მუცლის ტკივილი მოზარდ გოგონებში — 7 სიმპტომი, რომლებიც მშობლებმა უყურადღებოდ არ უნდა დატოვონ - მშობლები

ბევრი გოგონა წლების განმავლობაში ითმენს ძლიერ ტკივილს, რადგან ფიქრობს, რომ ეს მენსტრუალური ციკლის ბუნებრივი ნაწილია. მშობლებს კი ხშირად არც კი აქვთ წარმოდგენა, რომ ერთი შეხედვით ჩვეულებრივი ჩივილების უკან შესაძლოა ქრონიკული დაავადება იმალებოდეს.

როგორ უნდა განვასხვაოთ ჩვეულებრივი მენსტრუალური ტკივილი ენდომეტრიოზის შესაძლო სიმპტომებისგან, როდის არის აუცილებელი ექიმთან მისვლა და რას უნდა მიაქციონ ყურადღება მშობლებმა?

რა არის ენდომეტრიოზი და რატომ შეიძლება განვითარდეს მოზარდობის ასაკში?

ენდომეტრიოზი ქრონიკული დაავადებაა, რომლის დროსაც საშვილოსნოს შიდა გარსის, ენდომეტრიუმის მსგავსი ქსოვილი საშვილოსნოს გარეთ ვითარდება. ასეთი კერები შეიძლება გაჩნდეს მუცლის ღრუში, მცირე მენჯის იოგებზე, საკვერცხეებზე, ნაწლავებსა და შარდის ბუშტზე.

ეს ქსოვილი ჰორმონულ ცვლილებებზე რეაგირებს, რაც იწვევს ადგილობრივ ანთებას, ტკივილს და ზოგჯერ შეხორცებების წარმოქმნას.

მიუხედავად იმისა, რომ ენდომეტრიოზი ტრადიციულად ზრდასრული ქალების პრობლემად ითვლებოდა, დაავადება შესაძლოა მენსტრუაციის დაწყებიდან მალევე გამოვლინდეს.

კვლევების მიხედვით, ენდომეტრიოზის მქონე ქალების მნიშვნელოვან ნაწილს პირველი სიმპტომები ჯერ კიდევ მოზარდობის ასაკში აღენიშნებოდა.

დაავადების დროულად ამოცნობა ხშირად რთულია. პირველი ჩივილებიდან დიაგნოზის დასმამდე ზოგჯერ მრავალი წელი გადის. ამის ერთ-ერთი მთავარი მიზეზი მენსტრუალური ტკივილის ნორმალურ მოვლენად მიჩნევაა.

გოგონები, მშობლები და ზოგჯერ სამედიცინო პერსონალიც კი ძლიერ სპაზმებს, გულისრევასა და სისუსტეს ასაკობრივ თავისებურებებს მიაწერენ.

თუმცა მნიშვნელოვანია ერთი გარემოების გათვალისწინება: მენსტრუაციას შეიძლება ახლდეს გარკვეული დისკომფორტი, მაგრამ ტკივილი, რომელიც გოგონას ყოველთვიურად სკოლაში სიარულის, მოძრაობისა და ჩვეულებრივი საქმიანობის საშუალებას არ აძლევს, ნორმად არ უნდა ჩაითვალოს.

ენდომეტრიოზის 7 ნიშანი, რომლებსაც ყურადღება უნდა მიაქციოთ

მოზარდებში ენდომეტრიოზი ყოველთვის ტიპური სიმპტომებით არ ვლინდება. თუ ზრდასრულ ქალებში ტკივილი ხშირად მენსტრუალური ციკლის კონკრეტულ დღეებს უკავშირდება, მოზარდებში ჩივილები შეიძლება არარეგულარული იყოს და სხვა დაავადებებს ჰგავდეს.

1. ძლიერი მენსტრუალური ტკივილი, რომელსაც ჩვეულებრივი ტკივილგამაყუჩებლები ვერ ამსუბუქებს

ენდომეტრიოზის ერთ-ერთი ყველაზე გავრცელებული სიმპტომია ძლიერი მენსტრუალური ტკივილი, ანუ დისმენორეა.

ტკივილი შეიძლება იმდენად ინტენსიური იყოს, რომ გოგონას საწოლიდან ადგომა, სკოლაში წასვლა ან ყოველდღიური საქმიანობის შესრულება უჭირდეს.

განსაკუთრებით საყურადღებოა შემთხვევები, როდესაც სწორად შერჩეული და მიღებული არასტეროიდული ანთების საწინააღმდეგო პრეპარატები ტკივილს საკმარისად ვერ ამსუბუქებს.

მსგავსი ჩივილები ზოგჯერ სასქესო ორგანოების განვითარების თანდაყოლილ ანომალიებსაც შეიძლება უკავშირდებოდეს, ამიტომ აუცილებელია გინეკოლოგის კონსულტაცია.

2. ტკივილი მუცლის ქვედა ნაწილში მენსტრუაციებს შორის

ენდომეტრიოზის დროს ტკივილი ყოველთვის მხოლოდ მენსტრუაციის დღეებში არ ვლინდება.

მოზარდს შეიძლება აწუხებდეს სიმძიმის შეგრძნება, ყრუ ან მქაჩავი ტკივილი მუცლის ქვედა ნაწილში, რომელიც ციკლის სხვადასხვა პერიოდში ჩნდება.

ზოგჯერ ასეთი ტკივილი კუნთების გადაძაბვას, ნევრალგიას ან ოვულაციასთან დაკავშირებულ დისკომფორტს მიეწერება.

თუ ტკივილი ხშირად მეორდება, მნიშვნელოვანია მისი მიზეზის დადგენა.

3. მენსტრუაციის გამო სკოლის გაცდენა და ჩვეულებრივ აქტივობებზე უარის თქმა

თუ გოგონა ყოველთვიურად მენსტრუაციის გამო ერთ ან ორ სასწავლო დღეს აცდენს, სპორტულ აქტივობებზე უარს ამბობს ან იძულებულია, მთელი დღე საწოლში გაატაროს, ეს საყურადღებო ნიშანია.

ასეთი მდგომარეობა არ უნდა ჩაითვალოს მენსტრუაციის ჩვეულებრივ თავისებურებად.

სკოლიდან გათავისუფლება პრობლემას ვერ აგვარებს. აუცილებელია ტკივილის მიზეზის შეფასება და შესაბამისი მკურნალობის შერჩევა.

4. საჭმლის მომნელებელი სისტემის პრობლემები

ენდომეტრიოზს ზოგჯერ ისეთი სიმპტომებიც ახლავს, რომლებიც ერთი შეხედვით გინეკოლოგიურ დაავადებას არ უკავშირდება.

მოზარდს შეიძლება აღენიშნებოდეს გულისრევა, მუცლის შებერილობა, ტკივილი დეფეკაციის დროს, შეკრულობა ან დიარეა.

განსაკუთრებით საყურადღებოა, თუ ეს სიმპტომები მენსტრუაციის დაწყებამდე ან მის მიმდინარეობისას ძლიერდება.

მსგავსი ჩივილები ზოგჯერ გაღიზიანებული ნაწლავის სინდრომს ჰგავს, რის გამოც ენდომეტრიოზის დიაგნოსტიკა შეიძლება დაგვიანდეს.

5. ტკივილი შარდვის დროს და ცისტიტის მსგავსი სიმპტომები

ზოგიერთ შემთხვევაში ენდომეტრიოზი შარდსასქესო სისტემასთან დაკავშირებული ჩივილებითაც ვლინდება.

შესაძლოა აღინიშნებოდეს მტკივნეული შარდვა, გახშირებული მოთხოვნილება და დისკომფორტი შარდის ბუშტის ავსებისას.

ზოგჯერ ეს სიმპტომები ცისტიტს ჰგავს, თუმცა შარდის ანალიზში ინფექცია არ დასტურდება.

ასეთ შემთხვევაში საჭიროა დამატებითი გამოკვლევა, რადგან მსგავსი ჩივილები ენდომეტრიოზის გარდა სხვა მდგომარეობებსაც შეიძლება უკავშირდებოდეს.

6. უხვი ან არარეგულარული მენსტრუაცია და სისხლიანი გამონადენი

ენდომეტრიოზის მქონე ზოგიერთ მოზარდს მენსტრუალური ციკლის დარღვევებიც აღენიშნება.

საყურადღებოა მენსტრუაცია, რომელიც შვიდ დღეზე მეტხანს გრძელდება, ძალიან უხვი სისხლდენა, დიდი კოლტები, ციკლებს შორის სისხლიანი გამონადენი ან მენსტრუაციის დაწყებამდე და დასრულების შემდეგ მუქი, მცირერაოდენობით გამონადენი.

თუმცა უნდა აღინიშნოს, რომ ეს ნიშნები მხოლოდ ენდომეტრიოზისთვის არ არის დამახასიათებელი. მოზარდობის ასაკში არარეგულარული ციკლი ხშირად ჰორმონული სისტემის ჩამოყალიბებას უკავშირდება, ხოლო უხვი სისხლდენა შეიძლება სხვა გინეკოლოგიური ან სისხლის შედედებასთან დაკავშირებული პრობლემის ნიშანიც იყოს.

ხანგრძლივმა და უხვმა სისხლდენამ შესაძლოა რკინის დეფიციტი და ანემია გამოიწვიოს, რასაც ხშირად ახლავს სისუსტე, დაღლილობა და ყურადღების კონცენტრაციის გაუარესება.

7. ენდომეტრიოზის ოჯახური ისტორია

თუ დედას, დას ან სხვა ახლო ნათესავს ენდომეტრიოზი აქვს, გოგონას დაავადების განვითარების რისკიც მომატებულია.

ოჯახური ისტორია განსაკუთრებით მნიშვნელოვანია მაშინ, როდესაც მოზარდს ძლიერი მენსტრუალური ტკივილი ან სხვა საეჭვო სიმპტომები აღენიშნება.

დამატებით ყურადღებას იმსახურებენ გოგონები, რომლებსაც მენსტრუაცია ადრეულ ასაკში დაეწყოთ.

თუმცა გენეტიკური მიდრეკილება არ ნიშნავს, რომ დაავადება აუცილებლად განვითარდება.

რატომ შეიძლება ენდომეტრიოზის დიაგნოსტიკას წლები დასჭირდეს?

მოზარდებში დაავადება ხშირად ვლინდება მცირე, ზედაპირული კერებით მუცლის ღრუს ამომფენ გარსზე და არა საკვერცხის უკვე ჩამოყალიბებული ენდომეტრიოზული კისტებით.

ამიტომ ნორმალური ექოსკოპიური პასუხი ენდომეტრიოზს სრულად ვერ გამორიცხავს.

როდესაც გამოკვლევაზე აშკარა ცვლილებები არ ჩანს, მშობლებმა შეიძლება იფიქრონ, რომ გოგონას ჩივილები გადაღლილობას, სტრესს ან ემოციურ მდგომარეობას უკავშირდება.

მეორე მნიშვნელოვანი მიზეზი ფსიქოლოგიურია.

მოზარდს შეიძლება რცხვენოდეს ინტიმურ სიმპტომებზე საუბარი ან ეგონოს, რომ ძლიერი მენსტრუალური ტკივილი ყველა გოგონას აწუხებს.

თუ გარშემო მყოფებიც ეუბნებიან, რომ „ყველა ითმენს და შენც უნდა მოითმინო“, გოგონა ხშირად დახმარების თხოვნას წყვეტს.

შედეგად, ტკივილი გრძელდება, ხოლო დიაგნოზის დასმა და მკურნალობის დაწყება გვიანდება.

როგორ უნდა მოიქცნენ მშობლები?

ენდომეტრიოზზე ეჭვის შემთხვევაში არ ღირს ლოდინი იმ იმედით, რომ ასაკის მატებასთან ერთად ყველაფერი თავისთავად მოგვარდება.

დაავადებამ ზოგიერთ შემთხვევაში შეიძლება გამოიწვიოს ქრონიკული ანთება, შეხორცებები და რეპროდუქციულ ჯანმრთელობასთან დაკავშირებული გართულებები. თუმცა ენდომეტრიოზის არსებობა ავტომატურად არ ნიშნავს, რომ გოგონას მომავალში უშვილობა ექნება.

მშობლებს რამდენიმე მარტივი ნაბიჯით შეუძლიათ დაეხმარონ შვილს.

აწარმოეთ სიმპტომების დღიური. ჩაინიშნეთ, რომელ დღეებში ჩნდება ტკივილი, რამდენად ძლიერია ის 1-დან 10 ქულამდე, რომელი მედიკამენტები მიიღო მოზარდმა და რამდენჯერ მოუწია სკოლის ან ვარჯიშის გაცდენა. ეს ინფორმაცია ექიმს მდგომარეობის შეფასებაში დაეხმარება.

მიმართეთ ბავშვთა და მოზარდთა გინეკოლოგს. მნიშვნელოვანია სპეციალისტის შერჩევა, რომელიც მოზარდთა გინეკოლოგიურ პრობლემებს იცნობს და გოგონას ჩივილებს სერიოზულად მოეკიდება. საჭიროების შემთხვევაში ექიმი დამატებით გამოკვლევებს დანიშნავს.

არ შეგეშინდეთ მკურნალობის განხილვის. ენდომეტრიოზის დროს გამოიყენება ტკივილის მართვისა და ჰორმონული მკურნალობის სხვადასხვა მეთოდი. შესაბამისი პრეპარატები მოზარდებშიც შეიძლება დაინიშნოს, თუმცა მათი შერჩევა ინდივიდუალურად, ასაკის, სიმპტომებისა და შესაძლო უკუჩვენებების გათვალისწინებით უნდა მოხდეს.

არ ჩათვალოთ ძლიერი ტკივილი ჩვეულებრივ მოვლენად. თუ მენსტრუაცია გოგონას ყოველდღიურ ცხოვრებას რეგულარულად არღვევს, ეს ექიმთან კონსულტაციის საკმარისი მიზეზია.

ყველაზე მნიშვნელოვანი კი შვილის მხარდაჭერაა. ქრონიკული ტკივილი მოზარდს არა მხოლოდ ფიზიკურად, არამედ ემოციურადაც ფიტავს. მას შეიძლება გაუჩნდეს შიში, დანაშაულის განცდა და მარტოობის შეგრძნება.

როდესაც მშობლები მის ჩივილებს სერიოზულად აღიქვამენ, არ მიიჩნევენ მათ ახირებად და დახმარებისთვის მზად არიან, მოზარდს გაცილებით უადვილდება საკუთარ ჯანმრთელობაზე ზრუნვა.

გახსოვდეთ: ძლიერი მენსტრუალური ტკივილი ყოველთვის ენდომეტრიოზს არ ნიშნავს, მაგრამ თუ ის მეორდება, ყოველდღიურ საქმიანობას ხელს უშლის ან სხვა სიმპტომებთან ერთად ვლინდება, მიზეზის გარკვევა აუცილებელია.

როდის არის მენსტრუაციის დროს ტკივილი საგანგაშო და რომელ დაავადებებზე მიანიშნებს?