რატომ დარჩა წელს მეტი აბიტურიენტი უნივერსიტეტებს მიღმა ვიდრე შარშან - რამდენით შემცირდა სახელმწიფო უნივერსიტეტებში ჩარიცხულთა წილი და რამდენით გაიზარდა კერძო სასწავლებლებში - მშობლები
რატომ დარჩა წელს მეტი აბიტურიენტი უნივერსიტეტებს მიღმა ვიდრე შარშან - რამდენით შემცირდა სახელმწიფო უნივერსიტეტებში ჩარიცხულთა წილი და რამდენით გაიზარდა კერძო სასწავლებლებში
2026 წლის ერთიანი ეროვნული გამოცდების საბოლოო შედეგები ცნობილია. წლევანდელი და გასული წლის მონაცემების შედარებისას მნიშვნელოვანი განსხვავება ჩანს: წელს გამოცდებზე უფრო მეტი აბიტურიენტი დარეგისტრირდა, თუმცა ბაკალავრიატზე უფრო ნაკლები ჩაირიცხა.
2025 წელს ერთიან ეროვნულ გამოცდებზე 39 000-ზე მეტი აბიტურიენტი იყო რეგისტრირებული, საბოლოოდ კი სტუდენტი 31 704 აბიტურიენტი გახდა. 2026 წელს რეგისტრირებულთა რაოდენობამ 43 000-ს გადააჭარბა, ხოლო საბაკალავრო საფეხურზე 29 481 აბიტურიენტი ჩაირიცხა.
ანუ2025 წელს რეგისტრირებულთა დაახლოებით 81% ჩაირიცხა, ხოლო წელს 69%.
რამდენი ჩაირიცხა სახელმწიფო და კერძო უნივერსიტეტებში წელს
2026 წლის მონაცემებით, საბაკალავრო საფეხურზე ჩარიცხული 29 481 აბიტურიენტიდან17 862 აბიტურიენტი სახელმწიფოს მიერ დაფუძნებულ უმაღლეს საგანმანათლებლო დაწესებულებებში ჩაირიცხა;11 619 აბიტურიენტი — კერძო უმაღლეს საგანმანათლებლო დაწესებულებებში.
შესაბამისად, წლევანდელი ჩარიცხულების დაახლოებით 60,6% სახელმწიფო, ხოლო 39,4% კერძო უმაღლეს სასწავლებლებზე მოდის.
2025 წელს, NAEC-ის მონაცემების მიხედვით, სახელმწიფო უნივერსიტეტებში 21 538 აბიტურიენტი ჩაირიცხა, შესაბამისად, სახელმწიფო უმაღლესებში ჩარიცხულთა რაოდენობა ერთ წელიწადში 3 676-ით, ანუ დაახლოებით 17,1%-ით შემცირდა.
კერძოებში კი2025 — 10 166 აბიტურიენტი, 2026 კი 11 619 აბიტურიენტი ჩაირიცხა.ანუ კერძო უნივერსიტეტებში წელს 1 453-ით მეტი აბიტურიენტი მოხვდა, ზრდა დაახლოებით 14,3%-ია.
რატომ დარჩა წელს უფრო მეტი აბიტურიენტი უნივერსიტეტის გარეთ?
2026 წელს აბიტურიენტთა რაოდენობა გაიზარდა, სახელმწიფო უნივერსიტეტებში ადგილები კი დაახლოებით 20,7%-ით შემცირდა. 2025–2026 სასწავლო წელს სახელმწიფო უმაღლესებში 27 204 ადგილი იყო გამოცხადებული, წელს კი — 21 574, ანუ 5 630-ით ნაკლები. ამასთან, კერძო უნივერსიტეტებში ჩარიცხულთა რაოდენობა პირიქით, გაიზარდა — 10 166-დან 11 619-მდე. შესაბამისად, წლევანდელი ვერჩარიცხულების დიდი რაოდენობა მხოლოდ გამოცდებზე „ჩაჭრით“ ვერ აიხსნება: გავლენა შეიძლება ჰქონოდა სახელმწიფო უნივერსიტეტებში ადგილების შემცირებას, მოთხოვნად და ნაკლებად მოთხოვნად პროგრამებს შორის კვოტების გადანაწილებას, კონკურსის ზრდასა და კერძო უნივერსიტეტებში სწავლის დაფინანსების შეცვლილ პირობებსაც.
