სასკოლო ფორმების განაწილების მეორე ეტაპი იწყება -  ვადები და დეტალები - მშობლები

დაწყებითი საფეხურის მოსწავლეებისთვის სასკოლო ფორმის შეძენა, დადგენილი 2 ნოემბრიდან იქნება შესაძლებელი, როგორც რეალიზაციის პუნქტებში, ასევე ონლაინ ელექტრონული პლატფორმის მეშვეობით – formebi.emis.ge. ამის შესახებ ინფორმაციას შპს საგანმანათლებლო რესურსები აქვეყნებს.

საიტზე შეგიძლია, გაეცნოთ, სამოსის როგორც ზომებს, ასევე ღირებულებას. ფორმის შეძენა შესაძლებელია, ონლაინ, საკურიერო მომსახურებითაც.

აღსანიშნავია, რომ შესაძლებელია ცალკეული მოდელების შეძენა. სრული კომპლექტის შეძენა სავალდებულო არ არის.

როგორ დავაბრუნო ან გადავცვალო ონლაინ შეძენილი ფორმა?

მოსწავლის მშობელს/კანონიერ წარმომადგენელს უფლება აქვს, ონლაინ შეძენილი სასკოლო ფორმის გადაცვლის ან დაბრუნების მიზნით, მიმართოს შპს "საგანმანათლებლო რესურსებს".

ქარხნული წუნის აღმოჩენის, ან ზომის შეუსაბამობის შემთხვევებში 14 დღის განმავლობაში შესაძლებელია შესყიდული ფორმის გადაცვლა/დაბრუნება.

ზომის შეუსაბამობის შემთხვევაში მოთხოვნის წარდგენა შესაძლებელია ერთჯერადად. აღნიშნული შეზღუდვა არ ვრცელდება ქარხნული დეფექტის აღმოჩენის შემთხვევაზე.

სასკოლო ფორმის გადაცვლის ან დაბრუნების შემთხვევაში, ტანსაცმელი უნდა იყოს დაუზიანებელი, შენარჩუნებული ჰქონდეს სასაქონლო სახე, სამომხმარებლო თვისებები, ეტიკეტი და მას არ უნდა აღენიშნებოდეს გამოყენების კვალი.

ვისთვის არის სასკოლო ფორმა უფასო?

სასკოლო ფორმა უსასყიდლოდ გადაეცემა საჯარო სკოლის დაწყებითი საფეხურის იმ მოსწავლეებს, რომლებიც:

• რეგისტრირებულნი არიან სოციალურად დაუცველი ოჯახების მონაცემთა ერთიან ბაზაში და მათი ოჯახების სარეიტინგო ქულა 65 001 ქულაზე ნაკლებია;
• არიან მრავალშვილიანი ოჯახების (ოთხი და მეტი შვილი) წევრები, რეგისტრირებულნი არიან სოციალურად დაუცველი ოჯახების მონაცემთა ერთიან ბაზაში და მათი ოჯახის სარეიტინგო ქულა 65 000 ქულაზე მეტი და 120 001 ქულაზე ნაკლებია;
• ჩართულნი არიან მინდობით აღზრდის სახელმწიფო პროგრამაში;
• განთავსებულნი არიან მცირე საოჯახო ტიპის სახლებში;
• ჩართულნი არიან მიუსაფარ ბავშვთა თავშესაფრების მომსახურებაში;
• განთავსებულნი არიან თბილისის ბავშვთა სახლში;
• 2022 წლის 24 თებერვალს უკრაინაში დაწყებული საომარი მოქმედებების შედეგად ვერ ახერხებენ უკრაინის სკოლებში ზოგადი განათლების მიღების გაგრძელებას და ჩარიცხულნი არიან საქართველოს საჯარო სკოლებში.

თუ სასკოლო ფორმა მოსწავლეს უფასოდ ეკუთვნის, შესაძლებელია ონლაინ შეკვეთით სარგებლობა?

დიახ. კუთვნილ უსასყიდლო კომპლექტს ონლაინ შეკვეთითაც მიიღებთ - ეს ერთეულები კალათაში 0 ₾-ად აისახება და გადასახდელი მხოლოდ მიწოდების საფასური რჩება. კომპლექტის ზემოთ დამატებული ნივთი კატალოგში მითითებული ფასით იყიდება.

უსასყიდლოდ გადასაცემი კომპლექტი მოიცავს:

• ბიჭებისთვის – 1 პიჯაკსა და 2 შარვალს;
• გოგოებისთვის – 1 პიჯაკს, 1 შარვალსა და 1 ქვედაკაბას.

მთელი ქვეყნის მასშტაბით 83 რეალიზაციის პუნქტი იფუნქციონირებს ორშაბათიდან შაბათის ჩათვლით, 10:00 საათიდან 18:00 საათამდე.

იხილეთ სასკოლო ფორმების რეალიზაციის პუნქტების მისამართების სრული ჩამონათვალი:formebi.emis.ge/locations

მისამართები, სადაც სასკოლო ფორმები გაიყიდება- შეძენა კვირის ნებისმიერ დღეს არის შესაძლებელი