერთპიროვნულად იღებს - არქმევს საკუთარი დედის, მამის პატივსაცემად და მეუღლის სურვილს არ ითვალისწინებს. სოციალურ ქსელში არაერთმა დედამ დაწერა, რომ სანამ თავად სამშობიაროში იწვა, ბავშვს სახელი მამამ დაარქვა ისე, რომ ცოლს არც შეთანხმებია. სინამდვილეშ მართლაც შესაძლებელია თუ არა, ერთმა მშობელმა მეორისგან ფარულად დაარქვას შვილს სახელი?

ეს საკითხი ხშირად მშობელთა შორის კამათისა და დაპირისპირების მიზეზია. გთავაზობთ რამდენიმე დედის კომენტარს, თუ თავად როგორ შეარჩიეს საკუთარი შვილის სახელი და ამ პროცესში რა დაბრკოლებები შეხვდათ:

• "ჩემი შვილი უკვე 5 თვისაა და სახელს ვერ ვეძახი იმის გამო, რომ მეუღლემ მამამისის სახელი დაარქვა. იცოდა, რომ სხვა სახელი მინდოდა, არაფრად ჩააგდო ჩემი სურვილი და ბავშვს ის დაარქვა, რაც თავად უნდოდა".
• "მე სადაც ვიმშობიარე, ბავშვის სახელი მე მკითხეს და ისე გადააგზავნეს, რა თქმა უნდა, მეუღლესთან არ მქონია ჭიდილი სახელთან დაკავშირებით. მეუღლისთვის სულ არ უკითხავთ, რას არქმევო"…
• "იცოდნენ, რომ არ მინდოდა დედამთილის სახელის დარქმევა. ჩემმა ქმარმა იცოდა და მაინც დედამისის სახელი დაარქვა".
• "ჩემს შვილსაც მამამთილის სახელი დაარქვეს და დღემდე არავის დაუძახია ის სახელი მისთვის. მე რაც მინდოდა, ის დავუძახე დაბადებისთანავე".
• "ჩემთვის სამშობიაროში არავის არაფერი უკითხავს. ქმართან კი მქონდა სახელზე კამათი, მაგრამ საბუთების გაფორმებისას დამირეკა, მკითხა და ის ჩააწერინა, რაც ვუთხარი. მაგრამ ფაქტია, ჩემს შვილს სადღაც სახელს არქმევდნენ და მე არ ვიცოდი. ჩემმა ქმარმა თავად არ იკადრა, რომ უჩემოდ გადაეწყვიტა".
• "პაპაჩემმა ჩამწერა თავისი სახელით, მაგრამ დედას ერთხელაც არ დაუძახია ის სახელი. ახლა ყველა დედის დარქმეულ სახელს მეძახის."
• "ქმარი არც გამიშვია საბუთების გასაკეთებლად, საავადმყოფოდანვე გადავაგზავნინე იუსტიციაში ბავშვის სახელი, გვარი და ყველა მონაცემი, ასევე ჩემი და ჩემი მეუღლის პირადობის ასლები."
• სანამ ბლოკში ამიყვანდა ჩემი ექიმი, მანამდე მკითხა, რას არქმევო და ჩაანიშნინა ექთანს".

როგორც სახელმწიფო სერვისების განვითარების სააგენტოში გვითხრეს, მათთან დაბადების აქტი მას შემდეგ რეგისტრირდება, რაც სამშობიაროდან გადაგზავნილ მონაცემებს მიიღებენ.

"როდესაც ბავშვი იბადება და სამშობიაროდან იგზავნება შეტყობინება, ორივე მშობელი აფიქსირებს თანხმობას ბავშვის სახელთან და გვართან დაკავშირებით. მონაცემები ბავშვის სახელთან, გვართან, რეგისტრაციის ადგილთან დაკავშირებით სამშობიაროში ივსება, შემდგომ ჩვენთან იგზავნება და იქ მითითებული მონაცემების საფუძველზე, დაბადების აქტი რეგისტრირდება. სამშობიაროში ორივე მშობელმა უნდა დაადასტუროს მონაცემების სიზუსტე", - გვითხრეს სახელმწიფო სერვისების განვითარების სააგენტოში.

თუ მშობლები სახელზე ვერ თანხმდებიან, შეუძლიათ, სასამართლოში იდავონ.

საკითხი რამდენიმე სამშობიაროში დავაზუსტეთ, სადაც აღნიშნეს, რომ ბავშვისთვის სახელის შერჩევისას ორივე მშობლის თანხმობაა აუცილებელი. მონაცემები სახელმწიფო სერვისების განვითარების სააგენტოში მხოლოდ ამის შემდეგ იგზავნება. სამშობიაროში კი მშობლების პირადობის მოწმობები და ქორწინების მოწმობაა (არსებობის შემთხვევაში) წარსადგენი. თუმცა, დედების ნათქვამიდან გამომდინარე, როგორც ჩანს, სამშობიაროებში ეს წესი ყველაგან არ სრულდება.

გარდა ამისა, ბავშვის სახელისა და გვარის შეცვლა ნებისმიერ დროსაა შესაძლებელი. თუმცა, ამ პროცესს სხვადასხვა წინაპირობა აქვს.

სახელმწიფო სერვისების განვითარების სააგენტოს ვებგვერდზე ამასთან დაკავშირებით ვრცელი ინფორმაციაა.

სახელის ან/და გვარის შეცვლის შემდეგ პირს ეცვლება მონაცემი (სახელი ან/და გვარი), ხოლო დაბადების რეგისტრაციისას მისთვის მინიჭებული პირადი ნომერი უცვლელი რჩება.

სახელის ან/და გვარის შეცვლის რეგისტრაციის მოთხოვნით მოქალაქემ შეიძლება მიმართოს იუსტიციის სახლს ან სახელმწიფო სერვისების განვითარების სააგენტოს ტერიტორიულ სამსახურს.

სახელის შეცვლა შესაძლებელია დაინტერესებული პირისსურვილისამებრ.

• სრულწლოვან პირს უფლება აქვს, გვარი შეიცვალოს მხოლოდ ერთხელ, თუ კანონით სხვა რამ არ არის დადგენილი.
• სახელის შეცვლა დაუშვებელია, თუ განმცხადებელი სახელად ირჩევს ციფრებს, სასვენ ნიშნებს, გეომეტრიულ ფიგურებს, გრაფიკულ გამოსახულებებს, სიმბოლოებს, უცენზურო ან შეურაცხმყოფელ სიტყვებს ან მრავალწევრიან (ორზე მეტი სახელისაგან შემდგარ) სახელს.

თუ არასრულწლოვანი ხართ, სახელის ან გვარის შეცვლა ორივე მშობლის ან სხვა კანონიერი წარმომადგენლის თანხმობით შეგიძლიათ. ორივე მშობლის თანხმობა საჭირო არ არის, თუ 16 წელს მიღწეული პირის მეორე მშობელი გარდაცვლილია, სასამართლოს მიერ გამოცხადებულია გარდაცვლილად ან აღიარებულია უგზო-უკვლოდ დაკარგულად, ასევე, როცა მეორე მშობელს სასამართლოს გადაწყვეტილებით შეზღუდული ან ჩამორთმეული აქვს მშობლის უფლება ან სასამართლოს მიერ მიჩნეულია მხარდაჭერის მიმღებად.

სრულწლოვან პირს კი დამოუკიდებლად, მშობლების თანხმობის გარეშე, შეუძლია, გადაწყვეტილება, მიიღოს.

სახელის ან/და გვარის შეცვლის თაობაზე განცხადებისთვის წარმოსადგენი საბუთები:

• განმცხადებლის პირადობის დამადასტურებელი დოკუმენტი;
• განმცხადებლის დაბადების მოწმობა;
• განმცხადებლის არასრულწლოვანი შვილების დაბადების მოწმობები, თუ განმცხადებელს ჰყავს არასრულწლოვანი შვილები;
• მშობლის (მშობლების) ან სხვა კანონიერი წარმომადგენლის წერილობითი თანხმობა განმცხადებლის მიერ სახელის ან/და გვარის შეცვლაზე, თუ განმცხადებელი 16-იდან 18 წლამდე არასრულწლოვანია;
• 10 წლის ასაკს მიღწეული არასრულწლოვნის თანხმობა სახელის ან/და გვარის შეცვლაზე;
• გვარის შეცვლის შესაბამისი საფუძვლის დამადასტურებელი საბუთი.

იმშემთხვევაში,თუსახელისან/დაგვარისშეცვლისრეგისტრაციახორციელდებამინდობილიპირისდახმარებით,დამატებითწარმოსადგენიდოკუმენტებია:

• მინდობილობა (დამოწმებული სათანადო წესით);
• პირადობის დამადასტურებელი დოკუმენტი.

შენიშვნა:გვარის შეცვლის/გვარის დადგენის/გვარის კანონიერად აღიარების შესახებ განცხადების განხილვის დროს საჭიროა ზეპირი მოსმენის ჩატარება. განცხადება განუხილველად იქნება დატოვებული, თუ, შეტყობინების მიღების მიუხედავად, დაინტერესებული პირი არ გამოცხადდება სააგენტოს შესაბამის ტერიტორიულ სამსახურში ზეპირ მოსმენაში მონაწილეობისათვის.

მომსახურების ვადა და საფასური

60 კალენდარული დღე – 75 ლარი.

შეღავათები

მომსახურების საფასურის გადახდისაგან თავისუფლდებიან:

• იძულებით გადაადგილებული, დევნილად ცნობილი პირები;
• მომსახურების საფასურის 10%-ით გადახდისაგან თავისუფლდებიან სტუდენტები, რომლებზეც გაცემულია პირადობის (ბინადრობის) ელექტრონული მოწმობა აღნიშვნით – „სტუდენტი“.

ინფორმაციას ვრცლად შეგიძლიათ, სახელმწიფო სერვისების განვითარების სააგენტოს ვებგვერდზე გაეცნოთ.

თუ შვილისთვის სახელის გადარქმევა ან გვარის შეცვლა გსურთ - რა პროცედურების გავლაა ამისთვის საჭირო

ის, რომ ბავშვისთვის სახელის შერჩევა განსაკუთრებით საპასუხისმგებლო საქმეა, არაერთხელ აღუნიშნავთ ფსიქოლოგებს, რადგანაც არასწორად შერჩეულმა სახელმა შესაძლოა, არასრულწლოვანს დიდი ტკივილი და თვითშეფასების პრობლემები მოუტანოს. ამ თემაზე ბავშვთა ფსიქოლოგთან, ირმა ფეიქრიშვილთან, ვრცელი ინტერვიუ ჩავწერეთ. ინტერვიუდან ფრაგმენტს გაგიზიარებთ:

"ადამიანისთვის სახელი ძალიან მნიშვნელოვანია, რადგანაც მისი საშუალებით ვამყარებთ ერთმანეთთან კომუნიკაციას. სწორედ ამიტომ, სახელის შერჩევისას ყურადღებით უნდა ვიყოთ, ბავშვს უნდა მოსწონდეს ის, რაც ჰქვია და ამაზე პატარაობიდანვე უნდა ვესაუბროთ. შვილებისთვის უცნაური სახელების დარქმევით ხშირად მშობლები საკუთარი სტატუსის განმტკიცებას ცდილობენ, მაგრამ ბავშვებისთვის ზოგჯერ უცნაური სახელები ცოტა რთული ასატანია იმიტომ, რომ როდესაც მცირე ასაკში არიან ან უკვე მოზარდობის პერიოდში გადადიან, ყველასთან გათანაბრება სჭირდებათ. განცალკევება და განსხვავება კი ურთიერთობის დეფიციტს ჰქმნის. რაც უფრო მარტივად წარმოსათქმელია სახელი, მით უფრო ადვილია ადამიანთან კომუნიკაცია. საწყისი ნაბიჯები ზუსტად აქედან იწყება. როდესაც ბავშვს განსხვავებული სახელი აქვს, ეს ხშირად პრობლემას უქმნის, რადგან ხან არასწორად გამოთქვამენ და ითრგუნება ამის გამო, ხან სწორად გამოთქვამენ, მაგრამ რადგან უცნაურია, სასაცილო ხდება. მაგრამ, აუცილებლად უნდა აღვნიშნოთ, რომ მეორე მხარეცაა - როდესაც ბავშვს საკმაოდ კარგი თვითშეფასება აქვს, განსხვავებული სახელი განსაკუთრებულად მოსწონს და ამით თავადაც აკეთებს განაცხადს იმიტომ, რომ მშობლებმა მცირე ასაკიდან ინფორმაცია სწორად მიაწოდეს. მისთვის მისაღებიცაა და მარტივიც. ბავშვს საკუთარი სახელის გამო არასდროს უნდა ჰქონდეს დისკომფორტი. თუკი ის ამის გამო ნერვიულობს, სასურველია, რომ როგორც მას მოსწონს, შევუცვალოთ და დავუძახოთ ის, რაც სურს", - ამბობს ირმა ფეიქრიშვილი.

ინტერვიუ ვრცლად შეგიძლიათ, იხილოთ ბმულზე.