"თემოს დიაგნოზს რაც შეეხება... ორსულობისას მეუბნებოდნენ, რომ ყველაფერი წესრიგშია. რომ დაიბადა, მე გამიჩნდა ეჭვი..." - მაკა ჩიჩუა დაუნის სინდრომის მქონე შვილის აღზრდაზე, პრობლემებზე და მშობლის გამოცდილებაზე - მშობლები
"თემოს დიაგნოზს რაც შეეხება... ორსულობისას მეუბნებოდნენ, რომ ყველაფერი წესრიგშია. რომ დაიბადა, მე გამიჩნდა ეჭვი..." - მაკა ჩიჩუა დაუნის სინდრომის მქონე შვილის აღზრდაზე, პრობლემებზე და მშობლის გამოცდილებაზე
სოფო ჯაფარიძის გადაცემა მედ გიდი დაუნის სინდრომს მიეძღვნა. გადაცემის ერთ-ერთი სტუმარი, როგორც მშობელი, ყოფილი პირველი ლედი მაკა ჩიჩუა გახლდათ, პატარა თემო მარგველაშვილთან ერთად. მაკა ჩიჩუამ თავის გამოცდილებაზე გულახდილად ისაუბრა, ასევე იმაზე, თუ როგორ გაიგო პირველად, რომ თემოს დაუნის სინდრომი ჰქონდა.
- თემოს დიაგნოზს რაც შეეხება... ჩემთვის ეს ყველაფერი იყო განსაკუთრებული. ჩემი შვილი წელს ხდება 35 წლის. წარმოგიდგენია? მაშო იყო 23-ის, რომ მე გადავწყვიტე და ძაან მინდოდა ბავშვი. თემო რომ ჩაისახა და გავარკვიეთ, რომ ნამდვილად ორსულად ვარ, ექოსკოპიაზე დავდიოდი ძალიან ხშირად, იმხელა ინტერესო და სიხარული მქონდა... სპეციალური ანალიზი, გენეტიკური ანალიზი არ გამიკეთებია. არ გავიკეთე იმიტომ, რომ არც კისრის ნაოჭზე, არც ცხვირის ძგიდეზე, საიდანაც იგებენ 12 კვირაზე, არ ყოფილა არაფერი საეჭვო. მეუბნებოდნენ, რომ ყველაფერი არის წესრიგში, რომ ნაყოფი არის ფანტასტიკური და მართლაც ფანტასტიკურია. და სხვათა შორის მინდა გითხრა, რომ ძალიან კარგია, რომ არ ვიცოდი. რატომ, იცი? ეს იქნებოდა ჩემთვის, ორსულობის დროს სტრესი. არ შევცვლიდი არაფერს, მაგრამ სტრესი იქნებოდა, რომ ვიცხოვრებდი ამ განცდით, რომ რა იქნება და როგორ უნდა ვმართო და რა პრობლემას დავეჯახები და ნუ, მაინც დავიძაბებოდი.
შემდეგ უკვე, მე გამიჩნდა ეჭვი, ჩემს პედიატრთან ერთად. მას გავუზიარე. მაშინვე, რომ დავინახე. მიუხედავად იმისა, რომ არავის არ გასჩენია ეჭვი. ჩვეულებრივი, სიმპათიური ბავშვი იყო, არ ჰქონდა გამოხატული გარეგნული ნიშნები.
