"შეიძლებოდა საფერფლე ესროლა... გვცემდა მაღალგვქუსლიანი ფეხსაცმლით, ტელეფონით — რაც ხელში მოხვდებოდა... დაგვცინოდა ფიზიკური ნაკლოვანებების გამო" - ჯონი დეპის მძიმე აღიარება დედაზე, რომელსაც ყველაფერი აპატია და სიკვდილამდე ზრუნავდა - მშობლები
"შეიძლებოდა საფერფლე ესროლა... გვცემდა მაღალგვქუსლიანი ფეხსაცმლით, ტელეფონით — რაც ხელში მოხვდებოდა... დაგვცინოდა ფიზიკური ნაკლოვანებების გამო" - ჯონი დეპის მძიმე აღიარება დედაზე, რომელსაც ყველაფერი აპატია და სიკვდილამდე ზრუნავდა
სამწუხაროდ, ხშირად ისე ხდება, რომ ყველაზე ძვირფასი და მნიშვნელოვანი ადამიანები - მშობლები, ხანდახან ყველაზე დიდ მტრებად ევლინებიან. მსოფლიოში ცნობილი ადამიანებიდანაც ბევრი ქცეულა მშობლების მხრიდან ფიზიკური, ფსიქოლოგიური, სექსუალური ძალადობის, გულგრილობის მსხვერპლი და ბევრი ამაზე ღიად საუბრობს. ამით მათ სურთ, მაგალითი მისცენ სხვებს, აჩვენონ, რომ მარტონი არ არიან და ამის გამოთქმა, სპეციალისტების დახმარება მნიშვნელოვანია. ასევე მოტივაცია მისცენ იმ ბავშვებს, რომლებიც ამ წუთას განიცდიან იმავეს, მისცენ გაბედულება შველის თხოვნის და იმედი, რომ ესეც გაივლის და ეს არ იქნება მხოლოდ განმსაზღვრელი მათი ცხოვრების...
ჯონი დეპი ერთ-ერთია მსოფლიოში ცნობილ ადამიანებს შორის, რომელიც ბავშვობაში მუდმივად განიცდიდა ფიზიკურ და ფსიქოლოგიურ ძალადობას დედის მხრიდან. ამაზე საუბარი მას სასამართლო პროცესზე მოუწია, ემბერ ჰერდთან ხმაურიანი გარჩევების დროს. მაშინ ჯონმა და მისმა დამ ისაუბრეს ღიად ბავშვობის ტრავმაზე, იმის საჩვენებლად, რომ ბავშვობაში განცდილმა ძალადობამ გავლენა მოახდინა მის ფსიქოლოგიურ მდგომარეობასა და ურთიერთობებზე...
ჯონი წლების განმავლობაში დედის მხრიდან ფიზიკურ და სიტყვიერ ძალადობაზე საუბრობდა. ჩვენებაში ყვებოდა, რომ მისი დედა, ბეტი სუ პალმერი, იყო ძალიან მკაცრი, არაპროგნოზირებადი და ხშირად ძალადობრივი. ის სცემდა შვილებს სხვადასხვა საგნით (მაგალითად, ქამრით, ჯოხით ან სხვა ნივთებით); რეგულარულად აყენებდა სიტყვიერ შეურაცხყოფას და ამცირებდა მათ; ოჯახში შიშის ატმოსფეროს ქმნიდა.
მიუხედავად ამ ყველაფრისა, ჯონს არასდროს მიუტოვებია დედა. უფრო მეტიც, დაჰყავდა საჯარო ღონისძიებებზე, პრემიერებზე.
დეპი ამბობდა, რომ დედა რთული ადამიანი იყო, მაგრამ მასზე ზრუნავდა. ცნობილია, რომ მოგვიანებით მან დედას სახლი უყიდა და ფინანსურად სულ ეხმარებოდა. სასამართლოზეც აღნიშნა, რომ ეს არ ნიშნავდა, თითქოს ბავშვობაში ძალადობა არ მომხდარა — უბრალოდ, მისი დამოკიდებულება დედის მიმართ ძალიან წინააღმდეგობრივი იყო: ერთდროულად განიცდიდა ტკივილსაც და პასუხისმგებლობასაც...
ბეტი სუ პალმერი 2016 წლის 20 მაისს გარდაიცვალა, 81 წლის ასაკში. რამდენიმე დღით ადრე, ვიდრე ემბერ ჰერდი ჯონთან განქორწინებას მოითხოვდა და ოჯახში ძალადობის ბრალდებებს საჯაროდ გააჟღერებდა.
შარლიზ ტერონი გაიზარდა ოჯახში, სადაც მამა მძიმე ალკოჰოლიზმით იტანჯებოდა და ძალადობდა. როდესაც შარლიზი 15 წლის იყო, დედამ თავდაცვის მიზნით ესროლა მამას და ის გარდაიცვალა. ტერონს არაერთხელ უთქვამს, რომ ბავშვობა მუდმივ შიშში გაატარა.
ოპრა უინფრი
ოპრა უინფრი ღიად საუბრობს, რომ ბავშვობაში მრავალწლიანი ფიზიკური და სექსუალური ძალადობის მსხვერპლი იყო. მისი ისტორია ერთ-ერთი ყველაზე ცნობილი მაგალითია, თუ როგორ შეიძლება ადამიანმა მძიმე ტრავმის შემდეგაც შეძლოს წარმატების მიღწევა.
ემინემი
ემინემი არაერთ ინტერვიუში და საკუთარ სიმღერებში აღწერს დედასთან უკიდურესად კონფლიქტურ ურთიერთობას. მისი თქმით, ბავშვობაში განიცდიდა როგორც ემოციურ, ისე ფიზიკურ ძალადობას. დედა ამ ბრალდებებს არ ეთანხმებოდა და მოგვიანებით შვილს უჩივლა.
დემი მური
დემი მურმა თავის მემუარებში აღწერა ქაოსური ბავშვობა, ალკოჰოლზე დამოკიდებული მშობლები და ემოციურად არასტაბილური ოჯახური გარემო, რამაც მის ცხოვრებაზე დიდი გავლენა მოახდინა.
მაკოლეი კალკინი
კალკინი ამბობდა, რომ მამამისი უკიდურესად მკაცრი და ძალაუფლების მოყვარული იყო, ხოლო ურთიერთობა იმდენად გაუარესდა, რომ წლების განმავლობაში საერთოდ არ ჰქონდათ კონტაქტი.
დრიუ ბერიმორი
დრიუ ბერიმორი ძალიან პატარა ასაკში გახდა ვარსკვლავი. მოგვიანებით ამბობდა, რომ ბავშვობაში ფაქტობრივად ზრდასრული ცხოვრების რეჟიმში ცხოვრობდა და მშობლებისგან საკმარის დაცვას ვერ იღებდა. 13 წლიდან უკვე ალკოჰოლსა და ნარკოტიკებს ეტანებოდა და სქესობრივი ცხოვრებაც ძალიან ადრე დაიწყო, და მშობლებმა ამისგან ვერ დაიცვეს.
კრისტინა აგილერა
აგილერა საჯაროდ ყვებოდა, რომ ბავშვობაში ხედავდა, როგორ ძალადობდა მამა დედაზე და თავადაც ცხოვრობდა შიშის გარემოში.
მეგან ფოქსი
მეგან ფოქსი აღწერს, რომ დედა და მამინაცვალი ძალიან მკაცრ და შეზღუდულ გარემოში ზრდიდნენ, რაც, მისი თქმით, ემოციურად მძიმე გამოცდილება იყო.
