დღეს ყველა ცდილობს ზედმეტი კილოგრამები არ მოიმატოს. შესაბამისად, გაძლიერებული მადა ამ მიზნის მიღწევაში ყველაზე მეტად გვიშლის ხელს. საკვებმა სრულფასოვნად უნდა დაგანაყროთ, თუმცა ზოგიერთი პროდუქტი პირველ წუთებში დანაყრებულად გვაგრძნობინებს თავს, თუმცა ძალიან მალე შიმშილი ისევ ბრუნდება. შედეგად ადამიანი უფრო ბევრს და ხშირად ჭამს, უჭირს მადის კონტროლი და ზედმეტი კილოგრამების დაგროვების რისკიც იზრდება.
ეს პროცესი პირდაპირ უკავშირდება გლიკემიურ ინდექსს — მაჩვენებელს, რომელიც აჩვენებს, რამდენად სწრაფად ზრდის პროდუქტი სისხლში შაქრის დონეს. თუ საკვებს დაბალი გლიკემიური ინდექსი აქვს, შაქარი ნელა იმატებს და დანაყრების შეგრძნებაც უფრო დიდხანს ნარჩუნდება. ხოლო მაღალი გლიკემიური ინდექსის მქონე პროდუქტები სისხლში შაქარს სწრაფად ზრდის, თუმცა მალევე ასევე სწრაფად ამცირებს, რის შემდეგაც შიმშილი ისევ ძლიერდება.
რომელი პროდუქტები იწვევს ყველაზე სწრაფად შიმშილის დაბრუნებას?
კარტოფილი
მნიშვნელობა არ აქვს, კარტოფილი რა ფორმით არის მომზადებული — ფრი, პიურე თუ მოხარშული. მისი გლიკემიური ინდექსი მაინც საკმაოდ მაღალია. განსაკუთრებით სწრაფად ზრდის შაქარს შემწვარი კარტოფილი, რის გამოც დანაყრება ხანმოკლეა და მალე ისევ გშივდებათ.
ხილის წვენები
ყველაზე პრობლემური შეფუთული, მაღაზიაში ნაყიდი წვენებია. მაშინაც კი, თუ ეტიკეტზე წერია, რომ უშაქროა, მასში შაქარი ხშირად მაინც არის დამატებული.
თუმცა ყველა ახალდაწურული წვენიც სასარგებლო არ არის. როდესაც წვენი იფილტრება და მხოლოდ სითხე რჩება, მასთან ერთად ქრება ბოჭკოც, რომელიც დანაყრებისთვის ძალიან მნიშვნელოვანია. შედეგად ორგანიზმი ფაქტობრივად მხოლოდ შაქარს იღებს.
დიეტოლოგები გვირჩევენ, წვენი რბილობით მივიღოთ, რადგან ბოჭკო დანაყრების შეგრძნებას ახანგრძლივებს. ასევე, უმჯობესია მთლიან ხილს მივირთვათ, ვიდრე გაფილტრული წვენი. უშაქრო კომპოტი შეფუთულ ტკბილ წვენებზე უკეთესი არჩევანია, თუმცა ბოჭკოს ძირითადი ნაწილი მაინც მთლიან ხილში რჩება.
ყველაზე მაღალი შაქრის შემცველობის მქონე ხილია:
- საზამთრო
- ბანანი
- ნესვი
- ქიშმიში
- ფინიკი
თეთრი პური
თეთრი პური რაფინირებული ფქვილისგან მზადდება და მისი გლიკემიური ინდექსი თითქმის მაქსიმალურია. ეს არ ნიშნავს, რომ მისი ჭამა საერთოდ აკრძალულია, თუმცა უკეთესია არჩევანი პერიოდულად მაინც გააკეთოთ:
- ჭვავის პურზე
- მთლიანი მარცვლის პურზე
- ქატოთი გამდიდრებულ პურზე
ასეთი პროდუქტები უფრო მეტ ბოჭკოს შეიცავს და შიმშილის შეგრძნებას უფრო გვიან იწვევს.
ალკოჰოლი
ალკოჰოლი თითქმის ყოველთვის უფრო დიდი რაოდენობით საკვების მიღებას გვაიძულებს. გარდა ამისა, ის ორგანიზმში გლიკოგენის დონეს ამცირებს და სისხლში შაქრის მერყეობას იწვევს, რის შემდეგაც მადა ძლიერდება.
სპეციალისტები აღნიშნავენ, რომ განსაკუთრებით მაღალი გლიკემიური ინდექსი ლუდს აქვს.
ჰამბურგერი
ერთი შეხედვით ჰამბურგერი ძალიან ნოყიერი საკვებია, მაგრამ სინამდვილეში მასში არსებული თეთრი ფუნთუშა, ცხიმიანი ხორცი და ტკბილი სოუსები სწრაფი ნახშირწყლების კომბინაციას ქმნის, რომელიც მალევე ისევ შიმშილს იწვევს.
უკეთესი გამოსავალია ბურგერის სახლში მომზადება:
- მეტი ბოსტნეულის დამატება;
- თეთრი პურის ჩანაცვლება მარცვლოვანი ან ჭვავის პურით;
- ტკბილი სოუსების გამორიცხვა.
მიუსლი და გრანოლა
მიუხედავად იმისა, რომ მიუსლი ბევრს დიეტურ პროდუქტად მიაჩნია, ის ხშირად პირიქით მოქმედებს. მაღალ ტემპერატურაზე დამუშავების გამო მარცვლეული ბევრ სასარგებლო თვისებას კარგავს, ხოლო გლიკემიური ინდექსი საკმაოდ მაღალი ხდება.
ამის გამო ასეთი საუზმის შემდეგ შიმშილი მალევე ბრუნდება.
დიეტოლოგები გვირჩევენ, მიუსლი ჩავანაცვლოთ:
- შვრიის ფანტელებით
- ან ქატოთი
რომელსაც შეგვიძლია ახალი ხილიც დავუმატოთ.
მწნილები
მწნილები შაქრის გამო კი არა, სანელებლებისა და მარინადის გამო აძლიერებს მადას. ისინი საჭმლის მომნელებელი სისტემის მუშაობას ააქტიურებს და კუჭის წვენის გამოყოფას ზრდის, რაც შიმშილის შეგრძნებას აძლიერებს.
ამიტომ სპეციალისტები გვირჩევენ, მწნილი მხოლოდ ძირითადი საკვების დამატებად მივიღოთ და თუ წონაში კლბას ცდილობთ, მისგა თავი შეიკავოთ.
კარაქი და ღორის ხორცი
ნეაპოლის უნივერსიტეტის მეცნიერებმა დაადგინეს, რომ გაჯერებული ცხიმები ზემოქმედებს ჰიპოთალამუსზე — ტვინის იმ ნაწილზე, რომელიც შიმშილსა და დანაყრებას აკონტროლებს.
განსაკუთრებით ძლიერ გავლენას ახდენს ღორის ცხიმი და კარაქი.
კვლევების მიხედვით, ადამიანები, რომლებიც ხშირად იღებენ ასეთ პროდუქტებს, უფრო ხშირად გრძნობენ შიმშილს, მეტს ჭამენ და მადის კონტროლი უფრო უჭირთ.
