როგორ უნდა გამოიყენოთ წონის კლებისთვის არაქისის კარაქი და რისთვის არის ის ყველაზე სასარგებლო - მშობლები

არაქისის კარაქი ბოლო წლებში ერთ-ერთ ყველაზე პოპულარულ პროდუქტად იქცა. მას საუზმეზე, წასახემსებლად და სხვადასხვა დესერტის მოსამზადებლად იყენებენ. მიუხედავად იმისა, რომ ბევრი მას მხოლოდ გემრიელ დანამატად მიიჩნევს, ხარისხიანი არაქისის კარაქი არაერთ სასარგებლო ნივთიერებას შეიცავს და სწორად მოხმარების შემთხვევაში ჯანმრთელობისთვისაც სასარგებლოა.

არაქისის კარაქი მდიდარია ცილებით, რაც მას განსაკუთრებით მიმზიდველს ხდის ფიზიკურად აქტიური ადამიანებისა და სპორტსმენებისთვის. ცილები ხელს უწყობს კუნთოვანი ქსოვილის შენარჩუნებასა და აღდგენას, ასევე უფრო ხანგრძლივად გვანიჭებს დანაყრების შეგრძნებას.

პროდუქტი შეიცავს უჯერი ცხიმოვანი მჟავების მნიშვნელოვან რაოდენობას, რომლებიც გულ-სისხლძარღვთა სისტემისთვის სასარგებლოდ ითვლება. კვლევების მიხედვით, ასეთი ცხიმები ხელს უწყობს „ცუდი“ ქოლესტერინის დონის შემცირებას და გულის დაავადებების რისკის შემცირებას.

არაქისის კარაქი ასევე E ვიტამინის კარგი წყაროა. ეს ვიტამინი ძლიერი ანტიოქსიდანტია, რომელიც უჯრედებს თავისუფალი რადიკალებისგან იცავს და კანის, თვალებისა და იმუნური სისტემის ჯანმრთელობის შენარჩუნებაში მონაწილეობს.

მის შემადგენლობაში შედის მაგნიუმი, კალიუმი და ფოსფორი. მაგნიუმი მნიშვნელოვანია ნერვული სისტემისა და კუნთების ფუნქციონირებისთვის, კალიუმი კი არტერიული წნევის რეგულირებაში მონაწილეობს. ფოსფორი ძვლებისა და კბილების ჯანმრთელობისთვის აუცილებელი მინერალია.

არაქისის კარაქი ენერგიის კარგი წყაროც არის. სწორედ ამიტომ მას ხშირად იყენებენ საუზმეზე ან ვარჯიშამდე. მცირე რაოდენობაც კი ორგანიზმს საკმაო ენერგიით ამარაგებს და შიმშილის შეგრძნებას ამცირებს.

ამ პროდუქტების ზომიერმა მოხმარებამ შეიძლება მეორე ტიპის დიაბეტის განვითარების რისკები შეამციროს. ამის ერთ-ერთი მიზეზი ის არის, რომ პროდუქტი ცილებს, ცხიმებსა და ბოჭკოებს შეიცავს, რაც სისხლში შაქრის დონის სწრაფ მატებას აფერხებს.

თუმცა არაქისის კარაქის არჩევისას მნიშვნელოვანია ყურადღება მიაქციოთ შემადგენლობას. ყველაზე სასარგებლოდ ითვლება ის პროდუქტი, რომელიც მხოლოდ არაქისს ან არაქისსა და მცირე რაოდენობით მარილს შეიცავს. ბევრ კომერციულ პროდუქტში დამატებულია შაქარი, პალმის ზეთი და სხვა დანამატები, რომლებიც მის კვებით ღირებულებას ამცირებს.

უნდა გავითვალისწინოთ ისიც, რომ არაქისის კარაქი საკმაოდ კალორიული პროდუქტია. საშუალოდ ერთი სუფრის კოვზი დაახლოებით 90-100 კალორიას შეიცავს, ამიტომ მისი გადაჭარბებული მოხმარება წონის მატებას შეიძლება უკავშირდებოდეს.

სპეციალისტების რეკომენდაციით, ჯანმრთელი ზრდასრულისთვის დღეში 1-2 სუფრის კოვზი არაქისის კარაქი სრულიად საკმარისია, რათა მისი სასარგებლო თვისებები ზედმეტი კალორიების გარეშე მიიღოს.

როგორ გამოვიყენოთ არაქისის კარაქი წონის კლებისთვის

წონის კლებისთვის სპეციალისტები რეკომენდაციას უწევენ დღეში 1 სუფრის კოვზის მიღებას. არაქისის კარაქი შეგიძლიათ დაუმატოთ დილის შვრიას, ნატურალურ იოგურტს, ხილის ნაჭრებს ან სრულმარცვლოვან ტოსტს. ასეთ შემთხვევაში კვება უფრო ნოყიერი ხდება და შიმშილის შეგრძნება უფრო გვიან შეგაწუხებთ.

ბევრს უკვირს, როგორ შეიძლება კალორიული პროდუქტი გახდომას ეხმარებოდეს, თუმცა მისი უპირატესობა ისაა, რომ:

• დიდი ხნით ანაყრებს;
• ამცირებს ტკბილეულის სურვილს;
• შეიცავს ცილებსა და სასარგებლო ცხიმებს;
• ხელს უშლის სისხლში შაქრის მერყეობას.

მაგალითად, 1 სუფრის კოვზი (დაახლოებით 15-16 გ) არაქისის კარაქი შეიცავს დაახლოებით 90-100 კალორიას, მაგრამ ბევრად უფრო დიდი ხნით ანაყრებს, ვიდრე იგივე კალორიის ორცხობილა ან კანფეტი.

არაქისის კარაქი არ უნდა განვიხილოთ, როგორც გასახდომი საშუალება. ის ეფექტურია მხოლოდ მაშინ, როდესაც დაბალანსებული კვებისა და ფიზიკური აქტივობის ნაწილია. ზომიერი მოხმარება დაგეხმარებათ უფრო დიდხანს იგრძნოთ დანაყრება, შეიმციროთ შიმშილის გრძნობა და კალორიები უფრო მარტივად გააკონტროლოთ.

არაქისის კარაქი განსაკუთრებით სასარგებლოა შემდეგი ადამიანებისთვის:

ბავშვები და მოზარდები

ზრდის პერიოდში ორგანიზმს მეტი ენერგია, ცილა და სასარგებლო ცხიმები სჭირდება. არაქისის კარაქი ხელს უწყობს ნორმალურ ზრდასა და განვითარებას, განსაკუთრებით იმ ბავშვებში, რომლებიც ცუდად ჭამენ ან დაბალი წონა აქვთ.

სპორტსმენები და ფიზიკურად აქტიური ადამიანები

ცილების, მაგნიუმისა და კალორიების მაღალი შემცველობის გამო, არაქისის კარაქი კარგი არჩევანია ვარჯიშამდე ან მის შემდეგ. ის ხელს უწყობს კუნთების აღდგენას და ენერგიის მარაგის შევსებას.

ადამიანები, რომლებსაც წონის მომატება სურთ

თუ ადამიანს წონის დეფიციტი აქვს, არაქისის კარაქი კალორიების მიღების მარტივი გზაა. მცირე ულუფაც კი საკმაოდ ენერგიულია.

ვეგეტარიანელები და ვეგანები

რადგან მცენარეული ცილების კარგი წყაროა, არაქისის კარაქი შეიძლება დაეხმაროს მათ, ვინც ხორცს ან ცხოველურ პროდუქტებს არ მოიხმარს.

ხანდაზმული ადამიანები

ასაკთან ერთად კუნთოვანი მასა იკლებს. ცილებით მდიდარი საკვები, მათ შორის არაქისის კარაქი, ხელს უწყობს კუნთების შენარჩუნებას და ენერგიის მიღებას.

ადამიანები, რომლებსაც ხშირად შიათ

ცილებისა და ცხიმების კომბინაცია დანაყრების შეგრძნებას ახანგრძლივებს, ამიტომ ის შეიძლება სასარგებლო იყოს მათთვის, ვისაც ხშირი შიმშილი აწუხებს.

დიაბეტის ან ინსულინრეზისტენტობის მქონე პირები

შაქრის გარეშე დამზადებული არაქისის კარაქი სისხლში გლუკოზის დონეს სწრაფად არ ზრდის და შეიძლება იყოს დაბალი გლიკემიური დატვირთვის მქონე წასახემსებელი.

როგორ გავარჩიოთ ზეითუნის ზეთის ხარისხები და რა განსხვავებაა მათ შორის: შესაწვავად გამოდგება ე.წ. ცივი დაწურვის ზეთიც, მაგრამ...