რომის პაპ ლეო XIV-ს ფილტვის კიბო დაუდგინდა. 71 წლის პონტიფიკოსს რომის ოპერაცია ჩაუტარდა, რომლის დროსაც მარჯვენა ფილტვის ქვედა წილი ამოკვეთეს. ამის შესახებ ვატიკანის პრესსამსახურმა 13 ოქტომბერს ოფიციალური განცხადება გაავრცელა.

ვატიკანის ინფორმაციით, პაპს გეგმური სამედიცინო გამოკვლევის დროს მარჯვენა ფილტვში მცირე ზომის წარმონაქმნი აღმოუჩინეს. ცვლილება ადრეულ ეტაპზე გამოვლინდა, რის შემდეგაც ექიმებმა ქირურგიული ჩარევა ურჩიეს.

ოპერაციის დროს ჩატარებულმა ქსოვილის ჰისტოლოგიურმა გამოკვლევამ ფილტვის ადენოკარცინომის დიაგნოზი დაადასტურა. ადენოკარცინომა ფილტვის კიბოს ერთ-ერთი ყველაზე გავრცელებული სახეობაა.

ოპერაციამ წარმატებით ჩაიარა და გართულებები არ მოჰყოლია.

ლეო XIV საოპერაციოში დაახლოებით სამი საათის განმავლობაში იმყოფებოდა, თუმცა უშუალოდ ქირურგიული ჩარევა საათ-ნახევარს გაგრძელდა. ოპერაცია მცირე განაკვეთებით, სპეციალური კამერისა და ქირურგიული ინსტრუმენტების დახმარებით ჩატარდა, რაც ტრადიციულ ღია ოპერაციასთან შედარებით ნაკლებად ტრავმული მეთოდია. პონტიფიკოსი ანესთეზიიდან გართულებების გარეშე გამოვიდა და ხანმოკლე დაკვირვების შემდეგ საავადმყოფოს პალატაში გადაიყვანეს.

ვატიკანმა პაპის ყველა აუდიენცია 20 ოქტომბრამდე გააუქმა. წინასწარი ინფორმაციით, ოპერაციის შემდგომი გამოჯანმრთელებისთვის მას დაახლოებით ერთი კვირა დასჭირდება.

ლეო XIV-მ ჯანმრთელობის მდგომარეობის შესახებ საზოგადოებას ოპერაციამდე თავად აცნობა. მან განაცხადა, რომ ექიმებმა ფილტვში მცირე, ლოკალიზებული წარმონაქმნი აღმოუჩინეს და ქირურგიული ჩარევა ურჩიეს. პონტიფიკოსმა ექიმების რეკომენდაციის შესრულება გადაწყვიტა და მორწმუნეებს ლოცვისთვის მადლობა გადაუხადა.

ვინ არის რომის პაპი ლეო XIV?

ლეო XIV, რომლის საერო სახელია რობერტ ფრენსის პრევოსტი, რომის 267-ე პაპი 2025 წლის 8 მაისს, პაპ ფრანცისკეს გარდაცვალების შემდეგ გახდა.

იგი ისტორიაში შევიდა როგორც პირველი ამერიკელი პონტიფიკოსი და ავგუსტინელთა ორდენის პირველი წარმომადგენელი, რომელმაც კათოლიკური ეკლესიის მეთაურის თანამდებობა დაიკავა.

სახელი ლეო XIV მან პაპ ლეო XIII-ის პატივსაცემად აირჩია. ლეო XIII კათოლიკურ ეკლესიას 1878–1903 წლებში ხელმძღვანელობდა და კათოლიკური სოციალური მოძღვრების განვითარებაში მნიშვნელოვანი წვლილი შეიტანა.

ახალი პონტიფიკოსის მსახურების დაწყების საზეიმო მესა 2025 წლის 18 მაისს გაიმართა.

რომელ კლინიკებში შეგიძლიათ ჩაიტაროთ ფილტვის კიბოს უფასო სკრინინგი და რომელი კვლევით შეაფასებენ თქვენს ფილტვებს

ამ ქმედებებით მნიშვნელოვნად ამცირებთ ისეთი დაავადებების განვითარების რისკს, როგორებიცაა, ფილტვის კიბო, ნაწლავის კიბო, ძუძუს კიბო, საშვილოსნოს ყელის კიბო, რომლებიც ყველაზე ხშირია.... არ დაიზაროთ, არც ერთი ჩამოთვლილთაგან სირთულეს არ წარმოადგენს, არ არის თანხებთან დაკავშირებული...