მეგან მარკლი კიდევ ერთხელ აღმოჩნდა სოციალური ქსელების მომხმარებელთა ყურადღების ცენტრში. პრინც ჰარის მეუღლემ ახალი ვიდეო გამოაქვეყნა, რომელშიც თავის ქალიშვილთან, ლილიბეტთან ერთად ჯემს ამზადებს. თუმცა ოჯახურმა კადრებმა, რომლებსაც დადებითი გამოხმაურება უნდა მოჰყოლოდა, საზოგადოების ნაწილის უკმაყოფილება გამოიწვია.

ვიდეო მეგან მარკლის საკუთარი ბრენდის, As Ever-ის ახალი პროდუქციის გამოშვებას უკავშირდება. პუბლიკაციას სასექსის ჰერცოგინიამ ვრცელი ტექსტიც დაურთო, რომელშიც საკუთარი სამეწარმეო გამოცდილება გაიხსენა და აღნიშნა, რომ ბიზნესისადმი ინტერესი ჯერ კიდევ ბავშვობაში გაუჩნდა.

„დაახლოებით რვა წლის ვიყავი, როცა ჩემი პირველი საქმე წამოვიწყე. ბებიაჩემის Singer-ის საკერავი მანქანით თმის რეზინებს ვკერავდი და თითო დოლარად ვყიდდი. ასევე ვყიდდი სკაუტების ორცხობილებს, ლიმონათს, ვმუშაობდი გაყინული იოგურტის კაფეში და კიდევ არაერთი საქმე გამომიცდია. სამეწარმეო ნიჭი ყოველთვის მქონდა. ერთხელ ჩემს ბლოგში The Tig დავწერე, რომ ყოველი წარმატებული ქალის უკან თავად ეს ქალი დგას. და ეს სიმართლეა“, – წერს მეგან მარკლი.

ერთი შეხედვით, ეს წარმატებული ქალის შთამაგონებელი ისტორიაა, თუმცა სოციალური ქსელების მომხმარებელთა ნაწილმა მეგანის მონათხრობში გარკვეული შეუსაბამობები შენიშნა.

მათი ყურადღება მიიქცია იმ ფაქტმა, რომ მარკლის ძველ ბლოგში The Tig ბავშვობის ბიზნესის შესახებ განსხვავებული ვერსია იყო აღწერილი. კერძოდ, ადრინდელი მონათხრობის მიხედვით, მეგანი თმის რეზინებს ქსოვილის ნარჩენებისგან ამზადებდა, მათ უბრალოდ ერთმანეთზე აკავშირებდა და თითოეულს ხუთ დოლარად ყიდდა. ახალ პუბლიკაციაში კი საკერავი მანქანა და ერთი დოლარი ახსენა.

ამ განსხვავებამ მომხმარებელთა ნაწილს გაუჩინა ეჭვი, რომ მეგანი საკუთარი ბრენდის პოპულარიზაციისთვის ბავშვობის ისტორიას უფრო მიმზიდველად წარმოაჩენს. თუმცა თავად მარკლს ამ შეუსაბამობაზე განმარტება არ გაუკეთებია.

ეს პირველი შემთხვევა არ არის, როდესაც მეგანის ბრენდის სარეკლამო მასალები სოციალურ ქსელში განხილვის საგანი ხდება. მანამდე მომხმარებლებმა ყურადღება მიაქციეს ფოტოს, რომელზეც ჰერცოგინია სამზარეულოში, გაზქურასთან იდგა. მათი დაკვირვებით, ქურა გამორთული იყო, მიუხედავად იმისა, რომ ფოტო საჭმლის მომზადების პროცესს ასახავდა.

რატომ გააკრიტიკეს მეგანი ქალიშვილის ვიდეოში გამოჩენის გამო?

განსაკუთრებული განხილვა გამოიწვია ახალ ვიდეოში მეგანის ქალიშვილის, ლილიბეტის მონაწილეობამ.

მომხმარებელთა ნაწილმა გაიხსენა, რომ მეგან მარკლი და პრინცი ჰარი არაერთხელ საუბრობდნენ შვილების პირადი ცხოვრების დაცვის აუცილებლობაზე. სწორედ ამიტომ, ზოგიერთი მათგანისთვის მოულოდნელი აღმოჩნდა, რომ ჰერცოგინიამ ქალიშვილი საკუთარი ბრენდის სარეკლამო ვიდეოში ჩართო.

კრიტიკოსების აზრით, მეგანის გადაწყვეტილება ეწინააღმდეგება მის ადრინდელ განცხადებებს ბავშვების პირადი სივრცის დაცვის შესახებ. თუმცა სხვები მიიჩნევენ, რომ მშობლებს შეუძლიათ თავად გადაწყვიტონ, რა ფორმით და რამდენად ხშირად აჩვენონ შვილები საზოგადოებას.

მეგან მარკლისა და პრინც ჰარის ცხოვრება სამეფო ოჯახის დატოვების შემდეგ

შეგახსენებთ, რომ პრინცი ჰარი და მეგან მარკლი 2018 წელს დაქორწინდნენ. მათი ურთიერთობა თავიდანვე დიდი საზოგადოებრივი ინტერესის საგანი იყო.

ქორწინების შემდეგ მეგანს ბრიტანულ პრესაში არაერთხელ აკრიტიკებდნენ. განსაკუთრებით ხშირად განიხილებოდა მისი ურთიერთობა სამეფო ოჯახის წევრებთან, სასახლის მკაცრ პროტოკოლთან შეგუების სირთულეები და უთანხმოებები.

2020 წელს წყვილმა სამეფო ოჯახის უფროსი წევრების მოვალეობებზე უარი თქვა და საცხოვრებლად ამერიკის შეერთებულ შტატებში გადავიდა.

აშშ-ში ცხოვრების განმავლობაში მეგანმა და ჰარიმ არაერთი მედია და ბიზნესპროექტი წამოიწყეს. მეგანმა განსაკუთრებული ყურადღება დაუთმო ცხოვრების სტილის მიმართულებას, კულინარიას, საოჯახო პროდუქტებსა და საკუთარი ბრენდის განვითარებას.

2026 წლის აგვისტოში კი პრინცი ჰარი და მეგან მარკლი შვილებთან ერთად დიდ ბრიტანეთში დაბრუნდნენ. ბრიტანეთში დაბრუნების ერთ-ერთ მიზეზად შვილების განათლება სახელდება. შვიდი წლის არჩიმ და ხუთი წლის ლილიბეტმა სექტემბერში ბრიტანულ სკოლაში დაიწყეს სწავლა. თუმცა სასწავლო წლის დაწყებიდან რამდენიმე დღეში მშობლებს სკოლის შეცვლა მოუხდათ.

როგორც წყვილის წარმომადგენელმა განმარტა, გადაწყვეტილება უსაფრთხოების სამსახურთან კონსულტაციის შემდეგ მიიღეს. პრობლემა სკოლამდე გადაადგილების უსაფრთხოებას უკავშირდებოდა.

„ეს გადაწყვეტილება არავითარ შემთხვევაში არ უნდა აღიქმებოდეს როგორც სკოლის ან იმ ზრუნვის უარყოფითი შეფასება, რომელსაც ბავშვები იქ იღებდნენ“, – განაცხადა ჰარისა და მეგანის წარმომადგენელმა.

თავად პრინცმა ჰარიმაც ისაუბრა სამშობლოში დაბრუნებაზე. მისი თქმით, ბავშვები სკოლაში თავს ბედნიერად გრძნობენ, თავად კი მოხარულია, რომ კვლავ ბრიტანეთში ცხოვრობს. მიუხედავად დაბრუნებისა, ჰარი და მეგანი სამეფო ოჯახის ოფიციალური მოვალეობების შესრულებას არ აპირებენ. ისინი ბრიტანეთში კერძო რეზიდენციაში ცხოვრობენ, ამასთან, ინარჩუნებენ სახლს კალიფორნიაშიც.

ჯერჯერობით უცნობია, რამდენად შეუწყობს ხელს წყვილის დაბრუნება სამეფო ოჯახთან ურთიერთობების გაუმჯობესებას. ჰარისა და მისი უფროსი ძმის, პრინც უილიამის ურთიერთობა კვლავ დაძაბულია. თუმცა ბრიტანეთში ცხოვრება ჰარის შესაძლებლობას აძლევს, უფრო ხშირად ჰქონდეს ურთიერთობა მამასთან, მეფე ჩარლზ III-სთან

პრინცი ჰარი ბრიტანეთში დაბრუნდა და ითხოვს, რომ სამეფო ოჯახმა მის ცოლს ბოდიში მოუხადოს - არაფერი შეცვლილა, ისევ ისეთი გაბოროტებულია ყველაზე...