რა შეიძლება აჭამოთ ბავშვს დილით - ყველაზე სასარგებლო საუზმის ვარიანტები - მშობლები

სწორად შერჩეული საუზმე ბავშვს ენერგიით დაახლოებით 3–4 საათით მოამარაგებს - იმ დრომდე, სანამ სადილის დრო მოვა. იმისათვის, რომ ეს ენერგია საკმარისი იყოს, საუზმის კალორიულობა უნდა შეადგენდეს დაახლოებით 200–300 კკალ-ს, ანუ დღიური ნორმის 20–25%-ს.

დიეტოლოგები გვირჩევენ, რომ დილით ბავშვმა სხვადასხვა ჯგუფის პროდუქტი მიიღოს - ისეთი, რომლებიც შეიცავს ცილებს, ცხიმებსა და ნახშირწყლებს. განსაკუთრებით მნიშვნელოვანია, რომ საუზმე იყოს თბილი და სახლში მომზადებული, რადგან ასეთი საკვები ბევრად უფრო სასარგებლოა, ვიდრე მზა, მშრალი პროდუქტები.

პროდუქტები საუზმისთვის

ყველაზე ტრადიციული საუზმე ბავშვებისთვის არის რძიანი ფაფები. დიეტოლოგიური თვალსაზრისით, ეს ერთ-ერთი ყველაზე სწორი დილის საკვებია.

მარცვლეული წარმოადგენს რთული (ნელი) ნახშირწყლების წყაროს, რომლებიც ნელა შეიწოვება და ენერგიას თანდათანობით გამოყოფს. სწორედ ამიტომ, ასეთი საუზმის შემდეგ ბავშვი რამდენიმე საათის განმავლობაში არ გრძნობს შიმშილს.

კვებითი ღირებულებით პირველ ადგილს იკავებს:

• შვრიის ფაფა
• წიწიბურა

ფეტვი შეიცავს ბევრ ბოჭკოს და უფრო რთული ასათვისებელია. ამიტომ ბავშვთა რაციონში ის უმჯობესია სხვა მარცვლეულთან (ხშირად — ბრინჯთან) ან ბოსტნეულთან ერთად, მაგალითად, სტაფილოსთან ან გოგრასთან ერთად შევიდეს.

რძიანი ფაფა განსაკუთრებით სასარგებლოა, რადგან რძე ამდიდრებს კერძს სრულფასოვანი ცილით, ვიტამინებითა და მინერალებით.

თანამედროვე კვლევების მიხედვით, თუ ადამიანი საუზმეს არ იღებს, მას უფრო სწრაფად ემატება ზედმეტი წონა. მიზეზი ისაა, რომ საუზმე ასტიმულირებს იმ ჰორმონის გამომუშავებას, რომელიც დანაყრების შეგრძნებაზეა პასუხისმგებელი. რაც უფრო ნოყიერია საუზმე, მით უფრო დიდხანს გრძელდება დანაყრების შეგრძნება და დღის განმავლობაში ადამიანი ნაკლებს ჭამს.

კარგი ალტერნატივა

ტრადიციული საუზმის კარგი ალტერნატივა შეიძლება იყოს მიუსლი. მათი შემადგენლობა ხშირად მოიცავს:

• ხორბლის, ჭვავისა და შვრიის ფანტელებს
• ქატოს
• ხილის დანამატებს
• თხილეულს

უნდა გავითვალისწინოთ, რომ მარკეტებში შემოთავაზებული მშრალი საუზმეები შეიცავენ ბევრ რაფინირებულ, მარტივ ნახშირწყალს (შაქარს). მათი გაცნობა ჯობს გადაიდოს 4–5 წლამდე, ხოლო შემდეგაც გამოიყენოთ მაქსიმალურად იშვიათად.

ყოველ დილას ბავშვმა ასევე უნდა მიირთვას:

• პური
• კარაქი
• ყველი

ბავშვის საუზმე არ უნდა შემოიფარგლოს მხოლოდ ფაფებითა და ფანტელებით. არსებობს სხვა კერძებიც, რომლებიც ბავშვს მოეწონება და ენერგიით უზრუნველყოფს.

კვირაში 1–2-ჯერ საუზმედ შეიძლება შესთავაზოთ: ხაჭოთი მომზადებული კერძები (ვარენიკები, პუდინგი, "სირნიკები")

ხაჭო წარმოადგენს სრულფასოვანი ცილის წყაროს. შეიცავს ასევე კალციუმს, ფოსფორს და ვიტამინ B2-ს.

ბავშვებისთვის რეკომენდებულია ხაჭო არაუმეტეს 9% ცხიმიანობის.

იმავე სიხშირით შეიძლება მენიუში იყოს ომლეტი. კვერცხი მდიდარია ადვილად ასათვისებელი ცილით, ვიტამინებით: D, A, E, B2, B12

ომლეტთან ერთად შეგიძლიათ მიართვათ:

• ახალი ან კონსერვირებული ბოსტნეული (მაგალითად, მწვანე ბარდა)
• გახეხილი ყველი

როგორია საუკეთესო საუზმე ბავშვისთვის - ნატა გაგუას რჩევები