7 გზა, რომლებიც მამაკაცს ტესტოსტერონის გაზრდასა და შენარჩუნებაში ეხმარება — რეპროდუქტოლოგის რჩევები - მშობლები
7 გზა, რომლებიც მამაკაცს ტესტოსტერონის გაზრდასა და შენარჩუნებაში ეხმარება — რეპროდუქტოლოგის რჩევები
ტესტოსტერონი მამაკაცის ორგანიზმისთვის ერთ-ერთი უმნიშვნელოვანესი ჰორმონია. ის გავლენას ახდენს არა მხოლოდ სქესობრივ ფუნქციასა და რეპროდუქციულ ჯანმრთელობაზე, არამედ კუნთოვან მასაზე, ენერგიაზე, განწყობასა და ზოგად ფიზიკურ მდგომარეობაზეც.
ასაკის მატებასთან ერთად ტესტოსტერონის დონე თანდათან მცირდება და ეს ბუნებრივი ფიზიოლოგიური პროცესია. თუმცა ცხოვრების წესს მნიშვნელობა აქვს — ფიზიკური აქტივობა, კვება, ძილი, სხეულის წონა და მავნე ჩვევები ჰორმონულ ჯანმრთელობაზეც აისახება.
ექიმი-რეპროდუქტოლოგი მანანა მგალობლიშვილი განმარტავს, რა როლი აქვს ტესტოსტერონს მამაკაცის ორგანიზმში და რა ყოველდღიური ჩვევები ეხმარება მისი ნორმალური დონის შენარჩუნებას:
„ტესტოსტერონი მამაკაცის მნიშვნელოვანი ჰორმონია, რომელიც ზრდის ლიბიდოს, აუმჯობესებს ერექციას, უზრუნველყოფს ზრდას სახეზე და ტანზე, აძლევს ენერგიულობას, განწყობას და მონაწილეობს სპერმატოზოიდების წარმოქმნაში.
ასაკის მატებასთან ერთად ტესტოსტერონის რაოდენობა იკლებს და ეს ფიზიოლოგიურია, თუმცა გარკვეული წესების დაცვით თქვენ შეგიძლიათ შეინარჩუნოთ და გაზარდოთ ტესტოსტერონის დონე.
მე ჩამოგითვლით შვიდ ძირითად აქტივობას, რომელთა გათვალისწინებითაც თქვენ შეძლებთ ტესტოსტერონის დონის შენარჩუნებას და ზრდას:
- ფიზიკური ვარჯიში — განსაკუთრებით ძალოვანი ვარჯიშები, რომლებიც კუნთოვანი მასის ზრდას უწყობს ხელს.
- პროტეინით მდიდარი საკვები — ნებისმიერი ხორცეული, კვერცხი, ხაჭო და მცენარეული ცილაც.
- სასარგებლო ცხიმები — ზეითუნის ზეთი, ავოკადო და ნებისმიერი თხილეული, იქნება ეს ნიგოზი, მიწის თხილი, ჩვეულებრივი ქართული თხილი, მზესუმზირა თუ გოგრის თესლი.
- ხარისხიანი, 7–9-საათიანი ძილი დღე-ღამის განმავლობაში.
- სტრესის მართვა, რადგან სტრესი ტესტოსტერონის დონის დაქვეითებას იწვევს. ამ შემთხვევაში მიდგომა ინდივიდუალურია და შეიძლება დაგეხმაროთ, მაგალითად, იოგა, მედიტაცია ან ფსიქოლოგის კონსულტაცია.
- ნორმალური წონა, რადგან წონის მატება აქვეითებს ტესტოსტერონის რაოდენობას და, პირიქით, წონის დეფიციტიც უარყოფითად მოქმედებს მასზე.
- მავნე ჩვევების გამორიცხვა, როგორიცაა სიგარეტი, მარიხუანა, ნებისმიერი მოსაწევი, ნარკოტიკული საშუალებები და დიდი რაოდენობით ალკოჰოლის მიღება“, — ამბობს მანანა მგალობლიშვილი.
ამასთან, თუ მამაკაცს აქვს ლიბიდოს მკვეთრი დაქვეითება, ერექციის პრობლემა, მუდმივი დაღლილობა ან სხვა სიმპტომები, მხოლოდ ცხოვრების წესის შეცვლაზე დაყრდნობა არ ღირს — საჭიროა ექიმთან კონსულტაცია და, საჭიროების შემთხვევაში, ჰორმონული კვლევების ჩატარება.
