რატომ არ შეიძლება მაცივარში გაჭრილი საზამთროს "თავღიად" შენახვა და რომელია შენახვის ყველაზე სწორი წესი - მშობლები

ზაფხულის ცხელ დღეებში საზამთრო ერთ-ერთი ყველაზე პოპულარული და გამაგრილებელი ხილია როგორც უფროსებისთვის, ისე პატარებისთვის. თუმცა, როგორც წესი, ერთ ჭამაზე საზამტროს არავინ მიირთმევს - ყოველთვის რჩება საკმაოდ დიდი ნაჭერი, რომელსაც მაცივარში ვინახავთ. ვინაიდან საზამთრო მოცულით დიდია, მისი თავდახურულ ჭურჭელში მოთავსება თითქმის შეუძლებელია. გაჭრილი საზამთროს მაცივარში თავღიად დატოვება კი საკმაოდ გავრცელებული შეცდომაა, რომელმაც შესაძლოა სერიოზული საფრთხე შეუქმნას ოჯახის წევრების, განსაკუთრებით კი ბავშვების ჯანმრთელობას. იმისათვის, რომ საზამთრომ გემოც შეინარჩუნოს და უსაფრთხოც დარჩეს, აუცილებელია ვიცოდეთ, რა რისკებთან არის დაკავშირებული მისი თავღია შენახვა და როგორ მოვაგვაროთ ეს პრობლემა მარტივად.

ბაქტერიების გავრცელება და ჯვარედინი დაბინძურება

პირველი და ყველაზე სერიოზული მიზეზი, რის გამოც საზამთროს ღიად დატოვება არ შეიძლება, ბაქტერიების გამრავლების რისკია. ბევრს ჰგონია, რომ მაცივარი სტერილიზებული სივრცეა, თუმცა ეს ასე არ არის. საზამთროს წვნიანი და ტკბილი რბილობი იდეალურ გარემოს ქმნის მავნე მიკროორგანიზმების განვითარებისთვის. თუ მაცივარში საზამთროს გვერდით დევს გაურეცხავი კვერცხი ან მწვანილი, ბაქტერიები ჰაერის ნაკადით ან პირდაპირი კონტაქტით მარტივად გადავლენ მის ზედაპირზე და გამოიწვევენ ჯვარედინ დაბინძურებას.

გამოშრობა და უსიამოვნო სუნის შეწოვა

გარდა ბიოლოგიური საფრთხისა, თავღია საზამთრო მომენტალურად კარგავს თავის საგემოვნო თვისებებს. ის ძალიან სწრაფად იწოვს მაცივარში არსებულ ყველა სპეციფიკურ სუნს, მაგალითად, ნივრიანი კერძის ან ყველის არომატს. ამასთანავე, ჰაერთან უშუალო კონტაქტის გამო საზამთროს ზედაპირი შრება და პროდუქტი უგემური ხდება.

როგორ მოვაგვაროთ პრობლემა საკვები პარკის დახმარებით

ამ პრობლემის მოსაგვარებლად სულაც არ არის აუცილებელი გიგანტური ჭურჭლის ძებნა, რადგან არსებობს რამდენიმე ძალიან პრაქტიკული ალტერნატივა. ყველაზე მარტივი და ხელმისაწვდომი გზა საკვები ცელოფნის, ანუ სტრეჩის გამოყენებაა. თუ საზამთრო შუაზე გაჭერით, მის ჭრილ ზედაპირზე მჭიდროდ გადააკარით საკვები პარკი ისე, რომ შიგნით ჰაერი არ შედიოდეს. მომდევნო გამოყენებისას, თუ ბავშვს უნდა აჭამოთ, უსაფრთხოების მიზნით, პირველი თხელი ფენა ჩამოაჭერით და გადააგდეთ, ხოლო ბავშვს მხოლოდ შიდა, სუფთა ნაწილი მიეცით.

კუბებად დაჭრა და კონტეინერებში განაწილება

კიდევ ერთი მოსახერხებელი მეთოდია ნახევარი საზამთროს ერთიანად გასუფთავება ქერქისგან. რბილობი დაჭერით პატარა კუბებად და გადაანაწილეთ ორ ან სამ საშუალო ზომის ჩვეულებრივ, თავსახურიან კონტეინერში. ამ ხერხით თქვენ არა მხოლოდ მაცივარში დაზოგავთ ადგილს, არამედ ბავშვისთვისაც ნებისმიერ დროს მზად გექნებათ წინასწარ მომზადებული, უსაფრთხო და ჰერმეტულად დაცული ულუფა.

სილიკონის თავსახურები ან ალუმინის ფოლგა

თანამედროვე სამზარეულოში აქტუალურია სპეციალური ელასტიური სილიკონის თავსახურები, რომლებიც პირდაპირ გაჭრილ საზამთროს ერგება და იცავს მას გარემო ფაქტორებისგან. თუ ასეთი თავსახური ხელთ არ გაქვთ, შეგიძლიათ გამოიყენოთ სქელი ალუმინის ფოლგა. მისი მჭიდროდ შემოკვრა და დაფიქსირება საზამთროს გაჭრილ ნაწილზე ბევრად სჯობს ხილის სრულად ღიად დატოვებას.

ოქროს წესი ბავშვის უსაფრთხოებისთვის

მშობლებმა აუცილებლად უნდა დაიცვან ერთი ოქროს წესი: თუ საზამთრო მაცივარში 24 საათზე მეტხანს იდო თავღიად, ის მხოლოდ უფროსებმა უნდა მიირთვან. პატარებს ასეთი პროდუქტი აღარ უნდა აჭამოთ, რადგან ბავშვის მგრძნობიარე კუჭ-ნაწლავისთვის მცირე ბაქტერიული ფონიც კი სრულიად საკმარისია მოსაწამლად და სერიოზული გართულებების გამოსაწვევად.

რომელი ასაკიდან არის უსაფრთხო საზამთრო ბავშვისთვის: ნიტრატები ყოველთვის ქერქთან ახლოს გროვდება, მიეცით მხოლოდ შუაგული, ყველაზე წითელი ნაწილი