Air Astana ყაზახეთსა და საქართველოს შორის პირდაპირი ფრენების 15 წლის იუბილეს აღნიშნავს - მშობლები

ავიაკომპანია Air Astana ყაზახეთსა და საქართველოს შორის პირდაპირი საჰაერო მიმოსვლის დაწყებიდან 15 წლის იუბილეს აღნიშნავს. კომპანიის ინფორმაციით, პირველი პირდაპირი რეისი ალმათისა და თბილისის მიმართულებით 2011 წლის ივნისში შესრულდა, რის შემდეგაც ეტაპობრივად გაფართოვდა ორ ქვეყანას შორის საჰაერო კავშირების ქსელი.

ამჟამად Air Astana და მისი დაბალბიუჯეტიანი შვილობილი ავიაკომპანია FlyArystan ზაფხულის ტურისტულ სეზონზე კვირაში 44-მდე რეისს ასრულებენ. ფრენები ხორციელდება ალმათიდან, ასტანადან, ატირაუდან და აქთაუდან თბილისის, ბათუმისა და ქუთაისის მიმართულებით.

Air Astana Group-ის მონაცემებით, 2011 წლიდან დღემდე საქართველოს მიმართულებით არაერთი ახალი მარშრუტი დაემატა. მათ შორისაა ასტანა-თბილისის, ატირაუ-თბილისის, ალმათი-ბათუმის, ალმათი-ქუთაისის, ასტანა-ქუთაისის, ასტანა-ბათუმისა და აქთაუ-ბათუმის რეისები.

2026 წლის ზაფხულის სეზონზე Air Astana მგზავრებს კვირაში 25, ხოლო FlyArystan 19 რეგულარულ რეისს სთავაზობს. კომპანიის შეფასებით, აღნიშნული მიმართულებების პოპულარობა ყაზახეთსა და საქართველოს შორის ეკონომიკური, ტურისტული და კულტურული ურთიერთობების გაღრმავებას უკავშირდება.

კომპანიის ინფორმაციით, 2025 წელს Air Astana Group-მა ორ ქვეყანას შორის არსებულ მარშრუტებზე 270 ათასზე მეტი მგზავრი გადაიყვანა, რაც წინა წელთან შედარებით 17%-ით მეტია.

Air Astana აღნიშნავს, რომ საქართველო მზარდ მნიშვნელობას იძენს ტრანზიტული მგზავრებისთვისაც, რომლებიც ალმათისა და ასტანის ჰაბების გავლით მოგზაურობენ. იმ მგზავრებს, რომელთა გადაჯდომის დრო ამ აეროპორტებში 10 საათს აღემატება, ავიაკომპანია Stopover Holiday-ისა და Mytour-ის პროგრამებს სთავაზობს, რომლებიც ტურსა და განთავსებას მოიცავს. კომპანიის ცნობით, პირველი ღამის ღირებულება 30 აშშ დოლარიდან იწყება.

Air Astana-ს სამგზავრო და სატვირთო გადაზიდვების დირექტორის, სერიკ რის-ულის განცხადებით, საქართველო კომპანიის რეგიონულ ქსელში ერთ-ერთ მნიშვნელოვან ბაზრად რჩება.

„გასული თხუთმეტი წლის განმავლობაში ჩვენ მუდმივად ვაფართოებდით მომსახურებას როგორც ტურისტულ, ისე ბიზნესმოგზაურობაზე მზარდი მოთხოვნის საპასუხოდ. კვლავ ვაგრძელებთ მუშაობას ყაზახეთსა და საქართველოს შორის კავშირების გაძლიერებისა და მგზავრებისთვის ცენტრალური აზიისა და აზიის სხვა მიმართულებებზე კომფორტული ხელმისაწვდომობის უზრუნველსაყოფად“, – განაცხადა სერიკ რის-ულიმ.

Air Astana Group ცენტრალური აზიის ერთ-ერთი უმსხვილესი საავიაციო ჯგუფია. კომპანია აერთიანებს სრულსერვისიან ავიაკომპანია Air Astana-სა და დაბალბიუჯეტიან FlyArystan-ს და 63 საჰაერო ხომალდისგან შემდგარ ფლოტს მართავს. ჯგუფი სამგზავრო და სატვირთო გადაზიდვებს ცენტრალური აზიის, კავკასიის, შორეული აღმოსავლეთის, სპარსეთის ყურის, ინდოეთისა და ევროპის მიმართულებებით ახორციელებს.

R