სილამაზის დედოფალი საქმროსთან ერთად გარდაცვლილი იპოვეს: "ერთად იყვნენ უკანასკნელ წუთამდე" - მშობლები
სილამაზის დედოფალი საქმროსთან ერთად გარდაცვლილი იპოვეს: "ერთად იყვნენ უკანასკნელ წუთამდე"
ვენესუელაში მომხდარი დამანგრეველი სტიქიური უბედურების შედეგად 2500-ზე მეტი ადამიანი დაიღუპა, 12 000-ზე მეტი დაშავდა, ხოლო ასობით მოქალაქე დაკარგულად ითვლება. მიწისძვრამ ვენესუელელი ლამაზმანის, არაერთი სილამაზის კონკურსის გამარჯვებული სკარლენტ როდრიგესის სიცოცხლეც შეიწირა.
საუკუნის კატასტროფა ვენესუელაში
24 ივნისს ვენესუელას ბოლო ათწლეულების განმავლობაში უმძლავრესი მიწისძვრა დაატყდა თავს. 7.2 და 7.5 მაგნიტუდის მიწისქვეშა ბიძგები ერთ წუთზე ნაკლები ინტერვალით განმეორდა, ხოლო მათი ეპიცენტრი იარაკუის შტატში მდებარეობდა. სამაშველო სამუშაოები დღემდე გრძელდება. ბოლო ოფიციალური მონაცემებით, დაღუპულია სულ მცირე 2645 ადამიანი, 12.6 ათასზე მეტმა მიიღო სხვადასხვა დაზიანება, ხოლო ათასობით ოჯახი უსახლკაროდ დარჩა.
სტიქიის მსხვერპლთა შორის აღმოჩნდა 23 წლის სილამაზის დედოფალი სკარლენტ როდრიგესიც. რამდენიმე დღის განმავლობაში გოგონა და მისი შეყვარებული, ხოსე კასტრო, დაკარგულებად ითვლებოდნენ. ახლობლებს ბოლო წუთამდე ჰქონდათ იმედი, რომ მათ ნანგრევებიდან თავის დაღწევა მოახერხეს, თუმცა 29 ივნისს მაშველებმა მათი ცხედრები ლა-გუაირას შტატის ქალაქ კატია-ლა-მარში, ერთ-ერთ დანგრეულ საცხოვრებელ კომპლექსში აღმოაჩინეს.
ტრაგედია, რომელმაც მთელი ოჯახი იმსხვერპლა
სტიქიამ არა მხოლოდ ახალგაზრდა წყვილის სიცოცხლე შეიწირა — ხოსესთან ერთად დაიღუპნენ მისი მამა, ბებია, ბიძა და დეიდა. მომხდარის შესახებ საზოგადოებას სკარლენტისა და ხოსეს დედებმა შეატყობინეს და ოჯახების დასახმარებლად სახსრების შეგროვება გამოაცხადეს: „სამწუხაროდ, ორივე გარდაცვლილი იპოვეს... ისინი ერთად იყვნენ უკანასკნელ წუთამდე. სიტყვები არ გვყოფნის იმ ტკივილის აღსაწერად, რასაც განვიცდით“.
სკარლენტი წარმოშობით ვენესუელელი იყო, თუმცა ბოლო დროს აშშ-ში ცხოვრობდა და სამოდელო კარიერას აწყობდა. 2025 წელს გოგონამ მოიპოვა ტიტული „მის გრანდ ორლანდო“, რის შემდეგაც „მის გრანდ ფლორიდას“ კონკურსზე წარსდგა. მიუხედავად იმისა, რომ მაშინ გამარჯვება ვერ შეძლო, ორგანიზატორებმა და მოდის ინდუსტრიის წარმომადგენლებმა მისი გამოსვლა მაღალ დონეზე შეაფასეს.
გოგონას დაღუპვის შესახებ ცნობის გავრცელების შემდეგ, „მის გრანდ ფლორიდას“ დირექციამ ოფიციალური განცხადება გამოაქვეყნა: „ღრმა მწუხარებით განვიცდით სკარლენტ როდრიგესის გარდაცვალებას ვენესუელაში მომხდარი დამანგრეველი მიწისძვრის შედეგად. ვუსამძიმრებთ მის ოჯახს, ახლობლებსა და ყველას, ვისაც ეს გულსაკლავი კატასტროფა შეეხო“.
სოციალურ ქსელებში სკარლენტი ხშირად აზიარებდა ფოტოებს გადაღებებიდან, კონკურსებიდან და მოგზაურობებიდან. ტრაგედიის შემდეგ მისი გვერდები თანაგრძნობის სიტყვებით აივსო. გამომწერები წერენ, რომ იგი არა მხოლოდ ლამაზი, არამედ საოცრად გულისხმიერი და კეთილი გოგონა იყო.
24 ივნისის საღამოს მომხდარი მიწისძვრა ვენესუელისთვის ბოლო ასზე მეტი წლის განმავლობაში ყველაზე დამანგრეველი აღმოჩნდა. ხელისუფლების ინფორმაციით, სრულად დაინგრა 189 შენობა, თითქმის 900-მა კი სერიოზული დაზიანება მიიღო. 15 ათასზე მეტმა ადამიანმა დაკარგა საცხოვრებელი. სამძებრო-სამაშველო ოპერაციის განმავლობაში 6400-ზე მეტი ადამიანის გადარჩენა მოხერხდა, ხოლო დაზარალებულებისთვის სამედიცინო და ჰუმანიტარული დახმარების გაწევა კვლავ გრძელდება.
მსგავსი ტრაგედიები სილამაზის დედოფლების ისტორიაში
სამწუხაროდ, ეს არ არის პირველი შემთხვევა, როცა მიწისძვრას სილამაზის კონკურსის გამარჯვებულის სიცოცხლე შეიწირა.
გასული წლის გაზაფხულზე, მიანმარში მომხდარი დამანგრეველი მიწისძვრის დროს დაიღუპა 28 წლის „მის ტურიზმი მიანმარის“ მფლობელი სილი მი. გოგონა ბოლო წუთამდე ეხმარებოდა ადამიანებს და, ადგილობრივი მედიის ცნობით, ბავშვის გადარჩენას ცდილობდა, როდესაც საცხოვრებელი სახლი ჩამოინგრა. მაშინ მიწისქვეშა ბიძგები იმდენად ძლიერი იყო, რომ მეზობელ ქვეყნებშიც — ტაილანდში, ვიეტნამსა და ჩინეთშიც კი იგრძნობოდა.
