როდის აქვს მნიშვნელობა ნათლიის სქესს და საჭიროა თუ არა, ნათლობის დღეს მომავალ ნათლულს რაიმე აჩუქოთ - განმარტავს მოძღვარი - მშობლები
შეიძლება თუ არა ნათლიობაზე უარის თქმა? რომელ თაობამდე გრძელდება ნათლიასა და ნათლულს შორის სულიერი ნათესაობა? როგორ უნდა ავარჩიოთ ნათლია... - პასუხები აქტუალურ შეკითხვებზე
ნათლობასთან დაკავშირებით საზოგადოებაში ბევრი კითხვა და ხშირად არასწორი შეხედულებაც არსებობს: შეიძლება თუ არა ნათლიობაზე უარის თქმა და რა შემთხვევაშია ეს გადაწყვეტილება დასაშვები? რა ვალდებულება აქვს ნათლიას ნათლულის წინაშე და პირიქით? რამდენ თაობაზე ვრცელდება სულიერი ნათესაობა და როგორ უნდა იზრუნოს ნათლულმა გარდაცვლილი ნათლიის სულისთვის? რა თვისებებით უნდა გამოირჩეოდეს ადამიანი, რომელსაც შვილის ნათლიად ვირჩევთ?...
აღნიშნულ თემებზე გვესაუბრება მამა იაკობ მესტვირიშვილი:
- მამაო, პირველ რიგში ნათლობის საიდუმლოს არსზე ვისაუბროთ. რას გულისხმობს ნათლობა და რატომ ვუწოდებთ მას სულიერ შობას?
- ნათლობა ქრისტიანობაში ერთ- ერთი უმნიშვნელოვანესი საიდუმლოა - ადამიანის ახალი ცხოვრების დასაწყისი ღმერთში. ნათლისღების დროს ხდება ადამიანის ხელახლა შობა, ოღონდ უკვე არა ხორციელი, არამედ სულიერი ცხოვრებისთვის. როგორც მაცხოვარი გვასწავლის: „თუ ვინმე არ იშვება წყლითა და სულითა, ვერ შევა სასუფეველში“. ამ სიტყვებს ქრისტე ნიკოდიმოსს ეუბნება, რომელიც კითხვითვე პასუხობს - ნუთუ შესაძლებელია ასაკიანი ადამიანის დედის მუცელში მეორედ შესვლა? იესო უხსნის მას, რომ აქ საუბარია ადამიანის შინაგან განახლებაზე წყლისაგან და სულიწმინდის მიერ, რაც მღვდლის ხელდასხმით აღესრულება.
- რა ხდება ადამიანში ნათლობის დროს?
- ნათლობა არის გზა სასუფევლისკენ. ამ დროს ხდება ძველი, ცოდვილი ადამიანის „დამარხვა“ და ახალი, განწმენდილი ადამიანის აღდგომა ქრისტეში. ეს ერთადერთი საიდუმლოა იმ დაზიანებული ბუნებისგან განსაწმენდად, რომელიც ადამის ცოდვით დაცემის შემდეგ მემკვიდრეობით ყველა ადამიანზე გადადის . ნათლობისას სული განიწმინდება, იწყება სულიერი ცხოვრება, ადამიანი მადლით ღვთის შვილი ხდება და იღებს ძალას, იბრძოლოს ბოროტების წინააღმდეგ. წმინდა მამები ამბობენ, რომ ამ დროს ადამიანის გულში ინთება „ღვთის ნაპერწკალი“, რომელიც მან მთელი სიცოცხლის განმავლობაში უნდა შეინარჩუნოს. თუმცა, როდესაც ვცოდავთ, სულიერად ვსუსტდებით და ბოროტს საშუალებას ვაძლევთ, განსაცდელში ჩაგვაგდოს. ყოველი ცოდვა თავისი არსით მონობაა.
- როგორ უნდა აღვიდგინოთ სულიერი ძალები შეცოდების შემდეგ?
- სწორედ ამისთვის არსებობს აღსარება - ცოდვების აღიარება, რომლის დროსაც სული კვლავ განიწმინდება. ადამიანს ისევ ეძლევა ძალა, რომ გახდეს უკეთესი და წმინდა ზიარებით კიდევ უფრო მეტად მიუახლოვდეს უფალს.
- ნათლიის როლზე და მის მთავარ დანიშნულებაზეც ვისაუბროთ, რა არის ნათლიის უმთავრესი მოვალეობა?
- ნათლია არ არის უბრალოდ ნათლობის საიდუმლოს მოწმე ან ჩვეულებრივი მონაწილე, იგი სულიერი მშობელია. მისი მთავარი დანიშნულებაა, მუდმივად ილოცოს ნათლულისთვის. უპირველესად, თავად ნათლია უნდა დადიოდეს ტაძარში, სადაც ილოცებს მისთვის და მოიხსენიებს ყოველ წირვაზე.
ნათლიამ უნდა იზრუნოს ნათლულის სულიერ ზრდაზე, ასწავლოს მას რწმენა, ლოცვა და თავად იყოს ქრისტიანული ცხოვრების მაგალითი. მისი მოვალეობაა, დაეხმაროს ნათლულს ეკლესიასთან ურთიერთობაში და მთელი ცხოვრების მანძილზე სულიერად პატრონობდეს მას.
- რატომ ეწოდება ნათლიას „მიმრქმელი“?
- სიტყვა „მიმრქმელი“ ნიშნავს მიმღებს. სიმბოლურად, ნათლია ბავშვს სულიერ ოჯახში იღებს და ხდება მისი „მიმღები“ ქრისტეში. იგი იღებს პასუხისმგებლობას ნათლულის სულიერ აღზრდაზე. ნათლიასა და ნათლულს შორის კი ღრმა სულიერი კავშირი მყარდება.
- მამაო, რატომ ჩუქნის ნათლია ნათლულს ჯვარს და რისი სიმბოლოა ნათლობისას მიღებული ჯვარი?
ჯვარი ჩვენი ხსნის იარაღია, ის გვიცავს და გვიფარავს ბოროტისაგან. ნათლია ნათლულს ჯვარს სწორედ ამიტომ ჩუქნის - ეს არის მისი ფარი, მისი მცველი და უნდა ახსოვდეს, რომ ეს არის მისი გადარჩენის გზა.
- რა თვისებებით უნდა გამოირჩეოდეს ადამიანი, რომელსაც შვილის ნათლიად ვირჩევთ?
- თავდაპირველად გავითვალისწინოთ, რომ ეს ადამიანი თავად იყოს ქრისტიანი - თავისი ცხოვრების წესით, კარგი ადამიანობითა და ქრისტიანობით. სწორედ ამით უნდა ვიხელმძღვანელოთ და არა სოციალური სტატუსის მიხედვით. თუ ნათლია თავად არ არის აღმსარებელი და მაზიარებელი, იგი ვერ შეძლებს ნათლულის სულიერ წინამძღოლობას. თავად ბნელში მყოფი როგორ წაიყვანს სხვას ნათელში? ნათლია უნდა იყოს სიმართლის, სინათლისა და სიყვარულის სახე.
- მიეტევება თუ არა ნათლიას ნათლულის მიმართ სულიერი უყურადღებობა?
- ნათლია, უპირველეს ყოვლისა, ნათლულისთვის ლოცვით უნდა ზრუნავდეს. რაც არ უნდა უქადაგოს ნათლიამ, თუ თავად არ არის ჭეშმარიტი ქრისტიანი, მის სიტყვას აზრი ეკარგება. თუ ნათლული დაინახავს, რომ მისი ნათლია კარგი ქრისტიანია - მლოცველი, მმარხველი და მიმტევებელი - მას ბევრი საუბარი აღარც დასჭირდება, თავისთავად გაუჩნდება სურვილი, რომ ნათლიას მიბაძოს.
- შეიძლება თუ არა ნათლობაზე უარის თქმა? გავრცელებულია აზრი, რომ ნათლიობაზე უარის თქმა არ შეიძლება.
- ეს არასწორია. ყველანი უნდა ვეცადოთ, რომ ჩვენ- ჩვენი ჯვარი ვიტვირთოთ. მაგალითად, თუ მომავალი ნათლულის ოჯახი არ ცხოვრობს ქრისტეს მცნებებით, არ არიან ქრისტიანობის სახე, უმჯობესია, უარი ვთქვათ. ნათლიობა დიდი სულიერი პასუხისმგებლობაა და არა უბრალოდ ფორმალობა.
- როგორ უნდა მოიქცეს ადამიანი, თუ მისი ნათლია სხვა აღმსარებლობის პირი გახდა?
ეს სარწმუნოების ღალატია, მაგრამ არ დაგვავიწყდეს, რომ იუდამ უღალატა ქრისტეს, თუმცა მაცხოვარი მას შანსს აძლევდა. ჩვენც უნდა მივცეთ ადამიანს შანსი - სანამ ცოცხალია, მასზე ზრუნვა არ უნდა შევწყვიტოთ. უნდა ვეცადოთ, შევიდეთ პოლემიკაში, ავუხსნათ არგუმენტებით და, ვილოცოთ მისთვის.
- როგორ უნდა მოიქცეს ნათლული ნათლიის გარდაცვალების შემთხვევაში?
- ნათლია სულიერი მშობელია. როდესაც ადამიანს გარდაეცვლება ახლობელი, იგი მისთვის ყველაფერს აკეთებს და ეს, პირველ რიგში, არის ლოცვა: მოხსენიება წირვაზე, პირად ლოცვებში ფსალმუნთა კითხვა და ისეთივე ზრუნვა, როგორც ვზრუნავთ ნებისმიერ ახლობელზე.
- უნდა დაეხმაროს თუ არა ნათლია ნათლულს მოძღვრის შერჩევაში?
- დახმარება და რჩევა კარგი იქნება, თუმცა უმჯობესია, ადამიანმა მოძღვარი თავად შეარჩიოს. სასულიერო პირი ნათლიისთვის შეიძლება ძალიან კარგი სულიერი წინამძღვარი იყოს, მაგრამ ნათლული მასთან ვერ გაიხსნას. მოძღვარი ადამიანის სულთან ახლოს უნდა მივიდეს, რადგან ის სულიერი წინამძღოლი, უფალთან მიმყვანებელია.
- აქვს თუ არა მნიშვნელობა, როგორი მასალის ჯვარს აჩუქებს ნათლია ნათლულს?
- ამას მნიშვნელობა არ აქვს. მთავარია, ნათლიამაც და ნათლულმაც სულიერი საკითხები გაიაზრონ. შესაძლოა, ნათლიამ ოქროს ან ბრილიანტის ჯვარი აჩუქოს, მაგრამ ერთი უბრალო ლოცვაც არ თქვას ნათლულისთვის და თავისი ცხოვრებით შორს იყოს ქრისტესგან.
- რამდენად აუცილებელია ნათლიის ნაჩუქარი ჯვრის მუდმივი ტარება და როგორ უნდა მოვიქცეთ მისი დაკარგვის ან დაზიანების შემთხვევაში?
- ზოგადად, ჯვარი ყველამ უნდა ატაროს, შეგვძლია ნათლობის ჯვარიც ვატაროთ, ეს თავად ადამიანის გადასაწყვეტია. დაკარგვის ან დაზიანების შემთხვევაში, თუ აღდგენა შესაძლებელია, აღვადგენთ, თუ არა - ახალს ვიყიდით, მოძღვარს ვაკურთხებინებთ და ვატარებთ.
- მხოლოდ სულიერი გზის მასწავლებელია ნათლია, თუ ნათლულს მიწიერი, ყოფითი საკითხების მოგვარებაშიც უნდა ეხმარებოდეს?
- უფალი ბრძანებს: „ურთიერთას სიმძიმე იტვირთეთ და ესრეთ აღასრულეთ სჯული იგი ქრისტესი“. ზოგადად, ყველა ადამიანს გვაქვს ერთმანეთის შეხიდებისა და ურთიერთსიყვარულის ვალდებულება. სწორედ ამით მტკიცდება ქრისტეს სიყვარული და ეს უნდა იყოს ნათლიასა და ნათლულს შორისაც. ჩვენ ერთმანეთთან უხილავი ჯაჭვით ვართ დაკავშირებული, რასაც ნათელი ჰქვია. ამიტომ, ნივთებზე მეტად, უნდა ვეცადოთ, ერთმანეთის მიმართ სიყვარული საქმით დავამტკიცოთ.
- უნდა აჩუქოს ნათლიამ ნათლულს ჯვრის გარდა საჩუქარი და აქვს თუ არა მას რაიმე ნივთის მიტანის ვალდებულება?
- ამას არავითარი მნიშვნელობა არ აქვს და მსგავსი ვალდებულება არსად წერია. ნებისმიერი დამატებითი საჩუქარი მხოლოდ ნათლიის მატერიალურ შესაძლებლობაზეა დამოკიდებული. მთავარი მაინც სულიერი კავშირი და ზრუნვაა.
- რამდენად სასურველია ნათლისღების დღესასწაულზე ნათლიისთვის საჩუქრის მირთმევა?
- ნათლიისთვის საჩუქრის მირთმევა მხოლოდ ლამაზი ჟესტია და არა საეკლესიო აუცილებლობა. მატერიალურად საჩუქარი ადამიანს ახარებს და შეგვიძლია ამ ფორმითაც გამოვხატოთ ყურადღება, ხორციელადაც გავახაროთ ნათლია.
- რომელ თაობამდე გრძელდება ნათლიასა და ნათლულს შორის სულიერი ნათესაობა და ვისზე ვრცელდება იგი?
- სულიერი ნათესაობა შვიდ თაობამდე გრძელდება პირდაპირი ხაზით. ეს არის მყარი სულიერი კავშირი, რომელიც ისევე უნდა იქნას გათვალისწინებული, როგორც ხორციელი ნათესაობა.
- რამდენად დასაშვებია, რომ მეჯვარეებმა (რომლებიც დაქორწინებულები არ არიან) ერთად მონათლონ ბავშვი და გამორიცხავს თუ არა ეს მათ ქორწინებას?
- მეჯვარეებს შეუძლიათ ერთად მონათლონ ერთი ბავშვი, თუმცა ამ შემთხვევაში ისინი სულიერი ნათესავები ხდებიან და მომავალში ერთმანეთზე დაოჯახებას ვეღარ შეძლებენ.
- რა ასაკიდან აქვს ადამიანს უფლება, რომ იკისროს ნათლიის პასუხისმგებლობა?
- ნათლიას გააზრებული უნდა ჰქონდეს ნათლიის ვამდებულება. ნათლიობა საპასუხისმგებლო საქმეა, ამიტომ სასურველია ის იყოს ზდასრული.
- გარდა პატივისცემისა, რა კონკრეტული სულიერი ვალდებულებები აკისრია ნათლულს თავისი ნათლიის წინაშე?
- ნათლული უნდა უსმენდეს და უჯერებდეს ნათლიას. ეს არის ურთიერთობა, რომელიც დაფუძნებულია სულიერ მორჩილებაზე, რადგან ნათლია მისი გზამკვლევია ქრისტიანულ ცხოვრებაში.
- ნათლიის შერჩევისას რამდენად პრინციპულია ნათლულისა და ნათლიის სქესის თანხვედრა?
- ნათლია შეიძლება იყოს ერთი ბიჭი და ერთი გოგო. თუმცა, თუ ბავშვს მხოლოდ ერთი ნათლია ჰყავს, უმჯობესია, სქესის თანხვედრა იყოს დაცული: ბიჭს ჰყავდეს მამაკაცი ნათლია, ხოლო გოგოს - ქალი ნათლია.
შორენა მერკვილაძე
