7 ფრაზა, რომელიც ახალბედა დედას არ უნდა უთხრათ - ეს მათ ფსიქიკაზე ცუდად მოქმედებს - მშობლები
7 ფრაზა, რომელიც ახალბედა დედას არ უნდა უთხრათ - ეს მათ ფსიქიკაზე ცუდად მოქმედებს
ბავშვის დაბადება უდიდესი სიხარულია, მაგრამ ეს პერიოდი დედისთვის ყოველთვის მხოლოდ ბედნიერებას არ ნიშნავს. უძილო ღამეები, ფიზიკური გამოფიტვა, მშობიარობის შემდეგ ორგანიზმის აღდგენა, ჰორმონული ცვლილებები, ახალ პასუხისმგებლობასთან შეგუება და მუდმივი ღელვა ზოგჯერ ქალისთვის ძალიან მძიმე ტვირთად იქცევა.
ამას შეიძლება დაემატოს ძუძუთი კვებასთან დაკავშირებული სირთულეები, მარტოობის განცდა, შიში, რომ კარგი დედა ვერ არის, ან განცდა, რომ მის მდგომარეობას ვერავინ ამჩნევს და ვერავინ უგებს.
ამიტომ მნიშვნელოვანია გვახსოვდეს: თუ ახალბედა დედა არაფერს ამბობს და არ წუწუნებს, ეს სულაც არ ნიშნავს, რომ თავს კარგად გრძნობს. ზოგჯერ კი ფრაზები, რომლებსაც მის გასამხნევებლად ვეუბნებით, მხარდაჭერის ნაცვლად დამატებით ზეწოლად იქცევა.
აი 7 გავრცელებული ფრაზა, რომელთა თქმასაც ჯობს, არაფერი თქვათ.
„დაიძინე, როცა ბავშვს სძინავს“
ერთი შეხედვით, ეს სრულიად ლოგიკური და კეთილი რჩევაა. სინამდვილეში კი დედისთვის შეიძლება კიდევ ერთ მოთხოვნად იქცეს: ბავშვმა დაიძინა და ახლა მანაც აუცილებლად უნდა შეძლოს დაძინება.
მაგრამ ძილი ყოველთვის ბრძანებით არ მოდის. დედა შეიძლება იმდენად გადაღლილი ან დაძაბული იყოს, რომ ბავშვის დაძინების მიუხედავად თავად ვერ იძინებდეს. შეიძლება ამ რამდენიმე თავისუფალ წუთში ჭამა, შხაპის მიღება, სახლის საქმეების გაკეთება ან უბრალოდ ცოტა ხნით მარტო ყოფნა სჭირდებოდეს.
ამიტომ რჩევის ნაცვლად უფრო სასარგებლოა ჰკითხოთ, ბოლოს როდის შეძლო რამდენიმე საათის განმავლობაში უწყვეტად დაძინება. თუ აღმოჩნდება, რომ დიდი ხანია ნორმალურად არ უძინია, კონკრეტული დახმარება შესთავაზეთ — მაგალითად, გარკვეული დროით თქვენ მიხედეთ პატარას, რათა დედამ დაისვენოს.
„ჯერ არაფერი გინახავს, მოიცადე, კბილები რომ ამოუვა... მერე ერთი წლის კრიზისი დაიწყება, შემდეგ — ორი წლის...“
ახალბედა დედის დაშინება ნამდვილად არ არის საჭირო. ისედაც საკმარისად ხშირად ესმის, რომ „ყველაზე რთული ჯერ წინ არის“.
თუ მომავალზე საუბარი გინდათ, ის კარგი მოვლენები შეახსენეთ, რომლებიც მას წინ ელოდება?
პირველი ღიმილი, პირველი ნაბიჯები, პირველი ჩახუტება, პირველი „დედა“ — მომავალში მარტო კბილების ამოსვლა, უძილო ღამეები და ასაკობრივი კრიზისები ხომ არ არის.
„მოიცადე, მალე პირველად გაგიღიმებს/დაგიძახებს“, — შესაძლოა ასეთი ფრაზა გაცილებით მეტი მხარდაჭერა აღმოჩნდეს.
„ყოველი წუთით დატკბი“
ამ სიტყვებსაც ხშირად საუკეთესო განზრახვით ამბობენ, მაგრამ დაფიქრდით, ვის ეუბნებით ამას: ადამიანს, რომელსაც შეიძლება ღამე არ ეძინოს და ფიზიკურად თუ ემოციურად ძალიან რთულ მდგომარეობაში იყოს.
ასეთ დროს მოთხოვნა, რომ ქალი „ყოველი წუთით დატკბეს“ და მუდმივად მადლიერებასა და ბედნიერებას გრძნობდეს, დამატებით დანაშაულის განცდასაც აჩენს: თუ ამ წუთებით ვერ ვტკბები, ცუდი დედა ვარ?
ყველა წუთით ტკბობა აუცილებელი არ არის. დედას შეიძლება უყვარდეს თავისი შვილი და ამავე დროს ძალიან უჭირდეს.
ამიტომ უკეთესი იქნება უთხრათ: „ძალიან რთული პერიოდი გაქვს და მიუხედავად ამისა, კარგად უმკლავდები.“
„სამაგიეროდ, ბავშვი ხომ ჯანმრთელია“
რა თქმა უნდა, ბავშვის ჯანმრთელობა უდიდესი ბედნიერებაა. მაგრამ ეს დედის განცდებს არ აუქმებს.
ჯანმრთელი ბავშვი არ ნიშნავს, რომ დედას არ შეიძლება ჰქონდეს მძიმე მშობიარობის გამოცდილება, მშობიარობის შემდგომი დეპრესია ან შფოთვა, ტკივილი, ემოციური გამოფიტვა ან საკუთარი თავის დაკარგვის განცდა.
ფრაზამ „მთავარია, ბავშვი ჯანმრთელია“ შეიძლება ქალს აგრძნობინოს, რომ საკუთარი მდგომარეობის გამო წუხილის უფლება არ აქვს.
ამის ნაცვლად ჰკითხეთ:
„შენ როგორ ხარ სინამდვილეში? მართლა როგორ გრძნობ თავს?“
ზოგჯერ ადამიანს სწორედ ასეთი შეკითხვა სჭირდება იმისთვის, რომ პირველად გაბედოს საკუთარ მდგომარეობაზე საუბარი.
„მეორეს როდის აჩენ?“
ან მესამეს, მეოთხეს...
ეს კითხვა განსაკუთრებით უადგილოა მაშინ, როდესაც ქალმა სულ ახლახან გააჩინა ბავშვი.
თქვენ არ იცით, რა გზა გაიარა მან ამ ბავშვის გაჩენამდე. შესაძლოა ორსულობა რთული იყო, შესაძლოა მშობიარობა მძიმედ გადაიტანა, შესაძლოა წყვილს წლები დასჭირდა ბავშვის გასაჩენად ან საერთოდ აღარ გეგმავდნენ სხვა შვილს.
ეს მხოლოდ ქალისა და მისი პარტნიორის გადასაწყვეტი საკითხია. ამიტომ ახალი ორსულობის გეგმებზე კითხვა უბრალო ინტერესად შეიძლება მოგვეჩვენოს, მაგრამ მეორე ადამიანისთვის ძალიან მტკივნეულ თემას შეეხოს.
„ძუძუთი კვებაზე უკეთესს ვერაფერს იზამ!“
თუ ქალს ძუძუთი კვება უჭირს, იმის მუდმივად შეხსენება, რომ ბავშვისთვის „საუკეთესო“ სწორედ ეს არის, მას ნამდვილად ვერ დაეხმარება.
პირიქით, დედამ შეიძლება იგრძნოს, რომ საკუთარ შვილს საუკეთესოს ვერ აძლევს.
ზოგჯერ ძუძუთი კვება სხვადასხვა მიზეზის გამო ვერ ხერხდება ან ძალიან რთულია. ასეთ დროს დედას განსჯა და დამატებითი ზეწოლა კი არა, მხარდაჭერა და მისთვის რეალურად შესაძლებელი კვების ვარიანტების განხილვა სჭირდება.
ბავშვის კვებასთან დაკავშირებული გადაწყვეტილება არ უნდა იქცეს დედის სიყვარულისა და „კარგი დედობის“ საზომად.
„თუ რამე დაგჭირდება, მითხარი“
ეს ალბათ ერთ-ერთი ყველაზე გავრცელებული ფრაზაა, რომელსაც ახალბედა დედას გულწრფელი სურვილით ვეუბნებით.
თუმცა პრაქტიკაში ასეთი შეთავაზება ყოველთვის ეფექტური არ არის. ძლიერ გადაღლილ ადამიანს ზოგჯერ იმის ძალაც აღარ აქვს, რომ გაარკვიოს, კონკრეტულად რა სჭირდება, ვის შეიძლება სთხოვოს დახმარება და როგორ ჩამოაყალიბოს თავისი თხოვნა.
ამასთან, ბევრ ქალს ერიდება დახმარების თხოვნა — ეშინია, რომ სხვას ტვირთად დააწვება.
ამიტომ ზოგადი შეთავაზების ნაცვლად კონკრეტული დახმარება გაცილებით ეფექტურია.
მაგალითად:
„ხუთშაბათს მოვალ და სადილს მოგიტან.“
ან:
„ორი საათით მე გავასეირნებ ბავშვს და შენ დაიძინე.“
ან:
„მაღაზიაში მივდივარ — ჩამომიწერე, რა მოგიტანო.“
ასეთ შემთხვევაში დედას აღარ უწევს დახმარების თხოვნა და არც იმის მოფიქრება, რა შეიძლება დაგავალოთ.
ახალბედა დედას ხშირად რჩევაზე მეტად დახმარება სჭირდება
მშობიარობის შემდეგ ქალის მიმართ მხარდაჭერა მხოლოდ დამამშვიდებელი სიტყვების თქმას არ ნიშნავს. ზოგჯერ ყველაზე მნიშვნელოვანი ისაა, რომ მოვუსმინოთ, არ შევაფასოთ მისი გრძნობები და არ ვაიძულოთ, თავი ბედნიერად მოაჩვენოს.
და კიდევ უფრო მნიშვნელოვანი შეიძლება კონკრეტული მოქმედება აღმოჩნდეს — სადილის მიტანა, ბავშვის რამდენიმე საათით მიხედვა, სახლის საქმეში დახმარება ან უბრალოდ კითხვა: „შენ როგორ ხარ?“
რადგან ბავშვის დაბადების შემდეგ ყველას ყურადღება ბუნებრივად პატარაზე გადადის, მაგრამ ამ დროს დედასაც სჭირდება ადამიანი, რომელიც მას შეხედავს და დაინახავს.
