ხელის თხოვნა 443 მეტრ სიმაღლეზე, რომელიც პატიმრობით დასრულდა - ვინ არის წყვილი, რომელზეც მსოფლიო ლაპარაკობს (ვიდეო) - მშობლები

ეს წყვილი მსოფლიო საინფორმაციო საშუალებების ყურადღების ცენტრში მოექცა - 2026 წლის 1 ივლისს ისინი უკანონოდ შევიდნენ Empire State Building-ში და ავიდნენ არა მხოლოდ სადამკვირვებლო მოედნამდე, არამედ შენობის საზოგადოებისთვის დახურულ ანძაზეც. იქ, 443 მეტრის სიმაღლეზე, ანძაზე, ყოველგვარი დამცავი თოკების გარეშე, მათ გაშალეს შავი ბანერი წარწერით: "When the power of love beats the love of power, the world knows peace"; („როდესაც სიყვარულის ძალა ძალაუფლების სიყვარულს ამარცხებს, სამყარო მშვიდობას იცნობს“;) გადაიღეს ფოტოები და ვიდეოები, შემდეგ კი ბიჭმა გოგოს ხელი სთხოვა.

წყვილი იმავე დღეს დააპატიმრეს - როდესაც ჩამოსვლა დაიწყეს, მათ უკვე ელოდებოდნენ New York City Police Department-ის თანამშრომლები. ორივე დააკავეს შემთხვევის ადგილზე. მათ ბრალად ედებათ რამდენიმე დანაშაული, მათ შორის უკანონო შეჭრა, სხვისი სიცოცხლის საფრთხეში ჩაგდება, ქონების დაზიანებასთან და უსაფრთხოების სისტემების დარღვევასთან დაკავშირებული სხვა ბრალდებები.

სწორედ მათი დაპატიმრების შემდეგ, როდესაც ვიდეოკადრები გავრცელდა, გაიგო მსოფლიომ ამ ამბავზე და დღეს ექსტრიმის მოყვარული წყვილის ვინაობაც გაირკვა.

ისინი მსოფლიოში ერთ-ერთ ყველაზე ცნობილ „რუფტოპერ“ (rooftopper) წყვილად ითვლებიან - ანგელა ნიკოლაუ (33 წლის) და ივან კუზნეცოვი (32 წლის). ორივე წარმოშობით რუსეთიდან არის და წლებია მსოფლიოს სხვადასხვა ქვეყანაში ცათამბჯენებზე, ამწეებსა და ანძებზე უსაფრთხოების თოკების გარეშე ადიან. მათი ფოტოები და ვიდეოები მილიონობით ნახვას აგროვებს სოციალურ ქსელებში.

2024 წელს მათზე გადაიღეს დოკუმენტური ფილმიც — Skywalkers: A Love Story, რომელიც ასახავს მათ სახიფათო მოგზაურობებსა და ურთიერთობას.

ასე რომ, ეს მათთვის პირველი მსგავსი შემთხვევა არ არის. მათ უკვე არაერთი ცნობილი ცათამბჯენი აქვთ დალაშქრული, მათ შორის Merdeka 118 — მსოფლიოს ერთ-ერთი ყველაზე მაღალი შენობა, რომლის უკანონო დაპყრობაც მათ დოკუმენტურ ფილმშიც არის ნაჩვენები.

მსგავსი „ურბანული ალპინიზმის“ ან „რუფთოპინგის“ შემთხვევები ბოლო წლებში გახშირდა. მონაწილეები ხშირად ცდილობენ ცნობილი შენობების სახურავებზე ასვლას შთამბეჭდავი ფოტოების ან ვიდეოების გადასაღებად. ექსპერტები ხაზს უსვამენ, რომ ასეთი ქმედებები მხოლოდ მონაწილეებისთვის არ არის სახიფათო — მათ შეიძლება საფრთხე შეუქმნან მაშველებს, უსაფრთხოების თანამშრომლებსა და სხვა ადამიანებსაც, თუ სამაშველო ოპერაცია გახდება საჭირო.Empire State Building-ის ადმინისტრაციამ კი განაცხადა, რომ უსაფრთხოების ზომები ხელახლა გადაიხედება, რათა მსგავსი შემთხვევები მომავალში თავიდან იქნეს აცილებული.

ხელის თხოვნა პირდაპირ ეთერში - ქართველმა მორაგბემ საცოლეს ხელი სთხოვა გამარჯვების შემდეგ

მომღერალი მარიამ შენგელია მორაგბეზე დაინიშნა - ხელის თხოვნა დაბადების დღეზე და წყვილის ემოციები (ვიდეო)