52 წლის პენელოპა კრუსის და 42 წლის ოლივია უაილდის თამამ მსჯელობას პრემენოპაუზაზე, დიდი გამოხმაურება მოჰყვა - „თუ ამაზე უფრო ღიად ვისაუბრებთ, ბევრ ქალს აღარ ექნება განცდა, რომ ეს ყველაფერი მხოლოდ მას ემართება.“ - მშობლები
52 წლის პენელოპა კრუსის და 42 წლის ოლივია უაილდის თამამ მსჯელობას პრემენოპაუზაზე, დიდი გამოხმაურება მოჰყვა - „თუ ამაზე უფრო ღიად ვისაუბრებთ, ბევრ ქალს აღარ ექნება განცდა, რომ ეს ყველაფერი მხოლოდ მას ემართება.“
ვიდეო ორი ვარსკვლავის მონაწილეობით, ბოლო დღეებში ძალიან გავრცელდა, რადგან პენელოპა კრუსი და ოლივია უაილდი საკმაოდ გულწრფელად საუბრობდნენ პრემენოპაუზაზე, თემაზე, რომელსაც ცნობილები იშვიათად ეხებიან. ინტერვიუ მათი ახალი ფილმის, The Invite-ის პრომოუშენის ფარგლებში ჩაიწერა.
ესპანელმა ვარსკვლავმა, 52 წლის პენელოპა კრუსმა, რომელსაც უკვე საკმაო გამოცდილება დაუგრუვდა, აღნიშნა, რომ დაახლოებით 41 წლის ასაკში ექიმმა გააფრთხილა, ჰორმონები "10–12 წლის განმავლობაში ნამდვილ ცეკვას დაიწყებდნენ". მისი თქმით, თავიდან ეგონა, რომ ეს ხუმრობა იყო, მაგრამ შემდეგ დაიწყო ძლიერი ჰორმონული მერყეობა და თითქმის ყოველთვიური კისტები. ეს პერიოდი ბევრად უფრო რთული აღმოჩნდა, ვიდრე წარმოედგინა, და სწორედ ამიტომ მიაჩნია, რომ ქალებს ამის შესახებ წინასწარ უნდა ესაუბრონ. მან ასევე თქვა, რომ მისთვის დიდი დახმარება აღმოჩნდა ბიოიდენტური ჰორმონული თერაპია, თუმცა ეს საკუთარ გამოცდილებად წარმოადგინა და არა როგორც უნივერსალური გამოსავალი.
ერთ-ერთი ყველაზე განხილული მომენტი იყო ე.წ. "გაყინული მხრის" ხსენება. კრუსმა თქვა, რომ პრემენოპაუზის შესახებ კვლევისას ამ მდგომარეობასაც გადააწყდა. უაილდმა კი იხუმრა, რომ კრუსისგან ამის გაგების შემდეგ ახლა სულ იმაზე იფიქრებს, როდის გაეყინება მხარი.
- მნიშვნელოვანი ნიუანსია, რომ "გაყინული მხარი" ოფიციალურად პრემენოპაუზის სიმპტომად არ ითვლება, თუმცა ის განსაკუთრებით ხშირია 40 წელს გადაცილებულ ქალებში და არსებობს კვლევები, რომლებიც ჰორმონალურ ცვლილებებთან შესაძლო კავშირს იკვლევს. ამიტომ ამ თემამ ექიმებისა და პაციენტების ყურადღებაც მიიქცია.
რა გამოხმაურება მოჰყვა?
რეაქცია ძირითადად ძალიან დადებითი იყო.
ბევრმა ქალმა სოციალურ ქსელებსა და Reddit-ზე დაწერა, რომ პირველად გაიგო პრემენოპაუზასთან დაკავშირებული ზოგიერთი ნაკლებად ცნობილი სიმპტომის შესახებ. განსაკუთრებით ხშირად იმეორებდნენ აზრს, რომ ქალების ჯანმრთელობის საკითხებზე საზოგადოებაში ჯერ კიდევ ძალიან ცოტას საუბრობენ, მაშინ როცა პრემენოპაუზა მილიონობით ქალს ეხება. ბევრმა აღნიშნა, რომ თავადაც ჰქონია მხრის ძლიერი ტკივილი ან "გაყინული მხარი" და აქამდე არც უფიქრია, რომ ეს შესაძლოა ჰორმონალურ ცვლილებებს უკავშირდებოდეს. კომენტარებში ხშირად ახსენებდნენ, რომ მსგავსი საჯარო საუბრები ეხმარება ქალებს, თავი მარტო არ იგრძნონ და დროულად მიმართონ ექიმს.
ყველაზე დიდი ყურადღება მაინც იმან მიიპყრო, რომ კრუსმა ღიად ისაუბრა საკუთარ გამოცდილებაზე და წამოჭრა თემა, რომელსაც, მისი თქმით, მედიცინასა და საზოგადოებაში ჯერ კიდევ არასაკმარისი ყურადღება ეთმობა.
პენელოპა კრუსის რამდენიმე ციტატა ინტერვიუდან
„როცა 41 წლის ვიყავი, ექიმმა მითხრა: "მოემზადე — მომდევნო 10–12 წელი ჰორმონები ნამდვილ ცეკვას გამართავენ". მაშინ გამეცინა, მაგრამ მალე მივხვდი, რამდენად მართალი იყო.“
„ვფიქრობდი, მენოპაუზა მხოლოდ იმას ნიშნავდა, რომ შეიძლება ცუდად გეძინოს ან სიცხის ტალღები გქონდეს. წარმოდგენაც არ მქონდა, რამდენად მრავალფეროვანი შეიძლება იყოს მისი სიმპტომები.“
„ქალების ჰორმონებზე და ამ ცვლილებებზე გაცილებით მეტი უნდა ვილაპარაკოთ. ეს ძალიან ბევრ ადამიანს ეხება, მაგრამ ამაზე ჯერ კიდევ არასაკმარისად საუბრობენ.“
„ჯანმრთელობის გარეშე არაფერი გვაქვს. ამიტომ უნდა ვიზრუნოთ საკუთარ თავზე და არ შეგვეშინდეს ამ თემებზე ღიად ლაპარაკის.“
„თუ ამ გამოცდილებაზე უფრო ღიად ვისაუბრებთ, ბევრ ქალს აღარ ექნება განცდა, რომ ეს ყველაფერი მხოლოდ მას ემართება.“
