ცნობილი ოჯახი, რომლის ცხოვრებას მილიონობით მაყურებელი ადევნებს თვალს - როგორ ცხოვრობს წყვილი აქონდროპლაზიის დიაგნოზის მქონე სამი შვილით - მშობლები

ვინც ამერიკული რეალითი-შოუების სამყაროს იცნობს, დიდი ალბათობით, როლოფების ოჯახიც ეცოდინება. ზაკ და თორი როლოფები მილიონობით მაყურებელმა TLC-ის პოპულარული შოუდან — Little People, Big World-იდან (პატარა ადამიანები, დიდი სამყარო) გაიცნო. მათი ისტორია მხოლოდ ტელევიზიის წარმატებული პროექტის ნაწილი არ არის: ეს არის სიყვარულის, ქორწინების, შვილების, ოჯახური კონფლიქტების, რთული გადაწყვეტილებებისა და საბოლოოდ — საკუთარი ცხოვრების კამერებისგან მოშორებით გაგრძელების ისტორია.

ზაკი ბავშვობიდანვე იზრდებოდა ტელეკამერების წინაშე. თორი კი მის ცხოვრებაში მოგვიანებით გამოჩნდა და დროთა განმავლობაში თავადაც შოუს ერთ-ერთ მთავარ სახედ იქცა. დღეს ისინი სამი შვილის მშობლები არიან და მიუხედავად იმისა, რომ Little People, Big World-ს უკვე აღარ იღებენ, მათი ოჯახი კვლავ რჩება მაყურებლის ინტერესის ცენტრში...

ყველაფერი როლოფების ოჯახით დაიწყო

შოუ Little People, Big World TLC-ზე 2006 წელს დაიწყო და თავიდანვე როლოფების ყოველდღიურ ცხოვრებას გვიჩვენებდა. ოჯახი ორეგონში, ფერმაში ცხოვრობდა და მაყურებელი ხედავდა როგორც ბავშვების გაზრდას, ისე ოჯახის საქმიანობას, ურთიერთობებსა და იმ სირთულეებს, რომლებსაც ჯუჯა სიმაღლით მცხოვრები ადამიანები ყოველდღიურ ცხოვრებაში აწყდებიან.

შოუს მთავარი იდეაც სწორედ ეს იყო — ეჩვენებინა, რომ განსხვავებული ფიზიკური მდგომარეობის მიუხედავად, როლოფების ყოველდღიურობა სავსე იყო ჩვეულებრივი ოჯახური მოვლენებით: შვილების აღზრდით, სკოლით, სამსახურისა და ბიზნესის საქმეებით, ურთიერთობებით, მოგზაურობებითა და ოჯახური დღესასწაულებით. TLC თავად შოუს აღწერაში აღნიშნავს, რომ სერიალი როლოფების „წარმატებებსა და სირთულეებს“ გვიჩვენებდა.

მეთი და ემი ერთმანეთს 1980-იან წლებში შეხვდნენ. ორივეს აქვს ჯუჯა სიმაღლესთან დაკავშირებული გენეტიკური მდგომარეობა, თუმცა განსხვავებული ტიპის. მეთს დიასტროფიული დისპლაზია აქვს, იშვიათი გენეტიკური ტიპის ჩონჩხის დისპლაზიაა. ბავშვობაში მას მრავალი ოპერაცია დასჭირდა. ემის კი - აქონდროპლაზია.

მათი ურთიერთობა თავიდანვე განსაკუთრებული იყო არა მხოლოდ იმიტომ, რომ ორივე დაბალი სიმაღლის ადამიანი იყო, არამედ იმიტომაც, რომ მათ ერთად შექმნეს დიდი ოჯახი და მოგვიანებით საკუთარი ფერმა განავითარეს.

წყვილი 1987 წელს დაქორწინდა და ოთხი შვილი შეეძინა — ტყუპები ზაკი და ჯერემი, ქალიშვილი მოლი და უმცროსი ვაჟი ჯეიკობი. მათი სამი შვილი საშუალო სიმაღლის გაიზარდა, მხოლოდ ზაკს ერგო დედისგან მემკვიდრეობით აქონდროპლაზიის დიაგნოზი.

ოჯახის ცხოვრებაში განსაკუთრებული ადგილი დაიკავა ორეგონში მდებარე ფერმას. წყვილმა ფერმა 1990-იან წლებში შეიძინა და დროთა განმავლობაში ის უბრალო საოჯახო მეურნეობიდან პოპულარულ ტურისტულ ადგილად აქციეს. განსაკუთრებით ცნობილი გახდა ფერმის გოგრის სეზონი, რომელიც მოგვიანებით Little People, Big World-ის ერთ-ერთ მთავარ ვიზუალურ სიმბოლოდაც იქცა.

მეთი ბავშვობიდანვე ცდილობდა ფიზიკურ შეზღუდვებთან დაკავშირებული დაბრკოლებების გადალახვას. მან ტექნიკურ სფეროში იმუშავა, შემდეგ კი საკუთარი ბიზნესსაქმიანობა განავითარა. ემი კი ოჯახის ყოველდღიურ ცხოვრებასა და შვილების აღზრდაში აქტიურად იყო ჩართული.

სწორედ მათი ოჯახის ცხოვრებისადმი ინტერესმა მიიყვანა როლოფები ტელევიზიამდე.2006 წელს TLC-მ მათი ოჯახის შესახებ რეალითი-შოუ გადაიღო — Little People, Big World. მაყურებელმა პირველად სწორედ ამ პროექტის საშუალებით გაიცნო ისინი. მთავარი იდეა იყო, ეჩვენებინა, როგორ ცხოვრობს ოჯახი, რომლის წევრების ნაწილსაც ჯუჯა სიმაღლე აქვს — თუმცა შოუ მხოლოდ ამ საკითხზე არ ყოფილა აგებული.მაყურებელი ხედავდა ბავშვების გაზრდას, სკოლას, სპორტს, ფერმის საქმიანობას, მშობლების ურთიერთობას და იმ ჩვეულებრივ ოჯახურ პრობლემებს, რომლებიც ნებისმიერ ოჯახს შეიძლება ჰქონდეს.

ზაკი განსაკუთრებით სწრაფად გახდა მაყურებლისთვის საყვარელი პერსონაჟი. ის ბავშვობიდან იზრდებოდა კამერების წინ და მოგვიანებით თავადაც გახდა ერთ-ერთი მთავარი პერსონაჟი.

სიყვარული, რომელიც დროთა განმავლობაში რთულ ურთიერთობად იქცა

თუმცა ოჯახის ისტორია მხოლოდ წარმატება და პოპულარობა არ ყოფილა.წლების განმავლობაში მეთსა და ემის შორის ურთიერთობა გაუარესდა და საბოლოოდ ისინი განქორწინდნენ. მათი განქორწინების პროცესი 2016 წელს დასრულდა.მიუხედავად ამისა, ორივე დარჩა ოჯახის ცხოვრებაში და შვილებთან ურთიერთობა გააგრძელა. მოგვიანებით ორივემ ახალი პარტნიორი იპოვა. ამ ყველაფერს მაყურებელი კვლავ Little People, Big World-ის საშუალებით ადევნებდა თვალს.

სწორედ ამიტომ, როცა ზაკი მოგვიანებით დაქორწინდადა თავად გახდა მამა, მაყურებლისთვის ეს უკვე ერთი ახალი ოჯახის ისტორია კი არა, წლების განმავლობაში მისთვის უკვე ნაცნობი ოჯახის შემდეგი თაობა იყო.

ზაკისთვის კამერების წინ ცხოვრება ბავშვობიდან დაიწყო. მოგვიანებით კი ის ოჯახის იმ წევრად იქცა, რომლის პირადი ცხოვრებაც შოუს ერთ-ერთ მთავარ სიუჟეტურ ხაზად ჩამოყალიბდა.

როგორ გაიცნო ზაკმა თორი?

თორი პატონი როლოფების ფერმაში გოგრის სეზონზე მუშაობდა. თავდაპირველად მათი ურთიერთობა სამუშაო გარემოში დაიწყო, თუმცა მალე ერთმანეთის მიმართ ინტერესი გაუჩნდათ. TLC-ის არქივში შემონახული მასალების მიხედვით, სწორედ ფერმაში გაიცნო ზაკმა გოგონა, რომელიც შემდეგ მისი მეუღლე გახდა.მათი ურთიერთობა მაყურებლისთვისაც საინტერესო აღმოჩნდა. ზაკისგან განსხვავებით, თორი საშუალო სიმაღლისაა, ამიტომ მათი ურთიერთობა კიდევ ერთი შესაძლებლობა გახდა იმის საჩვენებლად, თუ როგორ შეიძლება განსხვავებული ფიზიკური მახასიათებლების მქონე ადამიანების ურთიერთობა და ოჯახის შექმნა.მათი სიყვარულის ისტორია შოუში თანდათან განვითარდა — გაცნობიდან და პირველი პაემნებიდან ნიშნობამდე.

2015 წლის ივლისში კი დაქორწინდნენ.

ქორწილი სწორედ იმ ადგილას გაიმართა, რომელიც ზაკის ბავშვობასა და მთელი ოჯახის ისტორიას უკავშირდებოდა — როლოფების ფერმაში, ორეგონში. TLC-ის ცნობით, ცერემონია ოჯახის წევრებისა და მეგობრების გარემოცვაში შედგა და წყვილს საკმაოდ მშვიდი და ინტიმური დღესასწაული ჰქონდა.

მათი შვილები — ახალი თაობა, რომელიც კამერების წინ გაიზარდა

წყვილს სამი შვილი ჰყავს — ჯეკსონი, ლილა და ჯოშუა. სამივე ბავშვს აქვს აქონდროპლაზია — გენეტიკური მდგომარეობა, რომელიც მამისგან გადაეცათ მემკვიდრეობით.სწორედ შვილების დაბადების შემდეგ შეიცვალა ზაკისა და თორის ისტორიის მთავარი აქცენტი. მაყურებელი უკვე არა მხოლოდ ახალგაზრდა წყვილის ცხოვრებას, არამედ მათ მშობლობად ჩამოყალიბებას აკვირდებოდა.როგორ უნდა ესაუბრონ შვილებს განსხვავებულობაზე? როგორ უნდა უპასუხონ უცხო ადამიანების მზერას? როგორ უნდა მოამზადონ ბავშვები იმ გამოწვევებისთვის, რომლებიც შესაძლოა მომავალში შეხვდეთ? - ეს კითხვები მათი ოჯახის ცხოვრების მნიშვნელოვან ნაწილად იქცა.

მათი შოუს მთავარი თემები დროთა განმავლობაში ბევრად უფრო ფართო გახდა — ქორწინება, ფინანსური გადაწყვეტილებები, მშობლობა, კარიერა, სახლის მოწყობა, მოგზაურობა, ბავშვების განათლება და ოჯახური უთანხმოებები. მათ შორის, ზაკისა და თორის ურთიერთობაშიც იყო რთული პერიოდები. მესამე შვილის დაბადების შემდეგ წყვილი ღიად საუბრობდა იმაზე, რომ ცხოვრების დატვირთულმა პერიოდმა მათ ურთიერთობაზე გავლენა მოახდინა და ერთმანეთისთვის მეტი დროის გამოყოფა დასჭირდათ.ეს იყო სწორედ ის ნაწილი, რაც რეალითი-შოუს მაყურებელს განსაკუთრებით იზიდავდა — ეკრანზე არ ჩანდა მხოლოდ იდეალური ოჯახური სურათი. იყო დაღლილობა, კამათი, გაუგებრობა და შემდეგ პრობლემების გადაჭრის მცდელობაც.

ყველაზე დიდი ოჯახური კონფლიქტი — Roloff Farms

ერთ-ერთი ყველაზე რთული თავი ოჯახის ფერმას უკავშირდება.წლების განმავლობაში არსებობდა მოლოდინი, რომ როლოფების ფერმა მომავალში შვილებს გადაეცემოდათ. მაგრამ როდესაც ზაკსა და მის ტყუპისცალ ჯერემის ფერმის ნაწილის შეძენის სურვილი გაუჩნდათ, მოლაპარაკებები წარმატებით არ დასრულდა.საკითხი მხოლოდ უძრავ ქონებაზე შეთანხმება აღარ იყო — ის მამა-შვილის ურთიერთობაზეც აისახა.

TLC-ის ქრონოლოგიაში აღნიშნულია, რომ მეთისა და ზაკის მოლაპარაკებების ჩავარდნას ოჯახში დაძაბულობა მოჰყვა. მოგვიანებით ზაკი და თორი ვაშინგტონის შტატში გადავიდნენ, ხოლო ურთიერთობა ზაკსა და მამამისს შორის მნიშვნელოვნად გართულდა.

ფერმის საკითხი Little People, Big World-ის ბოლო სეზონების ერთ-ერთ ცენტრალურ თემადაც იქცა.2022 წელს მეთმა ფერმის ნაწილი გასაყიდად გამოიტანა, ხოლო მოგვიანებით მთავარი სახლი გააქირავა კიდეც.

რატომ დატოვეს ზაკმა და თორიმ შოუ?

2024 წელს ახალგაზრდა წყვილმა გამოაცხადა, რომ Little People, Big World-იდან მიდიოდნენ.ეს გადაწყვეტილება 25 სეზონის შემდეგ მიიღეს — ანუ ზაკი პრაქტიკულად მთელი ზრდასრული ცხოვრების განმავლობაში ტელევიზიის ნაწილი იყო. წყვილმა საკუთარი გადაწყვეტილება Raising Heights პოდკასტში განმარტა. ზაკის თქმით, ბოლო სეზონის გამოცდილება განსაკუთრებით რთული აღმოჩნდა. ერთ-ერთი მთავარი ფაქტორი ოჯახური დაძაბულობა და ფერმის საკითხი აღმოჩნდა. თორიმ კი თქვა, რომ პროექტი მათთვის იმ ეტაპზე აღარ იყო ის, რის გაგრძელებასაც ისურვებდნენ. ამასთან, მათთვის მნიშვნელოვანი გახდა სამი შვილის პირადი სივრცე და ოჯახური ცხოვრების კამერებისგან მოშორებით გაგრძელება.სწორედ ასე დასრულდა ზაკის ისტორიაში თითქმის 18-წლიანი სატელევიზიო თავგადასავალი.

შოუდან წასვლის შემდეგ საჯარო სივრციდან მთლიანად არ გამქრალან.მათ დაიწყეს საკუთარი პოდკასტი — Raising Heights, სადაც უკვე საკუთარი წესებით საუბრობენ ოჯახზე, ურთიერთობებზე, მშობლობაზე და იმ გამოცდილებაზე, რომელიც რეალითი-ტელევიზიაში თითქმის ორი ათწლეულის განმავლობაში მიიღეს.განსხვავება ის არის, რომ ახლა თავად წყვეტენ, რა მოუყვნენ მაყურებელს და რა დატოვონ ოჯახის პირად სივრცეში.ეს ცვლილება განსაკუთრებით მნიშვნელოვანია იმის გათვალისწინებით, რომ მათი შვილები ფაქტობრივად კამერების წინ გაიზარდნენ.

ისინი შვილებთან ერთად ვაშინგტონის შტატში ცხოვრობენ. ოჯახის ცხოვრების ახალი ეტაპი ბევრად უფრო მშვიდი და პირადია, ვიდრე ფერმაში გატარებული წლები.