ზაფხულის არდადეგების ბოლო კვირებში ბევრი მშობელი ფიქრობს, რომ ბავშვს სწრაფად უნდა გაახსენოს მთელი სასწავლო პროგრამა, რათა სკოლას მომზადებული მივიდეს. თუმცა, სპეციალისტები აღნიშნავენ, რომ ასეთი მიდგომა ხშირად საპირისპირო შედეგს იძლევა – ბავშვი იღლება, სწავლა კი მისთვის სტრესთან და იძულებასთან ასოცირდება.

ნუ ეცდებით რამდენიმე კვირაში მთელი პროგრამის გამეორებას

მშობლების ერთ-ერთი ყველაზე გავრცელებული შეცდომაა შიში, რომ ბავშვმა ზაფხულში ყველაფერი დაივიწყა და თანატოლებს ჩამორჩება. სწორედ ეს შფოთვა აქცევს არდადეგების ბოლო დღეებს მეცადინეობის ხანგრძლივ ტანჯვად და ოჯახურ დაძაბულობად.

სინამდვილეში, სწავლა მხოლოდ ნასწავლი მასალის დამახსოვრებაზე არ არის დამოკიდებული. არანაკლებ მნიშვნელოვანია ყურადღების კონცენტრაცია, მეხსიერება, მეტყველება, ინსტრუქციების მოსმენისა და შესრულების უნარი, ასევე საკუთარი ქცევის კონტროლი. სწორედ ამ უნარების განვითარება ეხმარება ბავშვს სწავლაში.

სწავლა თამაშით ბევრად ეფექტურია

ზაფხულის ბოლოს უმჯობესია, ბავშვი არ აიძულოთ ხანგრძლივად იმეცადინოს. ამის ნაცვლად, ყოველდღიურობაში ჩართეთ ისეთი აქტივობები, რომლებიც სასარგებლოც არის და საინტერესოც.

მაგალითად:

• შესთავაზეთ ლოგიკური ამოცანები და გამოცანები;
• ერთად წაიკითხეთ მოკლე წიგნი ან ზღაპარი;
• უყურეთ მულტფილმს და შემდეგ სთხოვეთ, თავისი სიტყვებით მოყვეს სიუჟეტი;
• იმსჯელეთ პერსონაჟების ქცევაზე და ჰკითხეთ, როგორ დაასრულებდა თავად ამ ისტორიას.

ასეთი აქტივობები ერთდროულად ავითარებს აზროვნებას, მეტყველებას, წარმოსახვასა და ანალიზის უნარს.

სამაგიდო თამაშები საუკეთესო დამხმარეა

კოგნიტური უნარების განვითარებაში მნიშვნელოვან როლს თამაშობს სხვადასხვა ინტელექტუალური სამაგიდო თამაში, ლოგიკური თავსატეხი, გამოცანები და ე.წ. „დანეტკები“. ისინი ხელს უწყობს:

• მეხსიერების განვითარებას;
• ყურადღების კონცენტრაციას;
• ლოგიკურ და კრიტიკულ აზროვნებას;
• მეტყველებისა და მსჯელობის უნარის გაუმჯობესებას.

როგორ გავუვარჯიშოთ ბავშვს ყურადღება და თვითკონტროლი?

სკოლისთვის მზადებაში სასარგებლოა თამაშები, რომლებსაც მკაფიო წესები აქვს. ასევე კარგ შედეგს იძლევა:

• კონსტრუქტორის აწყობა ინსტრუქციის მიხედვით;
• სურათებში განსხვავებების პოვნა;
• ამოცანები, რომლებიც სიზუსტესა და მოთმინებას მოითხოვს.

ასეთ აქტივობებს დღეში დაახლოებით ერთი საათის დათმობაც საკმარისია.

დამოუკიდებლობის განვითარება ყოველდღიური საქმეებით

სკოლისთვის მზადება მხოლოდ წიგნებთან ჯდომას არ ნიშნავს. ბავშვს დამოუკიდებლობის განვითარებაშიც უნდა დაეხმაროთ.

მაგალითად, სთხოვეთ:

• თავად მოაწესრიგოს თავისი ოთახი;
• დაალაგოს სასკოლო ნივთები;
• მოამზადოს მარტივი საუზმე;
• დაგეხმაროთ მცირე საოჯახო საქმეებში.

ასეთი პასუხისმგებლობები თავდაჯერებულობასა და ორგანიზებულობას ზრდის.

ნუ დააშინებთ ბავშვს სკოლით

ფსიქოლოგები მშობლებს ურჩევენ, არ გამოიყენონ ისეთი ფრაზები, როგორიცაა: „სკოლა რომ დაიწყება, მერე ნახავ!“ ან „სკოლაში ასე ვერ მოიქცევი!“

ამის ნაცვლად, ყურადღება გაამახვილეთ იმ სასიამოვნო მოვლენებზე, რომლებიც ახალ სასწავლო წელს ახლავს: მეგობრებთან შეხვედრა, ახალი ცოდნა, საინტერესო გაკვეთილები და კლასგარეშე აქტივობები.

თუ ბავშვს სკოლის დაწყება ან ახალ სკოლაში გადასვლა აშფოთებს, მნიშვნელოვანია, მის ემოციებს ყურადღებით მოუსმინოთ. შეგიძლიათ შესთავაზოთ, ფურცელზე დახატოს ის, რაც აშინებს, შემდეგ კი ერთად ისაუბროთ თითოეულ განცდაზე. ხშირად ბავშვებს საკუთარი შიშების გამოხატვა უფრო უადვილდებათ ნახატით, ვიდრე სიტყვებით.

ზაფხულის ბოლო დღეების მიზანი არა მთელი პროგრამის დაზეპირება, არამედ ბავშვის სწავლისთვის ფსიქოლოგიურად და გონებრივად მომზადებაა. როცა სწავლა თამაშთან, საინტერესო აღმოჩენებთან და პოზიტიურ ემოციებთან ასოცირდება, ახალ სასწავლო წელს ბავშვიც უფრო მშვიდად და თავდაჯერებულად ხვდება.

როგორ ვამეცადინოთ ჰიპერაქტიური ბავშვი და როგორ გადავატანინოთ ქცევის სირთულეები

რატომ არ უნდა ვამეცადინოთ პატარა მოსწავლე დასვენების დღეებში

ბავშვმა არდადეგებზე კარგად უნდა დაისვენოს, მათ შორის, ეკრანისგან. წიგნის კითხვა კი სასიამოვნო პროცესი გავხადოთ და არ დავარქვათ მეცადინეობა - ვამეცადინოთ თუ არა ბავშვები არდადეგებზე