"ქართველი დედები, რომლებიც ზედმეტი მეურვეობით და შვილების კუდში დევნით გამოირჩეოდნენ, ასე მასიურად წავიდნენ ემიგრაციაში და შვილები მარტოობასა და შიშში დატოვეს" - კიდევ ერთი ემიგრანტი დედის ტრაგიკული ამბავი ინტერნეტში ფილოლოგ თამარ უჯმაჯურიძის პოსტს დიდი გამოხმაურება მოჰყვა. ქალბატონი თამარი ერთ შემთხვევაზე წერდა:
"საშინლად დამძიმებული ვარ - ერთ-ერთ გვერდზე ქალი წერდა, სალონიკის ბილეთს გავაჩუქებ, დაჯავშნილი მაქვსო. გამიკვირდა. საქმე კი აი, თურმე როგორ ყოფილა: დედისთვის, რომელიც 10 წელი ემიგრაციაში იმყოფება და შვილებისთვის ყველაფერი გააკეთა, ცხოვრება აუწყო, შვილებს შემოუთვლიათ, არ ჩამოხვიდეო. არადა, ყველაფერი შვილების სახელზე აქვს გაფორმებული და თავად, ფაქტობრივად, არაფერი გააჩნია. საშინლად ვარ... რა ხდება ნეტავ შვილის თავში, დედას რომ უარყოფს და მის სიყვარულს ივიწყებს? ღმერთო, გადაგვარჩინე!!!"
პოსტს რამდენიმე საგულისხმო კომენტარი მოჰყვა. ამ სამწუხარო რეალობას ბევრი გამოეხმაურა. რამდენიმე მოსაზრებას გთავაზობთ:
"ის არაა სიყვარული, მათ გამო რომ წავიდა და ვირივით იმუშავა, ცხოვრება აუწყო და ქონება შეუძინა? აბა რა არის ეს, ქეთი? ვის სიამოვნებს უცხოეთში მოსამსახურედ ყოფნა? დედა დედაა და ცხოველი თუ არ არის ადამიანი, დედა უნდა უყვარდეს. მე ასე ვფიქრობ."
"ბევრი შემთხვევა ვიცი... ტკივილიანი დასასრულით... ემიგრანტი დედის შვილი ვარ. 18 წელია დედა ემიგრაციაშია... ვიცი რა ხდება... როგორ უცივდებათ გული შვილებს. ამიტომ ვამბობ - არ დატოვოთ დედებო შვილები!"
"უმადურობაც უსიყვარულობამ იცის... საოცარია, რომ ქართველი დედები, რომლებიც ზედმეტი მეურვეობით და შვილების კუდში დევნით გამოირჩეოდნენ, ასე მასიურად წავიდნენ ემიგრაციაში და შვილები მარტოობასა და შიშში დატოვეს - ამას მე პირადად ვერ ვიგებ - გვიჭირდა, მაგრამ რაც გვქონდა, იმით ვკმაყოფილდებოდით, მაგრამ არათუ შვილების, მეუღლის მიტოვებაც ვერ წარმომედგინა... რა ვიცი, რა ვიცი, ამას უფრო წამხედურობას ვაბრალებ..."
"ამიტომ არ უნდა გადაყვე არავის, ვინც არ გაფასებს... ვინც არ უნდა იყოს თუნდაც შვილი, აწიოს ერთი ადგილი და გაუმკლავდეს საკუთარ პრობლემებს!!! მერე მეტად დააფასებს შენ ზრუნვას და თავგანწირვას"
ასევე იხილეთ: ვირტუალური დედა